କନକ ବ୍ୟୁରୋ: ବିଜେପିକୁ ରୋକିବା ପାଇଁ ବାହାରିଲେ ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜି । ତ୍ରିପୁରାରେ ବିଜେପିର ବୃହତ ବିଜୟ ପରେ ମୋଦିଙ୍କୁ ଅଟକାଇବା ପାଇଁ ଜୋରଦାର ଉଦ୍ୟମ ଆରମ୍ଭ କରିଦେଇଛି ତୃଣମୂଳ କଂଗ୍ରେସ । ତେବେ ବିଜେପିର ଉତ୍ତରପୂର୍ବ ଦଖଲ ପରେ ବିଜେପିକୁ ରୋକିବା ପାଇଁ ମହାମେଂଟ ନେଇ ଅଂଟା ଭିଡିଛନ୍ତି ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜି । ମମତା କହିଛନ୍ତି ଓଡ଼ିଶା ଓ ପଶ୍ଚିମବଙ୍ଗରେ ଜିତିପାରିବନାହିଁ ବିଜେପି । ୨୦୧୯ରେ ଲାଲକିଲ୍ଲାରେ ମୋଦିଙ୍କୁ ତ୍ରିରଙ୍ଗା ଉଡାଇ ନଦେବା ପାଇଁ ମମତାଙ୍କ ଆହ୍ନାନ ପରେ ନବୀନଙ୍କ ଆଭିମୁଖ୍ୟ କଣ ହେବ ଏ ନେଇ ଚର୍ଚ୍ଚା ଜୋର ଧରିଛି ।
Kanak News is now on WhatsApp
Join and get latest news updates delivered to you via WhatsApp
୨୦୧୯ରେ ମୋଦିଙ୍କ ଲହରିକୁ ରୋକିବା ପାଇଁ ଡିଏମକେ ନେତା ଷ୍ଟାଲିନଙ୍କ ସହ ମନ୍ତ୍ରଣା ଆରମ୍ଭ କରି ଦେଇଛନ୍ତି ମମତା । ବିଭିନ୍ନ ପ୍ରସଙ୍ଗରେ ସଂସଦ ବାହାରେ ଓ ଭିତରେ ଉଭୟ ଟିଏମସି ଓ ଡିମେକେ ମିଳିତ ଭାବେ କାର୍ଯ୍ୟ କରିବେ । ଏହା ପରେ ଏନଡିଏ ବିରୋଧରେ ତୃତୀୟ ମେଂଟ ନେଇ ପୁଣି ଅଙ୍କକଷା ଆରମ୍ଭ ହୋଇଛି । ସେପଟେ ମମତା କହିଛନ୍ତି, ଓଡ଼ିଶା ଓ ପଶ୍ଚିମବଙ୍ଗରେ ଜିତି ପାରିବନାହିଁ ବିଜେପି । ତେବେ ମମତାଙ୍କ ମୋଦି ହଟାଓ ଡାକରାରେ ନବୀନ ସାମିଲ ହେବେ କି ନାହିଁ, ଏ ନେଇ ଆରମ୍ଭ ହୋଇଛି ଚର୍ଚ୍ଚା । ପୂର୍ବରୁ ଏପରି ସମୀକରଣ ପାଇଁ ସମୟ ଆସିନାହିଁ ବୋଲି କହି ଆସିଛନ୍ତି ବିଜେଡି ସୁପ୍ରିମୋ ନବୀନ ପଟ୍ଟନାୟକ । ତେବେ ବର୍ତମାନ ସ୍ଥିତିରେ କଂଗ୍ରେସ ଓ ବିଜେପି ଠାରୁ ସମାନ ଦୂରତା ରକ୍ଷା କରିବ ବୋଲି ଦଳ ସ୍ପଷ୍ଟ କରିଛି ।
ଡିଏମକେ, ଟିଆରଏସ, ଶିବସେନା ନେତାଙ୍କ ସହ ମମତା ଆଲୋଚନା କରିଥିବା ବେଳେ ସମାଜବାଦୀ ପାର୍ଟି, ବହୁଜନ ସମାଜ ପାର୍ଟି ଓ ଆରଜେଡି ଉପରେ ଆଖି ରଖିଛନ୍ତି ମମତା । ମୋଦି ବିରୋଧୀ ଶକ୍ତିକୁ ଏକାଠି କରିବା ପାଇଁ ଉଦ୍ୟମ କରୁଛନ୍ତି ପଶ୍ଚିମବଙ୍ଗ ମୁଖ୍ୟମନ୍ତ୍ରୀ । ଏବେ ପ୍ରଶ୍ନ, ୨୦୧୯ରେ ଲାଲକିଲ୍ଲାରେ ମୋଦିଙ୍କୁ ତ୍ରିରଙ୍ଗା ଉଡାଇ ନଦେବା ପାଇଁ ମମତାଙ୍କ ଆହ୍ନାନ ପରେ କ’ଣ ହେବ ନବୀନଙ୍କ ଆଭିମୁଖ୍ୟ? ରାଜ୍ୟରେ ଜୋରଦାର ଟକ୍କର ଦେଉଥିବା ବିଜେପିକୁ ରୋକିବାକୁ ନୂଆ ସମୀକରଣରେ ସାମିଲ ହେବେ କି ନବୀନ?