ମମତାଙ୍କ ସାହାସିକତାର କାହାଣୀ ନବୀନଙ୍କ ମୁହଁରେ ଫୁଟାଇଲା ହସ ! କେନ୍ଦ୍ରାପଡ଼ାର କୁନି ଝିଅକୁ ପୁରସ୍କୃତ କଲା ବେଳେ ସ୍ନେହକଲେ ନବୀନ
କନକ ବ୍ୟୁରୋ : ସ୍ୱାଧୀନତା ଦିବସ ଅବସରରେ ଉଲ୍ଲେଖନୀୟ କାମ ପାଇଁ ଆଜି ମିଳିଛି ପୋଲିସ ମେଡାଲ । ବିଭିନ୍ନ ବିଭାଗର ୨୬ ଜଣ କର୍ମଚାରୀଙ୍କୁ ମୁଖ୍ୟମନ୍ତ୍ରୀ ସାହସିକତା ପଦକ ପ୍ରଦାନ କରିଛନ୍ତି । ଏମାନଙ୍କ ମଧ୍ୟରୁ ଉଲ୍ଲେଖନୀୟ ସେବା ପାଇଁ ୭ ଜଣ, ସାହସିକତା ପାଇଁ ୩ ଜଣ ଏବଂ ଉତମ ପୋଲିସ ଟ୍ରେନିଂ ପାଇଁ ୩ ଜଣଙ୍କୁ ପୋଲିସ ମେଡାଲ ଦିଆଯାଇଛି । ତେବେ ସମସ୍ତଙ୍କ ମୁହଁରେ ହସ ଆଉ ହାତରୁ କରତାଳି ଫାଟିପଡିଥିଲା ଯେତେବେଳେ ଦୁଇ ଶିଶୁଙ୍କୁ ରାଷ୍ଟ୍ରପତି ପଦକ ଦେଇଥିଲେ ମୁଖ୍ୟମନ୍ତ୍ରୀ ।
Kanak News is now on WhatsApp
Join and get latest news updates delivered to you via WhatsApp
ଜଣେ କୁନି ପିଲାର ସାହାସିକତାର କାହାଣୀ, କେନ୍ଦ୍ରାପଡ଼ାର କୁନି ଝିଅ ମମତା ଦଳାଇଙ୍କୁ ଯେତେବେଳେ ଜୀବନ ରକ୍ଷା ପଦକ ଦେବା ପାଇଁ ଗୃହସଚିବ ପ୍ରଶସ୍ତିପତ୍ର ପଢ଼ୁଥିଲେ, ସେତେବେଳେ ବେଶ ଉତ୍ସକତାର ସହ ମମତାକୁ ଚାହିଁ ରହିଥିଲେ ମୁଖ୍ୟମନ୍ତ୍ରୀ । ମମତାକୁ ପଦକ ଏବଂ ପୁରସ୍କାର ରାଶି ଦେବା ସହ ଅତି ଶ୍ରଦ୍ଧାରେ ମମତାଙ୍କ ମୁଣ୍ଡକୁ ଆଉଁସି ଥିଲେ ମୁଖ୍ୟମନ୍ତ୍ରୀ । ଆଉ ଏଭଳି ଦୃଶ୍ୟ ପୁରା ପରିବେଶକୁ କରତାଳିରେ ଗୁଂଜରିତ କରିଥିଲା ।
ମମତା ଏହି ସାହାସିକତାର ପରିଚୟ ଦେଇଥିଲେ ପ୍ରାୟ ଦେଢ ବର୍ଷ ପୂର୍ବରୁ । ଯେତେବେଳେ ମମତା, ବଡ ଭଉଣୀଙ୍କୁ କୁମ୍ଭୀର ମୁହଁରୁ ରକ୍ଷା କରିଥିଲେ ।୪ ଏପ୍ରିଲ ୨୦୧୭ । ଡାଙ୍ଗମାଳ ଗାଁ, କେନ୍ଦ୍ରାପଡାର ସାହସୀ ଝିଅ ମମତା ଦଳେଇ । ବଡ ଭଉଣୀ ସାଙ୍ଗରେ ପୋଖରୀକୁ ଶୌଚ ହେବାପାଇଁ ଯାଇଥିଲା ମମତା । ହଠାତ ପୋଖରୀ ଭିତରୁ ଏକ ଥଂଟିଆ କୁମ୍ଭୀର ଯେତେବେଳେ ବଡ ଭଉଣୀ ଅଶାନ୍ତିର ଡାହାଣ ହାତକୁ ତାର ମୁନିଆ ଦାନ୍ତରେ ଭିଡି ଧରିଥିଲା ଠିକ୍ ସେତିକିବେଳେ ପାଖରେ ଛିଡା ହୋଇଥିବା ସାନ ଭଉଣୀ ମମତା ଦେଖାଇଥିଲା ଅଦମ୍ୟ ସାହସ । ୫ ଫୁଟିଆ କୁମ୍ଭୀରକୁ ଦେଖି ଯେଉଁଠି ବଡବଡ ଲୋକଙ୍କର ବି ବୁଦ୍ଧି ହଜିଯାଏ, ସେତିକିବେଳେ ଡରିନଯାଇ ଅସୀମ ସାହସ ଦେଖାଇଥିଲା ଏହି ୬ ବର୍ଷର ଏହି କୁନି ଝିଅଟି । ଅଶାନ୍ତିର ବାମ ହାତକୁ ଧରି ଟାଣି ଆଣିଥିଲା ମମତା । ଆଉ ମଣିଷ ଖିଆ କୁମ୍ଭୀର ମୁହଁରୁ ଛଡାଇ ଆଣିଥିଲା ଭଉଣୀକୁ ।
ଠିକ୍ ମମତାଙ୍କ ଭଳି କେନ୍ଦୁଝରର ୧୪ ବର୍ଷର ବାଳକ ପଂକଜ ମହାନ୍ତ ବି ନିଜ ଜୀବନକୁ ବାଜି ଲଗାଇ ୩ଜଣ ମହିଳାଙ୍କ ଜୀବନ ଉଦ୍ଧାର କରିଥିଲେ । ପଂକଜଙ୍କୁ ମଧ୍ୟ ଜୀବନ ରକ୍ଷା ପଦକ ଦେବା ସହ ଦେଢ଼ ଲକ୍ଷ ଟଙ୍କାର ପୁରସ୍କାର ରଶି ପ୍ରଦାନ କରିଥିଲେ ମୁଖ୍ୟମନ୍ତ୍ରୀ । ୨୨ ମେ’ ୨୦୧୭ । ବୈତରଣୀ ନଦୀ ଗଣ୍ଡ, କେନ୍ଦୁଝରରେ ଯେଉଁ ଘଟଣା ଘଟିଥିଲା ତାହା ସମସ୍ତଙ୍କୁ ତାଜୁବ କରିଥିଲା । ବୈଜୟନ୍ତ ମହାନ୍ତ , ସୁଜିତା ମହାନ୍ତ ଓ ପୁଷ୍ପଲତା ମହାନ୍ତ । ନିଜ ଜୀବନକୁ ବାଜି ଲଗାଇ ଏହି ତିନି ମହିଳାଙ୍କୁ ବଂଚାଇ ଦେଇଥିଲେ ସାହାସୀ ବାଳକ ପଂକଜ । କେନ୍ଦୁଝର ଚମ୍ପୁଆ ବ୍ଳକ କାଟୁଳିକନା ଗାଁର ବୈଜୟନ୍ତୀ ମହାନ୍ତ ଗାଧୋଇବାକୁ ଯାଇଥିଲେ ବୈତରଣୀ ନଦୀକୁ । ଗାଧୋଉଥିବା ବେଳେ ଗୋଡ ଖସି ଯାଇଥିଲା ଚୋରାବାଲିରେ । ତାଙ୍କୁ ରକ୍ଷା କରିବା ପାଇଁ ସୁଜିତା ଓ ପୁଷ୍ପଲତା ପାଣି ଭିତରକୁ କୁଦି ପଡିଥିଲେ । ମାତ୍ର ତିନି ଜଣ ଯାକ ଗଣ୍ଡରେ ପଡି ଥଳ କୂଳ ପାଇନଥିଲେ ଆଉ ଜୀବନ ବିକଳରେ ସହାୟତା ଲାଗି ଚିକ୍ରାର କରିଥିଲେ । ଏତିକିବେଳେ ମାଆଙ୍କ ସହ ଗାଧୋଇବାକୁ ଆସିଥିବା ସାହାସୀ ପଂକଜ ଡେଇଁ ପଡିଥିଲେ ପାଣି ଭିତରକୁ । ନିଜ ଜୀବନକୁ ପରୱା ନକରି ଜଣକ ପରେ ଜଣେ ତିନି ଜଣକୁ ପହଁରି ପହଁରି କୂଳକୁ ଆଣିଥିଲେ । ସ୍ୱାଧୀନତା ଦିବସ ଅବସରରେ କେନ୍ଦ୍ରାପଡାର ୬ବର୍ଷର କୁନି ଝିଅ ମମତା ଦଳାଇ ଓ କେନ୍ଦୁଝରର ୧୪ ବର୍ଷର ଶିଶୁ ପଙ୍କଜ ମହାନ୍ତଙ୍କୁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ, ରାଷ୍ଟ୍ରପତି ପଦକ ପ୍ରଦାନ କରିଛନ୍ତି ।