ମିଶନ ଶକ୍ତି ସଦସ୍ୟାଙ୍କୁ ସରକାର ଦେବେ ସ୍ମାର୍ଟ ଫୋନ: ମେକ ଇନ ଓଡିଶା କନକ୍ଲେଭରେ ମୁଖ୍ୟମନ୍ତ୍ରୀଙ୍କ ଘୋଷଣା
ନବୀନ କହିଲେ,ମହିଳାଙ୍କୁ ଲୋନ ଦେବା ପାଇଁ ବ୍ୟାଙ୍କ ମଧ୍ୟରେ ଚାଲିଛି ପ୍ରତିଯୋଗିତା
କନକ ବ୍ୟୁରୋ: ମୁଖ୍ୟମନ୍ତ୍ରୀଙ୍କ ଫୋକସରେ ମହିଳା । ମିଶନ ଶକ୍ତି ସଦସ୍ୟାଙ୍କୁ ସରକାର ଦେବେ ସ୍ମାର୍ଟ ଫୋନ । ମେକ ଇନ ଓଡିଶା କନକ୍ଲେଭରେ ମୁଖ୍ୟମନ୍ତ୍ରୀ ଏନେଇ ଘୋଷଣା କରିଛନ୍ତି । ଏହ ଅବସରରେ ମୁଖ୍ୟମନ୍ତ୍ରୀ କହିଛନ୍ତି, ମହିଳାଙ୍କ ଲାଇଫ ଏକ୍ସପେଟେନ୍ସି ବା ବଂଚିବାର ସମୟ ସୀମା ୧୦ ବର୍ଷ ପର୍ଯ୍ୟନ୍ତ ବୃଦ୍ଧି ପାଇଛି । ମାତୃ ମୃତ୍ୟୁ ହାର କମିବା ସହ ମହିଳା ସଶକ୍ତିକରଣ ଯୋଗୁ ମହିଳାଙ୍କ ବଂଚିବାର ସମୟସୀମା ବୃଦ୍ଧି ପାଇଛି ବୋଲି ନବୀନ କହିଛନ୍ତି । ମିଶନ ଶକ୍ତି ପର୍ଯ୍ୟାୟକ୍ରମେ ସଫଳ ହେବାରେ ଲାଗିଛି । ଯେଉଁଥିପାଇଁ ମହିଳାଙ୍କୁ ଲୋନ ଦେବା ପାଇଁ ବ୍ୟାଙ୍କ ମଧ୍ୟରେ ପ୍ରତିଯୋଗିତା ଚାଲିଛି ।
Kanak News is now on WhatsApp
Join and get latest news updates delivered to you via WhatsApp
ଅନ୍ୟପକ୍ଷେ ମେକ ଇନ ଓଡିଶାର ତୃତୀୟ ସଂସ୍କରଣରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ କହିଛନ୍ତି, ଚଳିତ ବର୍ଷର କନକ୍ଲେଭ ରେକର୍ଡ କରିଛି । ଏଥିରେ ମୋଟ ୪ ଲକ୍ଷ ୧୯ ହଜାର ୫୭୪ କୋଟି ଟଙ୍କାର ପୁଂଜି ନିବେଶର ପ୍ରସ୍ତାବ ଆସିଛି । ବିଭିନ୍ନ କ୍ଷେତ୍ରରେ ଏହି ନିବେଶ ଫଳରେ ୫ ଲକ୍ଷ ୯୧ ହଜାର ନୂଆ ନିଯୁକ୍ତି ସମ୍ଭାବନା ସୃଷ୍ଟି ହେବ ବୋଲି କହିଛନ୍ତି ମୁଖ୍ୟମନ୍ତ୍ରୀ । ଏହି କାର୍ଯ୍ୟକ୍ରମରେ ଦେଶର ବଡ ବଡ ଶିଳ୍ପପତି ଏବଂ ୧୯ଟି ଦେଶର ପ୍ରତିନିଧି ଯୋଗ ଦେଇଥିଲେ ।
ଅନ୍ୟପଟେ ଜାପାନ କାର୍ଯ୍ୟକ୍ରମର ସହଯୋଗୀ ରାଷ୍ଟ୍ର ଭାବେ ସାମିଲ ହୋଇଥିବାରୁ ନବୀନ ଧନ୍ୟବାଦ ଜଣାଇଛନ୍ତି । ରାଜ୍ୟରେ ଦକ୍ଷତା ବିକାଶ ହେଉଥିବା ବେଳେ ଆଗାମୀ ଦିନରେ ଏହା ପୂର୍ବ ଭାରତର ମାନୁଫାକ୍ଚରିଂ ହବ୍ ହେବ ବୋଲି ଆଶା ପ୍ରକାଶ କରିଛନ୍ତି ମୁଖ୍ୟମନ୍ତ୍ରୀ । ମେକ୍ ଇନ୍ ଓଡିଶାର ତୃତୀୟ ସଂସ୍କରଣ ଆସନ୍ତା ୨୦୨୦ ନଭେମ୍ବର ୩୦ରୁ ଡିସେମ୍ବର ୪ ଯାଏଁ ହେବ ବୋଲି ଘୋଷଣା କରିଛନ୍ତି ନବୀନ ପଟ୍ଟନାୟକ ।
ଚଳିତ କନକ୍ଲେଭରେ ଶ୍ରେଷ୍ଠ ନିବେଶକାରୀ ହେଉଛି, ହଲଦିଆ ପେଟ୍ରୋ କେମିକାଲ । ଏହି ସଂସ୍ଥା ୭୦ ହଜାର କୋଟି ନିବେଶ କରିବା ସମ୍ଭାବନା ରହିଛି । ଜେଏସପିଏଲ ମୋଟ ୬୦ ହଜାର ୯୫୦ କୋଟି ଟଙ୍କା, ମହାନଦୀ କୋଲଡ ଫିଲ୍ଡ ଲିମିଟେଡ ୫୮ହଜାର ୯୯୭ କୋଟି ଟଙ୍କା ଓଡିଶାରେ ପୁଂଜି ନିବେଶ କରିବା ପାଇଁ ଘୋଷଣା କରିଛନ୍ତି । ତାଇୱାନ୍ର ଏକ କମ୍ପାନୀ ୪୩ ହଜାର କୋଟି ଏବଂ ସେଲ୍ ୪୧ ହଜାର ୪୦୦ କୋଟି ଟଙ୍କା ନିବେଶ କରିବା ନେଇ ପ୍ରସ୍ତାବ ଦେଇଥିବା ଜଣାପଡିଛି ।