ମୋଦିଙ୍କ ପ୍ରତି ସମର୍ଥନ, ଅମିତ ଶାହଙ୍କୁ ବିରୋଧ
କନକ ବ୍ୟୁରୋ: ବିଜେପି ଓ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ବିରୋଧରେ ସର୍ବଦା ଆକ୍ରମଣାତ୍ମକ ଆଭିମୁଖ୍ୟ ରଖୁଥିବା ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀ ଶନିବାର ହଠାତ୍ ନିଜର ସ୍ୱର ପରିବର୍ତ୍ତନ କରିଛନ୍ତି । ମମତା ଏକ ଟିଭି କାର୍ଯ୍ୟକ୍ରମରେ କହିଛନ୍ତି ଯେ, ପ୍ରଧାନମନ୍ତ୍ରୀ ମୋଦିଙ୍କ ସହ ତାଙ୍କର କୌଣସି ମତଭେଦ ନାହିଁ । ସେ ତାଙ୍କୁ ସମର୍ଥନ କରନ୍ତି । କିନ୍ତୁ ବିଜେପି ଅଧ୍ୟକ୍ଷ ଅମିତ ଶାହ ଦେଶରେ ଏକଛତ୍ରବାଦ ଶାସନ ଚଳାଇଛନ୍ତି । ତାଙ୍କ ପାଇଁ ଦେଶବାସୀ ଭୟଭୀତ ହୋଇରହିଛନ୍ତି ବୋଲି ମମତା ସିଏନଏନ୍-ନ୍ୟୁଜ୧୮ ଦ୍ୱାରା ଆୟୋଜିତ ଏକ ଉତ୍ସବରେ ଯୋଗଦେଇ କହିଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ଏକ ରାଜନୈତିକ ଦଳର ରାଷ୍ଟ୍ରୀୟ ଅଧ୍ୟକ୍ଷ କେନ୍ଦ୍ର ମନ୍ତ୍ରୀମାନଙ୍କ ବୈଠକରେ ଅଧ୍ୟକ୍ଷତା କରିପାରିବେ କି ବୋଲି ସେ ପ୍ରଶ୍ନ କରିଛନ୍ତି । ଦେଶର ପ୍ରଧାନମନ୍ତ୍ରୀ ମୋଦି ନା ଅମିତ ଶାହ ବୋଲି ସେ ଆଶ୍ଚର୍ଯ୍ୟ ପ୍ରକଟ କରିଛନ୍ତି । ତେବେ ପ୍ରଧାନମନ୍ତ୍ରୀଙ୍କ ପ୍ରତି ମମତାଙ୍କ ନରମ ମନୋଭାବ ବିଜେପି ଓ ବିରୋଧୀ ଦଳମାନଙ୍କୁ ଚକିତ କରିଛି । ମମତାଙ୍କ ବୟାନ ପ୍ରଧାନମନ୍ତ୍ରୀଙ୍କ ଗରିବ କଲ୍ୟାଣ ଯୋଜନାକୁ ସମର୍ଥନ ବୋଲି ବିଜେପି ମୁଖପାତ୍ର ସମ୍ବିତ ପାତ୍ର କହିଛନ୍ତି ।
କିନ୍ତୁ ପଶ୍ଚିମବଙ୍ଗ ବିଜେପି ମମତାଙ୍କୁ ଟାର୍ଗେଟ କରି କହିଛି ଯେ, ତୃଣମୂଳ କଂଗ୍ରେସ ହିଁ ଏକଛତ୍ରବାଦ ଓ ସ୍ୱେଚ୍ଛାଚାରୀ ଶାସନର ପ୍ରତୀକ ଏବଂ ଏହାର ସୁପ୍ରିମୋ ମମତା ଏହାର ମୁଖ୍ୟା ସଂଚାଳିକା । ବିଜେପି ନେତା ଚନ୍ଦ୍ର ବୋଷ କହିଛନ୍ତି ଯେ ଟିଏମସିରେ କେହି ସାମାନ୍ୟ ପ୍ରତିବାଦ କଲେ ତାଙ୍କୁ ଦଳରୁ ବହିଷ୍କାର କରିଦିଆଯାଏ । ଦଳକୁ ଏଭଳି ଭୟଭୀତ କରି ରଖିଥିବା ମମତା ଅନ୍ୟପ୍ରତି ଅଙ୍ଗୁଳି ଦେଖାଇବା ପୂର୍ବରୁ ନିଜ କଥା ଚିନ୍ତା କରିବାକୁ ସେ କହିଛନ୍ତି ।