ତୁଟୁନି ବିଜେଡି-ବୈଜୟନ୍ତ ଅଡୁଆ ! ସୁପ୍ରିମୋଙ୍କୁ ରିପୋର୍ଟ ଦେଲେ ପ୍ରମିଳା ମଲ୍ଲିକ । କହିଲେ, ସାଂସଦଙ୍କ ବିପକ୍ଷରେ ଆସିଛି ଅଧିକ ମତ
କନକ ବ୍ୟୁରୋ: ବିଜେଡି ସାଂସଦ ବୈଜୟନ୍ତ ପଣ୍ଡାଙ୍କ ବିରୋଧରେ କାର୍ଯ୍ୟାନୁଷ୍ଠାନ ସମ୍ଭାବନା ବଢିଲା । ତଦନ୍ତ ସାରି ବିଜେଡି ସୁପ୍ରିମୋ ତଥା ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁ ରିପୋର୍ଟ ଦେଇଛନ୍ତି ପ୍ରମିଳା ମଲ୍ଲିକ । ସୁପ୍ରିମୋଙ୍କୁ ରିପୋର୍ଟ ଦେବା ପରେ ନିଜ ପ୍ରତିକ୍ରିୟାରେ ପ୍ରମିଳା କହିଛନ୍ତି ସମସ୍ତ ସରପଂଚ, ସମିତିସଭ୍ୟ, ଜିଲ୍ଲାପରିଷଦ ସଦସ୍ୟ ଓ ସାଧାରଣ କର୍ମୀଙ୍କ ସହ ସେ ଆଲୋଚନା କରିଛନ୍ତି । ବୈଜୟନ୍ତଙ୍କ ବିରୋଧରେ ଅଧିକାଂଶ ମତ ଆସିଛି ।
Kanak News is now on WhatsApp
Join and get latest news updates delivered to you via WhatsApp
ଏମିତି ଏକ ପୃଷ୍ଠଭୂମିରେ ଗତକାଲି କେନ୍ଦ୍ରାପଡ଼ା ଜିଲ୍ଲା ବିଜେଡି ପର୍ଯ୍ୟବେକ୍ଷକ ପ୍ରମିଳା ମଲ୍ଲିକ ସାଂସଦ ଶ୍ରୀ ପଣ୍ଡାଙ୍କ ସଂପର୍କରେ ତାଙ୍କର ରିପୋର୍ଟ ହାଇକମାଣ୍ଡ ତଥା ବିଜେଡି ରାଜ୍ୟ ସଭାପତି ନବୀନ ପଟ୍ଟନାୟକଙ୍କୁ ପ୍ରଦାନ କରିଛନ୍ତି । ଗତକାଲି ରାତିରେ ଶ୍ରୀମତୀ ମଲ୍ଲିକ ନବୀନ ନିବାସ ଯାଇ ଏହି ରିପୋର୍ଟ ଦେଇଥିଲେ । ପରେ ସେ ଗଣମାଧ୍ୟମକୁ ପ୍ରତିକ୍ରିୟା ଦେଇ କହିଛନ୍ତି, ବିଭିନ୍ନ ବର୍ଗର ନେତାଙ୍କ ସହିତ ଆଲୋଚନା କରିଥିଲେ ଓ ଅଭିଯୋଗ ଆଣିଥିବା ନେତା ଓ କର୍ମୀଙ୍କ ସହିତ ବି କଥା ହୋଇଛନ୍ତି । ଗତକାଲି ସାଂସଦ ଶ୍ରୀ ପଣ୍ଡାଙ୍କ ସହ ତାଙ୍କର ଟେଲିଫୋନରେ କଥାବାର୍ତା ହୋଇଛି । ୨ ପୃଷ୍ଠାର ରିପୋର୍ଟରେ ବିଶଦ ତଥ୍ୟ ପ୍ରଦାନ କରାଯାଇଛି । ତେବେ ବୈଜୟନ୍ତ କର୍ମୀଙ୍କୁ ଅବହେଳା କରୁଥିବା ନେଇ ସେ ବେଶି ଅଭିଯୋଗ ପାଇଛନ୍ତି ଓ ତାଙ୍କ ସପକ୍ଷରେ କମ୍ ଲୋକ ଯୁକ୍ତି ରଖିଥିଲେ । ଶ୍ରୀମତୀ ମଲ୍ଲିକଙ୍କ ଏହି ମନ୍ତବ୍ୟ ସୂଚାଇ ଦେଇଛି ଯେ ରିପୋର୍ଟଟି ବୈଜୟନ୍ତଙ୍କ ସପକ୍ଷରେ ସମ୍ଭବତଃ ନାହିଁ। ଏଥିସହିତ ଏହି ପ୍ରସଙ୍ଗଟି ଏବେ ମୁଖ୍ୟମନ୍ତ୍ରୀଙ୍କ କୋର୍ଟକୁ ଯାଇଛି । ଅନ୍ୟତମ ପର୍ଯ୍ୟବେକ୍ଷକ ଉଷା ଦେବୀ ଏଯାଏ ନିଶ୍ଚିନ୍ତକୋଇଲି କିମ୍ବା ସାଲେପୁର ଯାଇନାହାନ୍ତି। ସମ୍ଭବତଃ ଆଜି ସେ ତଦନ୍ତ କରିବା ଲାଗି ଯିବେ । ଏହି ରିପୋର୍ଟ ମିଳିବା ପରେ ମୁଖ୍ୟମନ୍ତ୍ରୀ ତାଙ୍କ ନିର୍ଣ୍ଣୟ ରଖିପାରନ୍ତି ବୋଲି କୁହାଯାଉଛି ।
ତେବେ ବୈଜୟନ୍ତଙ୍କ କ୍ଷେତ୍ରରେ ସୃଷ୍ଟି ହୋଇଥିବା ବିବାଦ ସମାଧାନ ଲାଗି ସୁପ୍ରିମୋ କିଛି ବାଟ କାଢିବେ ନା ତାଙ୍କୁ ସବୁଦିନ ପାଇଁ ଦୂରେଇ ଦେବା ଲାଗି ବହିଷ୍କାର ପାଇଁ ନିର୍ଦେଶ ଦେବେ, ତାହାକୁ ନେଇ ଏବେ ସବୁ ମହଲରେ ଉତ୍ସୁକତା ପ୍ରକାଶ ପାଇଲାଣି । ତେବେ କୌତୂହଳର କଥା ହେଉଛି, ଯେଉଁ ଅଭିଯୋଗକୁ ଆଧାର କରି ଏ ବିବାଦଟି ବଢିବାରେ ଲାଗିଛି, ରିପୋର୍ଟ ଦେବା ପୂର୍ବରୁ ସେହି ତୃତୀୟ ମହଲା ଜାଲରେ ପର୍ୟ୍ୟବେକ୍ଷକ ଶ୍ରୀମତୀ ମଲ୍ଲିକ ଛନ୍ଦି ହୋଇଯାଇଛନ୍ତି । ସୋସିଆଲ ମିଡ଼ିଆରେ ଭାଇରାଲ୍ ହୋଇଥିବା ସ୍କ୍ରିନ୍ ସଟ୍ ତାଙ୍କୁ ଏଭଳି ଏକ ଅଡୁଆ ଭିତରକୁ ଟାଣି ନେଇଛି। ଶିବ ଏସ୍ ଦାସମହାପାତ୍ର ନାମକ ଜଣେ ବ୍ୟକ୍ତି ଟ୍ଵିଟ୍ ଜରିଆରେ ଛାଡିଥିବା ସ୍କ୍ରିନ୍ ସଟରେ ଗତକାଲି ଶ୍ରୀମତୀ ମଲ୍ଲିକ ସାଂସଦଙ୍କ ସହିତ କଥା ହେବା ପରେ ତୃତୀୟ ମହଲା ସହିତ ସଂପର୍କ ସ୍ଥାପନ କରିଥିବା କୁହାଯାଇଛି ।
ଗଣମାଧ୍ୟମକୁ ପ୍ରତିକ୍ରିୟା ଦେଇ ବିଜେଡି ମହିଳା ସଭାନେତ୍ରୀ ଆହୁରି କହିଛନ୍ତି, ଗତକାଲି ସେ ବୈଜୟନ୍ତଙ୍କ ସହ ଫୋନରେ ଆଲୋଚନା କରିଛନ୍ତି । ହାତରେ ସମୟ କମ୍ ଥିବାରୁ ଅଭିଯୋଗ ଲିଖିତ ଭାବେ ଦେଇ ପାରିବି ନାହିଁ ବୋଲି ସେ ସାଂସଦଙ୍କୁ ଜଣାଇଥିଲେ। କହିଥିଲେ, କର୍ମୀ ଓ ନେତାଙ୍କ ମଧ୍ୟରେ ଯାହା କିଛି ଦ୍ୱନ୍ଦ୍ୱ ରହିଛି, ସେ କଥାର ସମାଧାନ ଦଳ ସଭାପତି କରିବେ। ଘର କଥା ପଦାରେ ପଡ଼ିବା ଉଚିତ ନୁହେଁ । ତାଙ୍କର ଯଦି କିଛି କହିବାର ଅଛି ସଭାପତିଙ୍କୁ ଭେଟି କହିବା ଉଚିତ। ଫେସବୁକ ଓ ଟ୍ଵିଟରରେ ଏମିତି ମନ୍ତବ୍ୟ ଦେବା ଉଚିତ ନୁହେଁ । ସେପଟେ ବୈଜୟନ୍ତଙ୍କ ଟ୍ଵିଟ୍ ମାଡ଼ ଜାରି ରହିଛି । ସ୍କ୍ରିନ୍ ସଟ୍ ସଂପର୍କରେ ପ୍ରତିକ୍ରିୟା ରଖି ଟ୍ଵିଟରେ କହିଛନ୍ତି ଯେ ‘ଦାଲ୍ ମେ କୁଛ୍ କାଲା ହୈ’। ସେ ପୁଣି କହିଛନ୍ତି, ଦୋଷ ଥିଲେ ଫାଶୀ ପାଇଁ ପ୍ରସ୍ତୁତ। ଏକଥା ବି କହିଛନ୍ତି, ଯେଉଁମାନେ ତାଙ୍କ ସଂପର୍କରେ ଆଖିବୁଜା ଅଭିଯୋଗ ଆଣୁଛନ୍ତି, ସେମାନଙ୍କ ଉପରେ ତାଙ୍କର କୌଣସି ଅସନ୍ତୋଷ ନାହିଁ। ଏଥିସହିତ ତୃତୀୟ ମହଲାର ଇସାରାରେ ଏସବୁ କରାଯାଉଥିବା ନେଇ ସେ ପୁଣି ସଙ୍ଗିନ୍ ଅଭିଯୋଗ କରିଛନ୍ତି ।
କେନ୍ଦ୍ରାପଡ଼ା ଲୋକସଭା ନିର୍ବାଚନମଣ୍ଡଳୀର ଏହି ଚିତ୍ର ଏବେ ସମୁଦାୟ ରାଜ୍ୟର ବିଜେଡି ଚେହେରାକୁ ମଧ୍ୟ ପ୍ରଭାବିତ କରିପାରେ ବୋଲି ରାଜନୈତିକ ପର୍ଯ୍ୟବେକ୍ଷକ ମହଲ ବିଚାର କରୁଛନ୍ତି। ଏହି ମହଲର କହିବା କଥା ହେଉଛି, ବିଧାୟକ-ସାଂସଦଙ୍କ ମଧ୍ୟରେ ବର୍ଷ ବର୍ଷ ଧରି ଲାଗି ରହିଥିବା ଅସନ୍ତୋଷକୁ ପ୍ରଶମିତ କରିବାରେ ବିଜେଡି ବିଫଳ ହୋଇଛି । ବର୍ତମାନ କେନ୍ଦ୍ରାପଡାରେ କେବଳ ଏହାର ଭୟାନକ ରୂପ ଦେଖିବାକୁ ମିଳୁଛି। ଆସନ୍ତାଦିନରେ ଅନ୍ୟ ଜିଲ୍ଲାକୁ ଯେ ଏହା ନ ବ୍ୟାପିବ, ଏକଥାକୁ ପୂରା ଟାଳିଦେବା ଏବେଠାରୁ ମୁସ୍କିଲ୍ । ବରଂ କେନ୍ଦ୍ରାପଡ଼ାର ଏ ସମସ୍ୟାକୁ ଯଦି ସୁପ୍ରିମୋ ଠିକଣା ଢଙ୍ଗରେ ମୁକାବିଲା କରିପାରିବେ, ତେବେ ଅନ୍ୟ ସବୁ ସ୍ଥାନରେ ରହିଥିବା ଅସନ୍ତୋଷ ମିଳାଇଯିବା ସମ୍ଭାବନା ଅଧିକ ।
ସେପଟେ ଅନ୍ୟତମ ପର୍ଯବେକ୍ଷକ ଉଷା ଦେବୀ ଆଜି ନିଶ୍ଚିନ୍ତକୋଇଲି କିମ୍ବା ସାଲେପୁର ଯାଇପାରନ୍ତି । ଏହାପରେ ସୁପ୍ରିମୋ ବୈଜୟନ୍ତଙ୍କ ଉପରେ କିଛି ନିଷ୍ପତି ନେଇପାରନ୍ତି । ବୈଜୟନ୍ତ ପଣ୍ଡା ନିଶ୍ଚିନ୍ତକୋଇଲିରେ ଏକ ପାଣିଟାଙ୍କି ଉଦଘାଟନ କରିବାକୁ ନେଇ ଆରମ୍ଭ ହୋଇଥିଲା ପୁରା ବିବାଦ । କେନ୍ଦ୍ରାପଡା ଓ କଟକରୁ ପୃଥକ ପୃଥକ ଭାବେ ନେତା ଓ କର୍ମୀ ଆସି ତାଙ୍କ ବିରୋଧରେ ଫେରାଦ ହୋଇଥିଲେ । ନବୀନଙ୍କୁ ଭେଟି ସାଂସଦ, ଦଳୀୟ କର୍ମୀଙ୍କ ବିନା ପରାମର୍ଶରେ ମନମୁଖୀ କାମ କରୁଥିବା ଅଭିଯୋଗ ବାଢିଥିଲେ । ଏହାପରେ ସାଂସଦଙ୍କ ବିରୋଧରେ ଆସିଥିବା ଅଭିଯୋଗର ତଦନ୍ତ ପାଇଁ ଦୁଇ ବରିଷ୍ଠ ନେତ୍ରୀ ପ୍ରମିଳା ମଲ୍ଲିକ ଓ ଉଷା ଦେବୀଙ୍କୁ ଦାୟିତ୍ୱ ଦେଇଥିଲେ ନବୀନ ପଟ୍ଟନାୟକ ।