ରାସ୍ତା ନାହିଁ ତ ଭୋଟ୍ ନାହିଁ ! ମାଲକାନଗିରିରେ ଗାଁର ପ୍ରଶାସନିକ ଅଧିକାରୀଙ୍କୁ ଘେରି ଭୋଟ୍ ବର୍ଜନ ଚେତାବନୀ ଦେଲେ ୭ଟି ଗାଁର ଲୋକେ
କନକ ବ୍ୟୁରୋ : ଆଣ୍ଠେଇଛି ପ୍ରଧାନମନ୍ତ୍ରୀ ଗ୍ରାମ ସଡକ ଯୋଜନା । ବର୍ଷ ବର୍ଷ ଧରି ଶେଷ ହୋଇପାରୁନାହିଁ ରାସ୍ତା ନିର୍ମାଣ । ମାଲକାନଗିରି ସହର ଉପକଣ୍ଠରେ ଥିବା ଗୌଡଗୁଡା ନିର୍ମାଣଧୀନ ରାସ୍ତାର ଅବସ୍ଥା ବେଶ୍ ଦୟନୀୟ । ନିର୍ବାଚନ ପରେ ନିର୍ବାଚନ ବିତି ଯାଉଥିଲେ ହେଁ ଗାଁକୁ ରାସ୍ତା ଟିଏ ନିର୍ମାଣ ହୋଇ ପାରୁ ନ ଥିବାରୁ ଏଥର ଭୋଟ ବର୍ଜନର ଚରମ ନିଷ୍ପତି ନେଇଛନ୍ତି ୭ଟି ଗାଁର ଲୋକେ । ଉତ୍ୟକ୍ତ ଗ୍ରାମବାସୀ ବିଭାଗୀୟ ଅଧିକାରୀଙ୍କୁ ଘେରି ୧୦ ଦିନ ଭିତରେ ରାସ୍ତା ନିର୍ମାଣ ଲାଗି ଚେତାବନୀ ଦେବା ସହ ଯନ୍ତ୍ରୀଙ୍କୁ ଗାଁରୁ ଘୋଉଡାଇ ଦେଇଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ବର୍ଷ ବର୍ଷ ଧରି ରାସ୍ତା ନିର୍ମାଣ ସରୁନଥିବାରୁ ମାଲକାନଗିରି ସଦର ବ୍ଲକ ଗୌଡଗୁଡା ପଂଚାୟତବାସୀଙ୍କୁ ଭୋଟ ବର୍ଜନ ନିଷ୍ପତି । ମାଲକାନଗିରି ସହରରୁ ମାତ୍ର ୨ କିଲୋମିଟର ଦୂରରେ ଥିବା ଗୌଡଗୁଡା ପଂଚାୟତର ଲୋକ ଯାତାୟାତ ପାଇଁ ପ୍ରତି ଦିନ ସଂଘର୍ଷ କରୁଛନ୍ତି । ୫ ବର୍ଷ ହେବ ଗାଁକୁ ସଂଯୋଗ ପାଇଁ ରାସ୍ତା ନିର୍ମାଣ ଚାଲିଛି ଯେ, ଶେଷ ହେବାର ନାହିଁ, ତେଣୁ ଦୁର୍ଦ୍ଦଶା ଭୋଗିବାକୁ ପଡୁଥିବା ଲୋକେ ଅଭିଯୋଗ କରିଛନ୍ତି ।
ଏହି ରାସ୍ତା ଦେଇ ଖରା ବର୍ଷା ସବୁ ଦିନ ଦୟନୀୟ ଅବସ୍ଥାରେ ଯାତାୟତ କରିଥାନ୍ତି ଗୌଡଗୁଡା ସମେତ ଏମ.ଭି -୯, ଏମ-ଭି ୧୦ ପରି ୭ ଟି ଗାଁର ଜନତା । ରାସ୍ତା ନିର୍ମାଣ କାମ ସାରିବା ପାଇଁ ଗ୍ରାମବାସୀ ଜିଲ୍ଲାପାଳଙ୍କ ଠାରୁ ଆରମ୍ଭ କରି ବିଭାଗୀୟ ଯନ୍ତ୍ରୀଙ୍କୁ ବାରମ୍ବାର ଜଣାଇ ନିରାସ ହେବା ପରେ ଚଳିତ ଭୋଟ୍ ବର୍ଜନ ନିଷ୍ପତି ନେଇଛନ୍ତି । ଆଉ ଗାଁକୁ ଆସିଥିବା ପ୍ରଶାସନିକ ଅଧିକାରୀଙ୍କୁ ଘେରିବା ସହ ଗାଁରୁ ତଡି ଦେଇଛନ୍ତି ।
୧. ୫ ବର୍ଷ ତଳେ ମାଲକାନଗିରି ମଶାଣି ନିିକଟସ୍ଥ ପି.ଡବ୍ଲୁ.ଡି ମୁଖ୍ୟ ରାସ୍ତା ଠାରୁ ଗୌଡଗୁଡା ଏବଂ କୌଇଲିପାରିକୁ ସଂଯୋଗ କରିବା ଉଦ୍ଦେଶ୍ୟ ରାସ୍ତା କାମ ଆରମ୍ଭ ହୋଇଥିଲା ।
୨. ୨୦୧୩-୧୪ ଆର୍ଥିକ ବର୍ଷରେ ପ୍ରଧାନମନ୍ତ୍ରୀ ଗ୍ରାମ୍ୟ ସଡକ ଯୋଜନାରେ ୫ କିଲୋମିଟର ରାସ୍ତା ପାଇଁ ୫ କୋଟି ୬୫ ଲକ୍ଷ ଟଙ୍କାର କାର୍ଯ୍ୟାଦେଶ ମାଲକାନଗିରିର ଜଣେ ଠିକାଦାରଙ୍କୁ ଦିଆଯାଇଥିଲା ।
୩. ଗ୍ରାମ୍ୟ ଉନ୍ନୟନ ବିଭାଗ ତତ୍ୱାବଧାନରେ ରାସ୍ତା କାମ ଚାଲିଥିବା ବେଳେ କାମ ଅଧାରୁ ଅଧା ଟଙ୍କା ନେଇ ଫେରାର ଠିକାଦାର ।
ତେବେ ନିର୍ବାଚନ ପୂର୍ବରୁ ରାସ୍ତା ନିର୍ମାଣ କାମ ଶେଷ ହେବ ବୋଲି କହିଛନ୍ତି ଗ୍ରାମ୍ୟ ଉନ୍ନୟନ ବିଭାଗର ସହକାରୀ ଯନ୍ତ୍ରୀ । ଗତ ୨୦୧୪ ସାଧାରଣ ନିର୍ବାଚନ ଓ ୨୦୧୭ ପଂଚାୟତ ନିର୍ବାଚନ ବର୍ଜନ ଲାଗି ମଧ୍ୟ ଧମକ ଦେଇଥିଲେ ଗ୍ରାମବାସୀ । ଆଉ ପ୍ରଶାସନିକ ଅଧିକାରୀ ଓ ରାଜନେତାଙ୍କ ପ୍ରତିଶ୍ରୁତିକୁ ଭରସା କରି ଭୋଟ୍ ଦେଇଥିଲେ । ହେଲେ ଏଥର ଆଉ ପ୍ରତିଶ୍ରୁତି ନୁହେଁ କାମ ନଦେଖିଲେ ଭୋଟ୍ ଦେବେ ନାହିଁ କି ନେତାଙ୍କୁ ପ୍ରଚାର ପାଇଁ ଗାଁକୁ ପୂରେଇ ଦେବେ ନାହିଁ ବୋଲି ଚେତାବନୀ ଦେଇଛନ୍ତି ଗ୍ରାମବାସୀ ।