ସହାୟକ ମୂଲ୍ୟବୃଦ୍ଧି ପ୍ରତିଶ୍ରୁତି ପୂରଣରେ ମୋଦି ବିଫଳ ! ଏନଡିଏରୁ ସମର୍ଥନ ପ୍ରତ୍ୟାହାର କଲା ସେତକରି ସ୍ୱାଭିମାନୀ ସଂଗଠନ
କନକ ବ୍ୟୁରୋ: ରାଜୁ ସେଟ୍ଟି ଜଣେ କୃଷକ ନେତା । ସେତକରି ସ୍ୱାଭିମାନୀ ସଂଗଠନର ସେ ପ୍ରତିନିଧିତ୍ୱ କରନ୍ତି । ମହାରାଷ୍ଟ୍ରର ହଟକାନାଗଲ୍ ଆସନରୁ ସେ ଲୋକସଭାକୁ ନିର୍ବାଚିତ ହୋଇଛନ୍ତି । ଦୀର୍ଘ ୩ ବର୍ଷ ଧରି ସେ ଏନଡିଏକୁ ସମର୍ଥନ କରିବା ପରେ ଏବେ ସମର୍ଥନ ପ୍ରତ୍ୟାହାର କରିନେଇଛନ୍ତି । ନିକଟରେ ଏକ ସାକ୍ଷାତକାରରେ ଏନଡିଏରୁ ସମର୍ଥନ ପ୍ରତ୍ୟାହାରର କାରଣ ସମ୍ପର୍କରେ ମଧ୍ୟ ସେ ଉଲ୍ଲେଖ କରିଛନ୍ତି । ଦେଶର କୃଷକମାନଙ୍କୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ମିଛ କହୁଛନ୍ତି ବୋଲି ସେ ଦୋଷାରୋପ ମଧ୍ୟ କରିଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ଏନଡିଏରୁ ସମର୍ଥନ କାହିଁକି ପ୍ରତ୍ୟାହାର କରିଲେ ବୋଲି ପ୍ରଶ୍ନରେ ଶ୍ରୀ ସେଟ୍ଟି କହିଛନ୍ତି, ୨୦୧୪ ନିର୍ବାଚନ ପ୍ରଚାର ସମୟରେ ମୋଦି କୃଷକମାନଙ୍କୁ ଫସଲର ସର୍ବନିମ୍ନ ସହାୟକ ମୂଲ୍ୟ ବାବଦରେ ଉତ୍ପାଦନ ଖର୍ଚ୍ଚର ଦେଢ଼ ଗୁଣ ଦେବେ ବୋଲି କହିଥିଲେ । ଏହା କୃଷକମାନଙ୍କ ସମସ୍ୟାର ସବୁଦିନିଆ ସମାଧାନ ଆଣିଦେବ ବୋଲି ଆଶା କରାଯାଇଥିଲା । କିନ୍ତୁ ମୋଦି ସରକାର କୃଷକଙ୍କ ଏହି ଆଶା ପୂରଣ କରିବାରେ ବିଫଳ ହୋଇଛନ୍ତି । ମୋଦି ଗୁଜରାଟର ମୁଖ୍ୟମନ୍ତ୍ରୀ ଥିବା ସମୟରେ ଆମ ଦଳ ପକ୍ଷରୁ ତାଙ୍କ ସହିତ ଏ ନେଇ ବିସ୍ତୃତ ଆଲୋଚନା ହୋଇଥିଲା । ସେ ଆମର ଦାବିକୁ ଗ୍ରହଣ କରିଥିଲେ ।
ତେବେ ଏ ନେଇ ସେ ଗତ ୩ ବର୍ଷ ମଧ୍ୟରେ ପ୍ରଧାନମନ୍ତ୍ରୀଙ୍କ ଧ୍ୟାନ ଆକର୍ଷଣ କରିଛନ୍ତି କି ବୋଲି ପ୍ରଶ୍ନରେ ଶ୍ରୀ ସେଟ୍ଟି କହିଛନ୍ତି, ମୁଁ ତାଙ୍କୁ ଏ ନେଇ ଚିଠି ଲେଖିଛି ଏବଂ ଅନେକ ଥର ଭେଟିଛି ମଧ୍ୟ । ସଂସଦରେ ଏ ପ୍ରସଙ୍ଗ ଉଠାଇଛି । ଏକ ସଂକଳ୍ପନାମା ଆଣିଛି । ସେହି ସଂକଳ୍ପନାମାକୁ ୫୮ ଜଣ ଏମପି ସମର୍ଥନ କରିବା ସହିତ ତାହା ଉପରେ ବିତର୍କ କରିଛନ୍ତି । ଏପରିକି ଆମର ସମର୍ଥକମାନେ ଏହି ପ୍ରସଙ୍ଗରେ ସୁପ୍ରିମକୋର୍ଟ ଯାଇଛନ୍ତି । କିନ୍ତୁ ସୁପ୍ରିମକୋର୍ଟରେ ସରକାର ଏହି ପଦକ୍ଷେପ ନେବା ନେଇ ନିଜର ଅସାମର୍ଥ୍ୟ ପ୍ରକାଶ କରିଛନ୍ତି । ମୋଦି କ’ଣ ଆପଣଙ୍କୁ ମିଥ୍ୟା ପ୍ରତିଶ୍ରୁତି ଦେଇଥିଲେ କି ବୋଲି ପ୍ରଶ୍ନ ହେବାରୁ ଶ୍ରୀ ସେଟ୍ଟି କୁହନ୍ତି ଏହାର ଦୁଇଟି କାରଣ ହୋଇପାରେ ।
ଗୋଟିଏ ହେଲା ^ଯେଉଁ ବ୍ୟକ୍ତି ୧୩ ବର୍ଷ ଧରି ଗୁଜରାଟର ମୁଖ୍ୟମନ୍ତ୍ରୀ ଥିଲେ ତାଙ୍କର ହୁଏତ ଭାରତର କୃଷି ଏବଂ କୃଷକମାନଙ୍କୁ ପ୍ରଭାବିତ କରୁଥିବା ପ୍ରସଙ୍ଗ ସମ୍ପର୍କରେ କିଛି ଜ୍ଞାନ ନାହିଁ । ଏହା ନ ହୋଇଥିଲେ ସେ କୃଷକମାନଙ୍କୁ ସହାୟକ ମୂଲ୍ୟ ବୃଦ୍ଧି ନେଇ ମିଥ୍ୟା ପ୍ରତିଶ୍ରୁତି ଦେଇ ନଥାନ୍ତେ । ଦ୍ୱିତୀୟ କାରଣ ଏହା ବି ହୋଇପାରେ ପ୍ରତିଶ୍ରୁତି ପୂରଣ କରାଯାଇ ପାରିବ ନାହିଁ ବୋଲି ଜାଣି ମଧ୍ୟ ସେ କୃଷକମାନଙ୍କ ଠାରୁ ଭୋଟ ହାତେଇବା ଲାଗି ମିଥ୍ୟା ପ୍ରତିଶ୍ରୁତି ଦେଇଥାଇପାରନ୍ତି ବୋଲି ଶ୍ରୀ ସେଟ୍ଟି କହିଛନ୍ତି ।