ବିଚ୍ଛିନାଂଚଳରେ ଚାଲିଛି ମାଓବାଦୀଙ୍କ ସରକାର ! ପଂଚାୟତ ଭୋଟ୍ ଆଗରୁ ପାଣି ସେପଟେ ଆତଙ୍କର ପରିବେଶ
କନକ ବ୍ୟୁରୋ : ବିଚ୍ଛିନ୍ନାଂଚଳରେ ଚାଲିଛି ମାଓବାଦୀଙ୍କ ସରକାର । ପ୍ରଥମେ ୫ ନିର୍ବାଚନ ଅଧିକାରୀଙ୍କୁ ଅପହରଣ ପରେ, ଏବେ ପୁଣି ନିର୍ବାଚନ ବର୍ଜନ କରିବାକୁ ପୋଷ୍ଟର ମାରିଛନ୍ତି ନକ୍ସଲ । ଲାଲ ବାହିନୀର ଧମକ ଓ ଭୟ ଭିତରେ ଲାଲଗଡରେ ଭୋଟ ପଡିବା ନେଇ ଆଶଙ୍କା ସୃଷ୍ଟି ହୋଇଛି । କାରଣ ମାଲକାନଗିରିର ମାଓ ଉପଦୃତ ଅଂଚଳକୁ ନା’ଯାଉଛନ୍ତି ସରକାରୀ ଅଧିକାରୀ, ନା ନାମାଙ୍କନପତ୍ର ଦାଖଲ କରୁଛନ୍ତି ପ୍ରାର୍ଥୀ । ଜନତାଙ୍କଠୁ ଆରମ୍ଭ କରି ଜନପ୍ରତିନିଧି ଯାଏଁ ସମସ୍ତଙ୍କୁ ଡରାଇ ରଖିଛନ୍ତି ନକ୍ସଲ ।
Kanak News is now on WhatsApp
Join and get latest news updates delivered to you via WhatsApp
ମାଲକାନଗିରି ଜିଲ୍ଲାର ଚିତ୍ରକୋଣ୍ଡା ବିଚ୍ଛିନ୍ନାଂଳରେ ପୁଣି ପୋଷ୍ଟର ମାରିଲେ ମାଓବାଦୀ, ଏବଂ ପଂଚାୟତ ନିର୍ବାଚନ ବର୍ଜନ କରିବାକୁ ଦେଲେ ଚେତାବନୀ । ଲାଲ ବାହିନୀର ଫତୁଆ ନ’ମାନିଲେ ପ୍ରଜାକୋର୍ଟରେ ଦିଆଯିବ ଦଣ୍ଡ । ପ୍ରାର୍ଥୀ ହେଲେ ମୃତ୍ୟୁ ଦଣ୍ଡ ମିଳିବ ଓ ଭୋଟ୍ କାଳି ଲାଗିଥିଲେ ଆଙ୍ଗୁଠି କାଟି ଦିଆଯିବ । ମାଓ ଭୟ ଭିତରେ କେମିତି ରହିଛି ଚିତ୍ରକୋଣ୍ଡା ବିଚ୍ଛିନ୍ନାଂଚଳରେ ନିର୍ବାଚନୀ ମାହୋଲ ଅନୁସନ୍ଧାନ ପାଇଁ ଗ୍ରାଉଣ୍ଡ ଜିରୋରେ ପହଂଚିଥିଲା କନକ ନ୍ୟୁଜ ଟିମ୍ ।
ଦୀର୍ଘ ୪ ଘଂଟାର ମୋଟର ଲଂଚ ଯାତ୍ରା ପରେ ଜୋଡାମ୍ବ ପଂଚାୟତରେ ଆଜି ନାମାଙ୍କନ ପତ୍ର ଦାଖଲର ଶେଷ ଦିନ ହୋଇଥିଲେ ମଧ୍ୟ ପଂଚାୟତ କାର୍ଯ୍ୟାଳୟରେ ଝୁଲୁଥିଲା ତାଲା । ନା’ଥିଲେ ପଂଚାୟତ ଅଧିକାରୀ, ନା’ଥିଲା ଆଶାୟୀ ପ୍ରାର୍ଥୀଙ୍କ ଭିଡ । ପଂଚାୟତ ଭୋଟ ପାଇଁ ପୁରା ରାଜ୍ୟ ଉଠୁଥିବା ପଡୁଥିବାବେଳେ ଏଠି ଥିଲା ଅସମ୍ଭବ ନୀରବତା ।
ଗତ ୧୩ ତାରିଖରେ ୫ ନିର୍ବାଚନ ଅଧିକାରୀଙ୍କୁ ଉଠାଇ ନେଇଥିଲେ ମାଓବାଦୀ । ଏହାପରେ ପ୍ରଶାସନ ଏତେ ଭୟbúତ ହୋଇପଡିଛି ଯେ, ବିଚ୍ଛିନ୍ନାଂଚଳର ୯ଟି ପଂଚାୟତରେ ନାମାଙ୍କନପତ୍ର ଗ୍ରହଣ କରିବାକୁ ଆଦୌ ପହଂଚି ନାହାନ୍ତି କୌଣସି ନିର୍ବାଚନ ଅଧିକାରୀ ।
ଜୋଡାମ୍ବ, ପଣଷପୁଟ, ଯନ୍ତ୍ରୀ, ଧୁଳିପୁଟ, ବଡପଦର, ପାପେରମେଟଲା, ରାଲେଗାଡା, ଆଣ୍ଡ୍ରାପାଲି, ଗାଜଲମାମୁଡି ପଂଚାୟତରେ କୌଣସି ନାମାଙ୍କନ ପତ୍ର ଦାଖଲ ହୋଇନାହିଁ । ଏହାକୁ ବାଦଦେଲେ ମାଓ ଉପଦ୍ରୁତ ଟନେଲ କ୍ୟା, ବଡପଡା, କପାତୁଟି, ପପଲୁର, କୁରମାନୁର ଓ ନାକାମାମୁଡି ପଂଚାୟତରେ ମଧ୍ୟ କେହି ପ୍ରାର୍ଥୀ ନଥିବା ଜଣାପଡିଛି । କାରଣ ଲାଲ ବାହିନୀର ଧମକରେ ଭୟଭଭୀତ ଅବସ୍ଥାରେ ରହିଛନ୍ତି ଏସବୁ ଅଂଚଳର ଜନତା ଓ ଜନପ୍ରତିନିଧି ।
ମାଲକାନଗିରର ୧୫ଟି ଜିଲ୍ଲାପରିଷଦ ଜୋନ ପାଇଁ ତିନି ପ୍ରମୁଖ ରାଜନୈତିକ ଦଳର ପ୍ରାର୍ଥୀ ଜିଲ୍ଲାପାଳଙ୍କ କାର୍ଯ୍ୟାଳୟରେ ନାମାଙ୍କନପତ୍ର ଦାଖଲ କରିଛନ୍ତି । ହେଲେ ଭୋଟ ମାଗିବାକୁ ଏମାନେ ଗାଁରେ ପହଂଚିବା ନେଇ ଆଶଙ୍କା ରହିଛି । ବିଚ୍ଛିନ୍ନାଂଚଳରେ ଚାଲିଥିବା ମାଓବାଦୀଙ୍କ ସରକାର ଆଗରେ ହାତ ଟେକି ଦେଇଛନ୍ତି ଅସଲ ଶାସନ ଓ ସରକାର ।