ମହାରାଷ୍ଟ୍ରରେ ଶିବସେନା-ଏନସିପି-କଂଗ୍ରେସ ମେଂଟ ସରକାର ଗଠନ ନେଇ ଫିଟୁଛି ବାଟ । ତିନି ଦଳ ଭିତିରେ ସର୍ବନିମ୍ନ କାର୍ଯ୍ୟସୂଚୀ ନେଇ ବୁଝାମଣା
ଏନସିପି ନେତା କହିଲେ ଶିବସେନାକୁ ମିଳିବ ମୁଖ୍ୟମନ୍ତ୍ରୀ ପଦ; କଥା ଦୋହରାଇଲେ ସଞ୍ଜୟ, ଫଡନଭିସଙ୍କୁ ଶରଦଙ୍କ କଟାକ୍ଷ
କନକ ବ୍ୟୁରୋ: ମହାରାଷ୍ଟ୍ରରେ ଶିବସେନା-ଏନସିପି- କଂଗ୍ରେସର ମେଂଟ ସରକାର ଗଠନ ନେଇ ଫିଟୁଛି ବାଟ । ମହାରାଷ୍ଟ୍ରରେ ସରକାର ଗଠନ ପାଇଁ ଶିବସେନା, କଂଗ୍ରେସ ଓ ଏନସିପି ମଧ୍ୟରେ ଘନଘନ ବୈଠକ ଚାଲିବା ପରେ ଏବେ ପଥ ପରିସ୍କାର ହେଉଛି । ଏହି ବୈଠକରେ ତିନ ଦଳ ମଧ୍ୟରେ ସର୍ବନିମ୍ନ କାର୍ଯ୍ୟସୂଚନୀକୁ ନେଇ ସହମତି ହୋଇଥିବା ଜଣାପଡିଛି । ଏନସିପିର ବରିଷ୍ଠ ନେତା ନୱାବ ମଲ୍ଲିକ କହିଛନ୍ତି ଶିବସେନାକୁ ପୂର୍ଣ୍ଣକାଳିନ ମୁଖ୍ୟମନ୍ତ୍ରୀ ପଦ ମିଳିବ । ଶିବସେନାକୁ ଅପମାନିତ କରାଯାଇଛି । ତେଣୁ ଶିବସେନାର ସ୍ୱାଭିମାନର ରକ୍ଷା କରିବା ଏନସିପିର ଦାୟୀତ୍ୱ । ଶିବସେନାକୁ ମୁଖ୍ୟମନ୍ତ୍ରୀ ପଦ ସହ ୧୬ ମନ୍ତ୍ରୀ ପଦ ମଧ୍ୟ ମିଳିବ । ସେହିପରି କଂଗ୍ରେସ ଓ ଏନସିପିକୁ ଉପମୁଖ୍ୟମନ୍ତ୍ରୀ ପଦ ସହ ଏନସିପିକୁ ୧୪ ମନ୍ତ୍ରୀ ଓ କଂଗ୍ରେସକୁ ୧୨ ମନ୍ତ୍ରୀ ପଦ ମିଳିବ ବୋଲି ସୂଚନା ମିଳିଛି ।
Kanak News is now on WhatsApp
Join and get latest news updates delivered to you via WhatsApp
ଅନ୍ୟପଟେ ଶିବସେନାର ବରିଷ୍ଠ ନେତା ସଞ୍ଜୟ ରାଉତ ପୁଣି ଥରେ ମୁଖ୍ୟମନ୍ତ୍ରୀ ପଦକୁ ନେଇ ତାଙ୍କ କଥାକୁ ଦୋହରାଇଛନ୍ତି । କହିଛନ୍ତି ମହାରାଷ୍ଟ୍ରରେ ଶିବସେନା ନେତୃତ୍ୱରେ ହିଁ ସରକାର ଗଠନ ହେବ । ଓ ଶିବସେନାର ହିଁ ମୁଖ୍ୟମନ୍ତ୍ରୀ ହେବ । ତେବେ ତିନି ଦଳଙ୍କ ମଧ୍ୟରେ ହୋଇଥିବା ବୁଝାମଣାରେ ହିନ୍ଦୁତ୍ୱ ପ୍ରସଙ୍ଗକୁ ସାମିଲ କରାଯାଇନାହିଁ । ସିଏମପିରେ କୃଷକ ଓ ଯୁବକଙ୍କ ସହ ଜଡିତ ମାମଲା ଉପରେ ଫୋକସ କରିବାକୁ ସହମତି ହୋଇଛି । ଆଉ କିଛି ମାମଲାରେ ସହମତି ହୋଇନଥିବା ଜଣାପଡିଛି । ଏହା ଭିତରେ ରହିଛି ଶିବସେନାର ପୁରୁଣା ଦାବି ବିନାୟକ ଦାମୋଦର ସାବରକରଙ୍କୁ ଭାରତ ରତ୍ନ ପ୍ରଦାନ ଓ କଂଗ୍ରେସ- ଏନସିପିର ମୁସଲମାନଙ୍କୁ ୫ ପ୍ରତିଶତ ସଂରକ୍ଷଣ ଦେବା ଭଳି ଦାବି । କୁହାଯାଉଛି ଏହି ଦୁଇ ପ୍ରସଙ୍ଗରେ ଶିବସେନା ଓ କଂଗ୍ରେସ-ଏନସିପି ମଧ୍ୟରେ ବୁଝାମଣା ହୋଇପାରି ନାହିଁ । ଅନ୍ୟପଟେ ମହାରାଷ୍ଟ୍ରରେ ରାଷ୍ଟ୍ରପତି ଶାସନ ଲାଗୁ ହୋଇଥିଲେ ମଧ୍ୟ କୋର କମିଟି ବୈଠକ କରିଛି ଭାରତୀୟ ଜନତା ପାର୍ଟି ।
ମହାରାଷ୍ଟ୍ରରେ ସରକାର ଗଠନ ପାଇଁ ଲାଗି ରହିଥିବା ବିବାଦ ଭିତରେ ଫଡନଭିସଙ୍କୁ କଟାକ୍ଷ କରିଛନ୍ତି ରାଷ୍ଟ୍ରବାଦୀ କଂଗ୍ରେସ ମୁଖ୍ୟ ଶରଦ ପାୱାର । କହିଛନ୍ତି, ସେ ଦୀର୍ଘଦିନ ହେବ ଦେବେନ୍ଦ୍ର ଫଡନଭିସଙ୍କୁ ଜାଣିଛନ୍ତି । କିନ୍ତୁ ତାଙ୍କୁ ଜ୍ୟୋତିଷଶାସ୍ତ୍ର ଜଣାଥିବା ସେ ଜାଣି ନଥିଲେ । ଏବେ ତାହା ଜାଣିଲେ । ଶିବସେନା-ଏନସିପି- କଂଗ୍ରେସ ମେଂଟ ସରକାର କଲେ ତାହା ୬ମାସ ଚାଲିପାରିବନି ବୋଲି କହିଥିଲେ ଦେବେନ୍ଦ୍ର ଫଡନଭିସ୍ । ଏନେଇ ସାମ୍ବାଦିକଙ୍କ ପ୍ରଶ୍ନର ଉତରରେ ଏଭଳି କହିଛନ୍ତି ଶରଦ ।