ରାଜ୍ୟ ପୋଲିସର ନୁଆ ମୁଖିଆ ହୋଇଛନ୍ତି ରାଜେନ୍ଦ୍ର ପ୍ରସାଦ ଶର୍ମା । କେବି ସିଂଙ୍କ ସ୍ଥାନରେ ସେ ଦାୟିତ୍ୱ ତୁଲାଇବେ । ଭିଜିଲାନସ ଡିଜି ଭାବେ ସେ ବର୍ତ୍ତମାନ ଦାୟିତ୍ୱ ତୁଲାଉଥିଲେ । ୧୯୮୬ ବ୍ୟାଚର ଏହି ଆଇପିଏସ ଅଫିସର ନବୀନଙ୍କ ବିଶ୍ୱାସ ଜିତିଛନ୍ତି । ୨୦୧୬ରୁ ଡାକ୍ତର ଶର୍ମା ଭିଜିଲାନସ ଡିଜି ଭାବେ ଦାୟିତ୍ୱ ତୁଲାଉଛନ୍ତି । ଜଣେ ଦକ୍ଷ ଓ ସଚ୍ଚୋଟ ଅଫିସର ଭାବେ ନିଜ ପାଇଁ ସ୍ୱତନ୍ତ୍ର ସ୍ଥାନ ତିଆରି କରିଛନ୍ତି ରାଜେନ୍ଦ୍ର ଶର୍ମା । ଅଗଷ୍ଟ ୨୦୧୩ରୁ ଜାନୁୟାରୀ ୨୦୧୬ ଯାଏଁ ଡାକ୍ତର ଶର୍ମା ପୋଲିସ କମିଶନର ଭାବେ ଦାୟିତ୍ୱ ତୁଲାଇଥିବା ବେଳେ, ଏହାପରେ ସେ ହୋଇଥିଲେ ଭିଜିଲାନସ ଡିଜି ।
Kanak News is now on WhatsApp
Join and get latest news updates delivered to you via WhatsApp
ଆର. ପି. ଶର୍ମାଙ୍କୁ ପୁରସ୍କାର
ଭିଜିଲାନସ ଡିଜି ଭାବେ ଦାୟିତ୍ୱ ନେବାପରେ ଏକାଧିକ ପଦକ୍ଷେପ ନେଇ ବେଶ ଚର୍ଚ୍ଚାରେ ଥିଲେ ଆର. ପି. ଶର୍ମା । ଖାସ କରି ଦୁର୍ନୀତିଗ୍ରସ୍ତ ଅଧିକାରୀଙ୍କ ଘରେ ରେଡ କରିବା ଏବଂ ଲାଂଚୁଆ ଅଧିକାରୀଙ୍କ ବିରୋଧରେ ପଦକ୍ଷେପ ନେବା ତାଙ୍କ ପାଇଁ ଏକ ସ୍ୱତନ୍ତ୍ର ପରିଚୟ ସୃଷ୍ଟି କରିଥିଲା । ଏପରିକି ତାଙ୍କ ସମୟରେ ଭିଜିଲାନସ ଅଧିକ କ୍ରିୟାଶୀଳ ହୋଇଥିବାର ମଧ୍ୟ ଦେଖିବାକୁ ମିଳିଥିଲା । ଖାଲି ସେତିକି ନୁହେ, ଜଣେ ସଚ୍ଚୋଟ ଓ ଦକ୍ଷ ପୋଲିସ ଭାବେ ସେ ମୁଖ୍ୟମନ୍ତ୍ରୀଙ୍କ ବିଶ୍ୱାସ ଭାଜନ ହୋଇପାରିଥିଲେ ।
ପିସି କାରବାର ବିରୋଧରେ ମୁହିମ ଆରମ୍ଭ କରିଥିଲେ ଡାକ୍ତର ଶର୍ମା । ପିସି ବନ୍ଦ କରିବାକୁ ମୁଖ୍ୟମନ୍ତ୍ରୀ ନିର୍ଦ୍ଦେଶ ଦେବାପରେ ଭିଜିଲାନସ ବେଶ କ୍ରିୟାଶୀଳ ହୋଇଥିଲା । ବିଭିନ୍ନ ସ୍ଥାନରେ ରେଡ କରିବା ସହ ଅନେକ ଅଧିକାରୀଙ୍କ ବିରୋଧରେ ମାମଲା ରୁଜ୍ଜୁ କରି ତଦନ୍ତ ଆଗକୁ ବଢାଇଥିଲେ । ଏହାପରେ ଅନେକ ସ୍ଥାନରେ ପିସି କାରବାର ବନ୍ଦ ହୋଇଥିଲା । ଏହାର ଶ୍ରେୟ ଯାଇଥିଲା ଡାକ୍ତର ଶର୍ମାଙ୍କ ପାଖକୁ । ଏପରିକି ପିସି ମାଗିଲେ ଘଂଟି ବଜାଇବାକୁ ଅଭିଯାନ ସେ ଆରମ୍ଭ କରିଥିଲେ । ଦୁର୍ନୀତିକୁ ବରଦାସ୍ତ କରାଯିବନି ବାର୍ତ୍ତା ନେଇ କାର୍ଯ୍ୟ କରିଥିବା ଆର. ପି. ଶର୍ମାଙ୍କୁ ଶେଷରେ ନବୀନ ପୁରସ୍କୃତ କରିଛନ୍ତି ।
ଆର. ପି. ଶର୍ମାଙ୍କ କ୍ୟାରିୟର
୧୯୮୬ ବ୍ୟାଚର ଆଇପିଏସ ଡାକ୍ତର ରାଜେନ୍ଦ୍ର ପ୍ରସାଦ ଶର୍ମା ଏସଡିପିଓ ରାୟଗଡା, ଏସଡିପିଓ ନବରଙ୍ଗପୁର, ଆଡିସନାଲ ଏସପି ଭୁବନେଶ୍ୱର, ଏସପି କଳାହାଣ୍ଡି, ଏସପି ବ୍ରହ୍ମପୁର ଭାବେ ଦାୟିତ୍ୱ ତୁଲାଇବା ପରେ ୧୯୯୭ରେ ହାଇତିକୁ ୟୁଏନ ସପର୍ଟ ମିଶନରେ ଯାଇଥିଲେ । ୯ ମାସ ପରେ ଡେପୁଟସେନରୁ ଫେରିବା ପରେ ଏସପି ଢେଙ୍କାନାଳ, ଏସପି ବାଲେଶ୍ୱର, କ୍ରାଇମବ୍ରାଂଚ ଡିଆଇଜି ଓ ଅନ୍ୟ କିଛି ବିଭାଗରେ ଦାୟିତ୍ୱ ତୁଲାଇ ୨୦୦୪ରେ ଯାଇଥିଲେ କେନ୍ଦ୍ରୀୟ ଡେପୁଟସେନରେ । ନ୍ୟାସନାଲ ସିକ୍ୟୁରିଟି ଗାର୍ଡର ଡିଆଇଜି ଓ ଆଇଜି ଭାବେ ଦାୟିତ୍ୱ ତୁଲାଇବା ପରେ ୨୦୧୩ରେ ଫେରିଥିଲେ ଓଡିଶା । ଆଡିସନାଲ ଡିଜି ଭାବେ କଟକ-ଭୁବନେଶ୍ୱର କମିଶନରେଟର ସେ ହୋଇଥିଲେ ପୋଲିସ କମିଶନର । ୧୨ ଅଗଷ୍ଟ ୨୦୧୩ରୁ ୨୭ ଜାନୁୟାରୀ ୨୦୧୬ ଯାଏଁ ଡାକ୍ତର ଶର୍ମା ଏହି ଦାୟିତ୍ୱରେ ଥିଲେ । ଏହାପରେ ତାଙ୍କର ପଦୋନ୍ନତି ଡିଜି ରାଙ୍କକୁ ହୋଇଥିଲା । ୨୭ ଜାନୁୟାରୀ ୨୦୧୬ରୁ ସେ ଭିଜିଲାନସ ଡିଜି ଭାବେ ଦାୟିତ୍ୱ ତୁଲାଇଥିଲେ ।
କେ. ବି. ସିଂଙ୍କୁ ଅପମାନ
ବ୍ୟବସ୍ଥା ଭିତ୍ତିରେ ସରକାରୀ ସ୍ଥରରେ ପରିବର୍ତ୍ତନ ଏକ ନିୟମିତ ପ୍ରକ୍ରିୟା । ହେଲେ ଯେଉଁଭଳି ଢଙ୍ଗରେ କେ. ବି.ସିଂଙ୍କୁ ବଦଳି କରାଗଲା, ତାହା ଅନେକ ପ୍ରଶ୍ନବାଚୀ ତିଆରି କରିଛି । ଯେତବେେଳେ ସମ୍ବଲପୁରରେ ପୋଲିସ ଡିଜି ଭାବେ ସେ ମାଓଦମନ ରଣନୀତି ତିଆରି କରୁଥିଲେ, ଠିକ ସେହି ସମୟରେ ବଦଳି କରାଗଲା ତାଙ୍କୁ । ଅର୍ଥାତ୍, ବୈଠକ ଆଗରୁ ସେ ଥିଲେ ପୋଲିସ ଡିଜି, ଆଉ ବୈ÷ଠକ ଶେଷ ବେଳକୁ ସେ ହୋଇଗଲେ ଓଏସଆରଟିସି ସିଏମଡି । ପୋଲିସ ଡିଜି ପଦରୁ ତାଙ୍କୁ ଅବ୍ୟାହତି ଦିଆଯାଇ ଓଏସଆରଟିସି ସିଏମଡି ଭାବେ ଦାୟିତ୍ୱ ଦିଆଯାଇଛି ।
କନୱର ବ୍ରଜେଶ ସିଂ । ୧୯୮୫ ବ୍ୟାଚର ଏହି ଆଇପିଏସ ନଭେମ୍ବର ୮, ୨୦୧୫ରେ ପୋଲିସ ଡିଜି ଭାବେ ଦାୟିତ୍ୱ ଗ୍ରହଣ କରିଥିଲେ । ତକ୍ରାଳୀନ ପୋଲିସ ଡିଜି ସଂଜୀବ ମାରିକ ବିବାଦ ଘେରକୁ ଆସିବା ପରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ କେ. ବି. ସିଙ୍କୁ ଦାୟିତ୍ୱ ଦେଇଥିଲେ । ସେତେବେଳେ ମୁଖ୍ୟମନ୍ତ୍ରୀଙ୍କ ଅତ୍ୟନ୍ତ ବିଶ୍ୱସ୍ତ ବୋଲି ତାଙ୍କୁ ବିବେଚନା କରାଯାଉଥିଲା । ଏପରିକି ପ୍ରକାଶ ମିଶ୍ର ମାମଲାରେ ତାଙ୍କ କାର୍ଯ୍ୟଶେଳୀ ଓ ହାଇକୋର୍ଟଙ୍କ ଦ୍ୱାରା ଭର୍ସିତ ହେବା ସେତେବେଳେ ବେଶ ଚର୍ଚ୍ଚାର ବିଷୟ ହୋଇ ରହିଥିଲା । ସେତେବେଳେ ଅତ୍ୟନ୍ତ ବିଶ୍ୱସ୍ତ ଥିବା କେ. ବି. ସିଂ ହଠାତ କେଉଁଭଳି ଆଜି ନବୀନଙ୍କ ପାଇଁ ଅଲୋଡା ହୋଇଗଲେ, ତାହା ଅନେକ ପ୍ରଶ୍ନବାଚୀ ସୃଷ୍ଟି କରିଛି ।
ଅନ୍ୟ ପରିବର୍ତ୍ତନ
ପୋଲିସର ଶୀର୍ଷ ସ୍ତରରେ ହୋଇଥିବା ଅଦଳବଦଳ ମଧ୍ୟ ଅନେକ ଚର୍ଚ୍ଚାର ଦିଗକୁ ସାମ୍ନାକୁ ଆଣିଛି । କ୍ରାଇମବ୍ରାଂଚ ଡିଜି ବିଜୟ ଶର୍ମାଙ୍କୁ ମଧ୍ୟ ବଦଳି କରାଯାଇଛି । ୧୯୮୬ ବ୍ୟାଚର ଏହି ଆଇପିଏସଙ୍କୁ ଡିଜି ପ୍ରିଜନ୍ ଭାବେ ଦାୟିତ୍ୱ ଦିଆଯାଇଛି । ପାୱାର କରିଡର ସହ ବେଶ ଭଲ ସଂପର୍କରେ ସର୍ବଦା ରହୁଥିବା ବିଜୟ ଶର୍ମାଙ୍କ ଏଭଳି ବଦଳି ମଧ୍ୟ ଅନେକଙ୍କୁ ଚକିତ କରିଛି । କାରଣ ଅତୀତରେ ଅନେକ ନଜିର ରହିଛି, ଯେତେବେଳେ ଗୁରୁତ୍ୱପୁର୍ଣ୍ଣ ମାମଲାର ତଦନ୍ତ ଭାର କ୍ରାଇମବ୍ରାଂଚକୁ ଦିଆଯାଉଥିଲା । ରାଜ୍ୟ ସରକାରଙ୍କୁ ଅଡୁଆରେ ପକାଇଥିବା ଅନେକ ପ୍ରସଙ୍ଗର ତଦନ୍ତ ଭାର ଆସିଥିଲା ବିଜୟ ଶର୍ମାଙ୍କ ହାତକୁ । ହେଲେ ଏହି ଅଦଳବଦଳରେ ତାଙ୍କୁ ଡିଜି ପ୍ରିଜନ ଦାୟିତ୍ୱ ଦେବା ଅନେକଙ୍କୁ ଆଶ୍ଚର୍ଯ୍ୟ କରିଛି ।
ଶୀର୍ଷ ସ୍ତରରେ ହୋଇଥିବା ଅଦଳବଦଳରେ, ଅରୁଣ ରାୟଙ୍କୁ ଆଡିସନାଲ ଡିଜି ହେଡକ୍ୱାର୍ଟର ଦାୟିତ୍ୱ ମିଳିଛି । ତେବେ ବଡ କଥା ହେଉଛି, ରାଜ୍ୟ ପୋଲିସର ଆଉ ଦୁଇଟି ବଡ ପଦବୀକୁ ରାଜ୍ୟ ସରକାର ଖାଲି ରଖିଛନ୍ତି । ଉଭୟ କ୍ରାଇମବ୍ରାଂଚ ଓ ଭିଜିଲାନସ ଡିଜି କିଏ ହେବ, ତାକୁ ନେଇ ମଧ୍ୟ ପାୱାର କରିଡରରେ ଚର୍ଚ୍ଚା ଆରମ୍ଭ ହୋଇଛି । ସୂଚନା ଅନୁସାରେ, ୧୯୯୧ ବ୍ୟାଚର ଆଇପିଏସ ଦେବାଶିଷ ପାଣିଗ୍ରାହୀ, ଏଡିଜି ଭିଜିଲାନସ ଭାବେ ଦାୟିତ୍ୱ ତୁଲାଇବେ । ତେଣୁ ଆଗାମୀ ଦିନରେ କ୍ରାଇମବ୍ରାଂଚ ଡିଜି ଓ ଭିଜିଲାନସ ଡିଜି କିଏ ହେବ, ତାହା ମଧ୍ୟ ପାୱାର କରିଡରରେ ବଡ ପ୍ରଶ୍ନବାଚୀ ତିଆରି କରୁଛି ।
ଡିଜିଙ୍କ ବିବାଦୀୟ ବିଦାୟ
କେ. ବି. ସିଂଙ୍କ ବଦଳି ଖାଲି ବିବାଦୀୟ ହୋଇଛି ତାହା ନୁହେଁ । ପୂର୍ବରୁ ଅନେକ ଡିଜିଙ୍କ ବଦଳି ମଧ୍ୟ ବିବାଦୀୟ ହୋଇଛି । ପ୍ରକାଶ ମିଶ୍ର ୨୦୧୪ ନିର୍ବାଚନ ସମୟରେ ଡିଜି ଥିବା ବେଳେ, ନିର୍ବାଚନ ବେଳେ ବିପୁଳ ଟଙ୍କା ଜବତ କରିବା ତାଙ୍କ ପାଇଁ ମହଙ୍ଗା ପଡିଥିଲା । ଏପରିକି ଖୋଲାଖୋଲି ସେ ଗଣମାଧ୍ୟମରେ ବୟାନ ମଧ୍ୟ ରଖିଥିଲେ । ଆଉ ଏହାପରେ ତାଙ୍କୁ ବିବାଦୀୟ ଢଙ୍ଗରେ ପୋଲିସ ଡିଜି ପଦରୁ ହଟାଇ ଦିଆଯାଇଥିଲା । ଓଏସଆରଟିସି ସିଏମଡି ଭାବେ ତାଙ୍କୁ ବଦଳି କରାଯିବା ସହ ତାଙ୍କ ବିରୋଧରେ ପୁରୁଣା ମାମଲା ଖୋଲାଯାଇଥିଲା । ସେତେବେଳେ ଭିଜିଲାନସ ଦାୟିତ୍ୱରେ ଥିବା କେ. ବି ସିଂ ମାମଲା ରୁଜ୍ଜୁ କରିବା ସହ ତଦନ୍ତ ମଧ୍ୟ ଆରମ୍ଭ କରିଥିଲେ । ଯାହାକୁ ନେଇ ପରବର୍ତ୍ତୀ ପର୍ଯ୍ୟାୟରେ ହାଇକୋର୍ଟ କେ. ବି. ସିଂଙ୍କୁ ଭର୍ସନା ମଧ୍ୟ କରିଥିଲେ ।
ପ୍ରକାଶ ମିଶ୍ରଙ୍କ ପରେ ପୋଲିସ ଡିଜି ହୋଇଥିଲେ ସଂଜୀବ ମାରିକ । ହେଲେ ମାରିକଙ୍କୁ ମଧ୍ୟ ଅପମାନଜନକ ଭାବେ ପୋଲିସ ଡିଜି ପଦରୁ ହଟାଇ ଦିଆଯାଇଥିଲା । ନବକଳେବର ସମୟରେ ଦଇତାପତିଙ୍କ ପାଦ ଛୁଇଁ ବିବାଦୀୟ ହୋଇଥିଲେ ସଂଜୀବ ମାରିକ । ହେଲେ ମୁଖ୍ୟମନ୍ତ୍ରୀଙ୍କ କାର୍ଯ୍ୟାଳୟ ସହ ମୁହାଁମୁହିଁ ହୋଇଥିଲେ । ଯେତେବେଳେ ୪୭ ଜଣ ଅଧିକାରୀଙ୍କ ବଦଳି ନେଇ ସ୍ଥିତି ବିବାଦୀୟ ହୋଇଥିଲା । ତୁରନ୍ତ ସଂଜୀବ ମାରିକଙ୍କୁ ଛୁଟିରେ ଯିବାକୁ ସରକାର ନିର୍ଦ୍ଦେଶ ଦେଇଥିଲେ । ଆଉ ପରବର୍ତ୍ତୀ ପର୍ଯ୍ୟାୟରେ ତାଙ୍କୁ ଓଏସଆରଟିସି ସିଏମଡି ଭାବେ ଦାୟିତ୍ୱ ଦେଇଥିଲେ । ସଂଜୀବ ମାରିକଙ୍କ ପରେ କେ. ବି. ସିଂଙ୍କୁ ମିଳିଥିଲା ପୋଲିସ ଡିଜି ପଦ ।
କେ. ବି. ସିଂଙ୍କୁ ଦାୟିତ୍ୱରୁ ହଟାଇବା ମଧ୍ୟ ବେଶ ବିବାଦୀୟ ହୋଇପଡିଛି । ସମ୍ବଲପୁରରେ ମାଓ ବିରୋଧୀ ରଣନୀତି ନେଇ ଯେତେବେଳେ ସେ ବୈଠକ ନେଉଥିଲେ, ସେତେବେଳେ ବଦଳି ନେଇ ଅର୍ଡର ବାହାରିଛି । କେ. ବି. ସିଂଙ୍କୁ ମଧ୍ୟ ଓଏସଆରଟିସି ସିଏମଡି ଭାବେ ବଦଳି କରାଯାଇଛି । ଗତ କିଛି ଦିନର ଘଟଣାକ୍ରମକୁ ଦେଖିଲେ ଗୋଟିଏ କଥା ସ୍ପଷ୍ଟ, ଯାହାକୁ ପୋଲିସ ଡିଜି ପଦରୁ ହଟାଯାଉଛି, ତାଙ୍କୁ ଓଏସଆରଟିସି ସିଏମଡି ଭାବେ ଅପସ୍ଥାପିତ କରାଯାଉଛି । ତେବେ ରାଜ୍ୟ ସରକାରଙ୍କ ପାଇଁ ଅତି ବିଶ୍ୱସ୍ତ ଭାବେ କାମ କରୁଥିବା ଅଫିସରଙ୍କୁ ଏଭଳି ଅବ୍ୟାହତି ଦେବା ସବୁ ମହଲରେ ଏବେ ଚର୍ଚ୍ଚାର ବିଷୟ ପାଲଟିଛି ।
ବିଭିନ୍ନ ମହଲରେ ପ୍ରତିକ୍ରିୟା
ତେବେ ଏହି ବଦଳିକୁ ନେଇ ପ୍ରତିକ୍ରିୟା ରଖିଛନ୍ତି ପୂର୍ବତନ ପୋଲିସ ଡିଜି ବିପିନ ବିହାରୀ ମିଶ୍ର । କହିଛନ୍ତି, ବଦଳି ଏକ ପ୍ରକ୍ରିୟା । କାହାକୁ ଅପମାନ ଦେଇ ସରକାର କେବେ ବଦଳି କରନ୍ତିନାହିଁ । ଯେତେବେଳି ଯିଏ ବଦଳନ୍ତି, ସେତେବେଳେ ସେ ଦାୟିତ୍ୱରେ ଥାଆନ୍ତି । ଯଦି ଏହାକୁ ଅପମାନ ବୋଲି ଧରାଯିବ, ତେବେ କିଛି ବି ଅଦଳବଦଳ ହୋଇପାରିବ ନାହିଁ ।
ସେହିଭଳି ବିଜେଡି ନେତା ସୁବାସ ସିଂ କହିଛନ୍ତି, ପାଖାପାଖି ୨ ବର୍ଷ ଡିଜି ପୋଲିସ ଭାବେ ଦାୟିତ୍ୱରେ ରହିଲେ କେ. ବି ସିଂ । ବଦଳି ଏକ ପ୍ରକ୍ରିୟା । ସରକାର କ୍ରିୟାଶୀଳ ହେବାକୁ ସବୁବେଳେ ପଦକ୍ଷେପ ନିଅନ୍ତି, ଆଉ ସବୁ ନିଷ୍ପତ୍ତିି ସେଦିଗରେ ହୋଇଥାଏ । ଆର. ପି. ଶର୍ମା ଜଣେ ଦକ୍ଷ ଅଫିସର ଓ ତାଙ୍କୁ ଦାୟିତ୍ୱ ଦେଇ ସରକାର ଏକ ଭଲି ନିଷ୍ପତ୍ତି ନେଇଥିବା ସେ କହିଛନ୍ତି । ତେବେ ନିର୍ବାଚନକୁ ଆଖି ଆଗରେ ରଖି ନିଷ୍ପତ୍ତି ନିଆଯିବାକୁ ସେ ଖଣ୍ଡନ କରିଛନ୍ତି ।
ତେବେ ଗତ କିଛି ଦିନର ପୋଲିସ ମୁଖିଆଙ୍କ ବଦଳି ବା ତାଙ୍କ ବିରୋଧରେ ନିଆଯାଉଥିବା କାର୍ଯ୍ୟାନୁଷ୍ଠାନ ଗୋଟିଏ କଥାକୁ ସ୍ପଷ୍ଟ କରୁଛି, ପୋଲିସ ବିଭାଗର ମୁଖିଆ ପଦବୀ ସବୁବେଳେ କଂଟକିତ । ତେବେ ଆଗାମୀ ଦିନରେ ପ୍ରଶାସନିକ ସ୍ତରରେ ମଧ୍ୟ ଅଦଳ ବଦଳ ହେବାର ଯଥେଷ୍ଟ ସମ୍ଭାବନା ରହୁଛି ।