କନକ ବ୍ୟୁରୋ : ବିଜେପୁରରେ ଆସନ୍ତାକାଲି ବିଗଫାଇଟ ଦେଖିବାକୁ ମିଳିବ । ଲଢେଇ ହେବ ମୁଖ୍ୟମନ୍ତ୍ରୀ-ମୋଦିଙ୍କ ମନ୍ତ୍ରୀଙ୍କ ମଧ୍ୟରେ । ପ୍ରଚାର ମୈଦାନରେ ବିଜେଡି ସୁପ୍ରିମୋ ନବୀନ ଓ ବିଜେପିର ଷ୍ଟାର ତଥା ଅଭିନେତ୍ରୀ ସ୍ମୃତି ଇରାନୀ । କୁହାଯାଉଛି ଆସନ୍ତାକାଲି ବିଜେପୁର ମୈଦାନରେ ନେତା-ଅଭିନେତାଙ୍କ ମଧ୍ୟରେ ଜୋରଦାର ଲଢେଇ ଦେଖିବାକୁ ମିଳିବ । କିନ୍ତୁ ଆଜିଠାରୁ ଏହାର ତାତି ରାଜଧାନୀରେ ଦେଖିବାକୁ ମିଳିଛି । କୃଷି ଓ ପଞ୍ଚାୟତରାଜ ମନ୍ତ୍ରୀ ପ୍ରଦୀପ ମହାରଥୀ ଆସନ୍ତାକାଲି ହେବାକୁ ଥିବା ବିଗଫାଇଟ ପୂର୍ବରୁ ଯାତ୍ରା ଷ୍ଟାଇଲରେ ବିଜେପିକୁ ଆଟାକ କରିଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ମହାରଥୀ ଯାତ୍ରା ଷ୍ଟାଇଲରେ କହିଛନ୍ତି, ବିଜେଡି ସୁପ୍ରିମୋ ପ୍ରଚାର ପାଇଁ ବିଜେପୁର ଗଲେ ସର୍ମ୍ପକ ସଦୃଢ ହେବା ସହ ମତ ମଧ୍ୟ ଅଧିକ ବିଜେଡି ସପକ୍ଷରେ ରହିବ । ଏହାଛଡା ନବୀନଙ୍କୁ ହିରୋ ଭାବେ ଦର୍ଶାଇବାକୁ ଭୁଲି ନାହାନ୍ତି ମହାରଥୀ । ସାମ୍ବାଦିକଙ୍କ ପ୍ରଶ୍ନର ଉତ୍ତର ଦେବାକୁ ଯାଇ ମହାରଥୀ କହିଛନ୍ତି, ଇଏ ହିରୋ(ନବୀନ ପଟ୍ଟନାୟକ) ଅଲଗା, ସେ ହିରୋଇନ(ସ୍ମୃତି ଇରାନୀ) ଅଲଗା । ଇଏ ସେ ହିରୋ ନୁହଁନ୍ତି ଯିଏ ହିରୋଇନଙ୍କୁ ଦେଖି ଯିବେ । ଇଏ ହିରୋ ହେଉଛନ୍ତି ଲୋକଙ୍କ ପାଇଁ ଏବଂ ଲୋକଙ୍କର ସେବା କରିବା ପାଇଁ ଓ ଲୋକଙ୍କର ମଙ୍ଗଳ କରିବା ପାଇଁ । ସେ ହିରୋଇନ୍ ଅଲଗା ଧରଣର । ଯାହା ଆପଣ ମାନେ ଜାଣିଛନ୍ତି ତେଣୁ ତାହା ଭିତରକୁ ମୋତେ ଭିଡିବାକୁ ଆଦୌ ଚେଷ୍ଟା କରନ୍ତୁ ନାହିଁ । ଏଭଳି କହି ପରୋକ୍ଷରେ ସ୍ମୃତି ଇରାନିଙ୍କୁ ଟାର୍ଗେଟ କରିଥିଲେ ମହାରଥୀ ।
ଓଡ଼ିଶାରେ ସ୍ମୃତି ଇରାନୀଙ୍କୁ କିଏ ଚିହ୍ନିଛି । ସେ ପ୍ରଚାର କଲେ ବିଜେପୁରରେ ଟିକିଏ ବି ପ୍ରଭାବ ପଡିବନି । ଯଦି ପ୍ରଭାବ କାହାର ପ୍ରଭାବ ପଡିବ ସେ ହେଉଛନ୍ତି ଓଡ଼ିଶାର ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କର । କାରଣ ସେ ହେଉଛନ୍ତି ଓଡ଼ିଶାର ଏକମାତ୍ର ହିରୋ । ଏତିକିରେ ମଧ୍ୟ ମହାରଥୀଙ୍କ ପାଟିରେ ବ୍ରେକ ଲାଗିନଥିଲା । ଅପରାଜିତା ବିଜେପିର ପ୍ରଚାର କରିବା ବିଜେଡି ଉପରେ ପ୍ରଭାବ ପକାଇବ କି ନାହିଁ ଏହାର ଉତ୍ତରରେ କହିଥିଲେ, ତାଙ୍କୁ କିଏ ଅଳ୍ପ କିଛି ଲୋକ ଚିହ୍ନିଛନ୍ତି । ତେଣୁ ତାଙ୍କ ପ୍ରଭାବ ବିଲକୁଲ ବି ବିଜେଡି ଉପରେ ପଡିବନି । ବିଜେପୁରରେ କେବଳ ବିଜେଡି ହିଁ ବିଜୟୀ ହେବ ।
ଏହାପୂର୍ବରୁ ମଧ୍ୟ ମହାରଥୀ ବିଜେପୁରରେ ବିଜେଡିର ବିଜୟକୁ ନେଇ ବଡ ବୟାନ ଦେଇଥିଲେ । ଏପରିକି ବିଜେପୁରରେ ବିଜେଡି ନ ଜତିଲେ ସେ ରାଜନୀତି ଛାଡିଦେବେ ବୋଲି କହିଥିଲେ । ଯାତ୍ରା ଅନ୍ଦାଜରେ ମହାରଥୀ ଯେଉଁଭଳି ଭାବେ ବୟାନ ଦେଇଛନ୍ତି ଲାଗୁଛି ବିଜେପୁରରେ ବିଜେଡିର ବିଜୟକୁ ନେଇ ବ୍ଲୁ ପ୍ରିଣ୍ଟ ପ୍ରସ୍ତୁତ ସରିଛି । ବିଜେଡି ସୁପ୍ରିମୋ ନବୀନ ପ୍ରଚାର ମୈଦାନକୁ ଓହ୍ଲାଇବା ପୂର୍ବରୁ ଏଭଳି ଦୃଢୋକ୍ତି ପ୍ରକାଶ କରିଛନ୍ତି ମହାରଥୀ । ଏପରିକି ବିଜେପୁର ନିର୍ବାଚନକୁ ନେଇ ନିଜ ରାଜନୀତି କ୍ୟାରିୟରକୁ ବାଜିରେ ଲଗାଇଛନ୍ତି ମହାରଥୀ । ତେଣୁ ବିଜେଡି ପାଇଁ ଏହି ନିର୍ବାଚନ ଯେତିକି ଗୁରୁତ୍ୱ ବହନ କରୁଛି ତାହାଠାରୁ ଅଧିକ ମହାରଥୀଙ୍କ ପାଇଁ ଗୁରୁତ୍ୱ ରଖୁଛି । ହିରୋ ପ୍ରଚାର ମୈଦାନକୁ ଓହ୍ଲାଇଲେ ବାକି ସବୁ ଜିରୋ ହୋଇଯିବେ ବୋଲି ଜୋର ଦେଇ କହିଛନ୍ତି ମହାରଥୀ । କାରଣ ବିଜେଡି ପାଇଁ ନବୀନ ହିଁ ଏକମାତ୍ର ହିରୋ । ଏଭଳି ବୟାନ ଦେଇ ସେତେବେଳେ ଚର୍ଚ୍ଚାରେ ରହିଥିଲେ ମହାରଥୀ । ଆଉ ଆଜି ପୁଣି ସ୍ମୃତି ଇରାନୀଙ୍କୁ ନେଇ ମହାରଥୀ ଯେଉଁ ବୟାନ ଦେଇଛନ୍ତି ଲାଗୁଛି ବିଜେପିର ପରାଜୟ ନେଇ ନିଶ୍ଚିତ ହୋଇ ସାରିଛନ୍ତି ମହାରଥୀ ।