ସ୍ୱରର ଯାଦୁଗର ମହମ୍ମଦ ରଫିଙ୍କୁ ସମ୍ମାନ ଜଣାଇଲା ଗୁଗୁଲ । ଜନ୍ମଦିନରେ ଡୁଡଲ ମାଧ୍ୟମରେ ମନେପକାଇଲା ବିଶ୍ୱର ସବୁଠାରୁ ବଡ ସର୍ଚ୍ଚ ଇଂଜିନ ।
ସଙ୍ଗୀତ ଦୁନିଆର ବାଦଶାହା ମହମ୍ମଦ ରଫିଙ୍କର ଆଜି ୯୩ତମ ଜନ୍ମଦିନ । ଭାରତରେ ରଫି ସାହେବ ନାଁରେ ବେଶ ଜଣାଶୁଣା । ତାଙ୍କର ଜନ୍ମ ଦିନରେ ପୃଥିବୀର ସବୁଠାରୁ ବଡ ସର୍ଚ୍ଚ ଇଂଜିନ ଗୁଗୁଲ ସମ୍ମାନ ଜଣାଇଛି । ଗୁଗୁଲ ଡୁଡୁଲ ମାଧ୍ୟମରେ ତାଙ୍କୁ ଏହି ସମ୍ମାନରେ ସମ୍ମାନିତ କରିଛି । ମହମ୍ମଦ ରଫିଙ୍କ ଜନ୍ମ ୧୯୨୪ ମସିହାରେ ପଂଜାବର ଅମୃତସର ଜିଲ୍ଲାର କୋଟଲା ସୁଲତାନ ସିଂ ଗ୍ରାମରେ ହୋଇଥିଲା । ଆଜି ବି ନିଜ ସଙ୍ଗୀତ ମାଧ୍ୟମରେ ଲୋକଙ୍କ ହୃଦୟରେ ରାଜ କରୁଥିବା ରଫି ସାହେବଙ୍କୁ ଗୀତ ଗାଇବାର ପ୍ରେରଣା ତାଙ୍କ ଘର ପାଖରେ ବୁଲୁଥିବା ଜଣେ ଭିକାରୀ ଠାରୁ ମିଳିଥିଲା । ରଫି ସାହେବଙ୍କ ବାପାଙ୍କର ଲାହୋରରେ ଗୋଟିଏ ସେଲୁନ ଥିଲା ଓ ରଫି ସାହାବଙ୍କର ଅଧିକାଂଶ ସମୟ ସେହି ଦୋକାନରେ କଟୁଥିଲା । ଯେଉଁଠି ସେ ଗୀତ ଗାଉଥିଲେ ଏବଂ ତାଙ୍କର ସଙ୍ଗୀତକୁ ସମସ୍ତେ ଖୁବ ପସନ୍ଦ ମଧ୍ୟ କରୁଥିଲେ ।
Kanak News is now on WhatsApp
Join and get latest news updates delivered to you via WhatsApp
ଲୋକଙ୍କୁ ତାଙ୍କ ସ୍ୱର ଖୁବ ପସନ୍ଦ ଆସୁଥିଲା ଏହାକୁ ଦେଖି ତାଙ୍କ ପିତା ରଫି ସାହେବଙ୍କୁ କ୍ଲାସିକାଲ ମ୍ୟୁଜିକ ଶିଖାଇଥିଲେ । ସେ ଉସ୍ତାଦ ଅବଦୁଲ ବାହିଦ ଖାନ, ପଣ୍ଡିତ ଜୀବନ ଲାଲ ମଟ୍ଟୋ ଓ ଫିରୋଜ ନିଜାମୀଙ୍କଠାରୁ କ୍ଲାସିକାଲ ମ୍ୟୁଜିକ ଶିଖିଥିଲେ । ମହମ୍ମଦ ରଫି ତାଙ୍କର ପ୍ରଥମ ପରଫମାନସ ୧୩ ବର୍ଷରେ ଦେଇଥିଲେ । ଏହା ପରେ ୧୯୪୧ ମସିହାରେ ସେ ‘ସୋନିୟେ ନି ହିରିୟେ ନି’ରୁ ସଙ୍ଗୀତ ଯାତ୍ରା ଆରମ୍ଭ କରିଥିଲେ । ୧୯୪୫ ମସିହାରେ ହିନ୍ଦୀ ଫିଲ୍ମ ‘ଗାଓଁ କି ଗୋରୀ’ଜରିଆରେ ବଲିଉଡରେ ଡେବ୍ୟୁ କରିଥିଲେ ।
ଏହା ତାଙ୍କ ଜୀବନରେ ନାଟକିୟ ମୋଡ ଆଣିଥିଲା । ସେବେଠାରୁ ଆଉ ପଛକୁ ଫେରି ଚାହିଁ ନାହାଁନ୍ତି । ଏହାପରେ ସେ ସାତ ହଜାରରୁ ଅଧିକ ଗୀତ ଗାଇଛନ୍ତି । ସେ ଏକ ଭରସାଟାଇଲ ସିଙ୍ଗର ଭାବେ ଜଣାଶୁଣା । ସେ କ୍ଲାସିକାଲ, ଗଜଲ, ରୋମାଂଟିକ, ଭଜନ ପରି ସବୁ ପ୍ରକାର ଗୀତ ଗାଇଛନ୍ତି । କେବଳ ଏହା ନୁହେଁ ସେ ହିନ୍ଦୀ ବ୍ୟତୀତ କେଙ୍କଣୀ, ଭୋଜପୁରୀ, ବଙ୍ଗାଳୀ, ମରାଠୀ ପରି ଅନେକ ଭାଷାରେ ଗୀତ ଗାଇଛନ୍ତି । ଏହାସହ ତାଙ୍କୁ ଛଅ ଥର ଫିଲ୍ମ ଫେୟାର ଆୱାର୍ଡ ଓ ନ୍ୟାସନାଲ ଆୱାର୍ଡରେ ସମ୍ମାନୀତ କରାଯାଇଛି । ୧୯୬୭ରେ ରଫି ସାହେବଙ୍କୁ ପଦ୍ମଶ୍ରୀ ସମ୍ମାନରେ ସମ୍ମାନୀତ କରାଯାଇଥିଲା । କିନ୍ତୁ ୩୧ ଜୁଲାଇ ୧୯୮୦ ମସିହାରେ ୫୫ ବର୍ଷ ବୟସରେ ହାର୍ଟ ଆର୍ଟାକ କାରଣରୁ ତାଙ୍କର ମୃତ୍ୟୁ ହୋଇଥିଲା ।