ମଧ୍ୟପ୍ରଦେଶ ମୁଖ୍ୟମନ୍ତ୍ରୀ ଶିବରାଜ ସିଂ ଚୌହାନଙ୍କୁ ନେଇ ପୁଣି ଚର୍ଚ୍ଚା । ଶୁକ୍ରବାର ପୋଲିସ ଅଫିସର ଅମୃତ ଲାଲ ଭିଲାଲଙ୍କୁ ସମ୍ମାନ ଦେବାକୁ ଯାଇ ଶେଷରେ ତାଙ୍କ କୋକେଇରେ କାନ୍ଧ ଦେଇଛନ୍ତି ଶିବରାଜ । ଏପରିକି ଡ଼୍ୟୁଟି ସମୟରେ ଗମ୍ଭୀର ରୂପେ ଆହତ ହୋଇ ଶେଷରେ ପ୍ରାଣ ହରାଇଥିବା ଅମୃତ ଲାଲଙ୍କୁ ସହିଦଙ୍କ ମାନ୍ୟତା ଦେବାକୁ ମଧ୍ୟ କହିଛନ୍ତି । ସାଧାରଣତଃ ସହିଦଙ୍କୁ ସମ୍ମାନ ଦେବା କଥା ସମସ୍ତେ କହିଥାନ୍ତି । କିନ୍ତୁ ଅନ୍ତିମ ସଂସ୍କାର ପରେ ସତେ ଯେମିତି ସହିଦଙ୍କ କଥା ମନରୁ ପାଶୋରି ଦେଇଥାନ୍ତି ରାଜନେତା । କିନ୍ତୁ ଶିବରାଜ ଅମୃତ ଲାଲଙ୍କ କୋକଇରେ କାନ୍ଧ ଦେଇ ଯେଉଁ ସମ୍ମାନ ଦେଇଛନ୍ତି ତାହାକୁ ନେଇ ଏବେ ପୂରା ମଧ୍ୟପ୍ରଦେଶରେ ଚର୍ଚ୍ଚା ।
Kanak News is now on WhatsApp
Join and get latest news updates delivered to you via WhatsApp
ସୂଚନା ଅନୁସାରେ, ଗତ କିଛି ଦିନ ପୂର୍ବେ ଗାଡ଼ି ଚେକିଂ ସମୟରେ ଏଏସଆଇ ଅମୃତ ଲାଲ ଭିଲାଲଙ୍କୁ ଧକ୍କା ମାରିଥିଲା ଏକ କାରଟି । ଏପରିକି ଦ୍ରୁତ ଗତିରେ ଆସୁଥିବା କାରଟି ଏଏସଆଇଙ୍କୁ ଅଧ କିଲୋମିଟର ପର୍ଯ୍ୟନ୍ତ ଘୋଷାଡ଼ି ନେଇଥିଲା । ପରେ ତାଙ୍କୁ ଗମ୍ଭୀର ଅବସ୍ଥାରେ ଡାକ୍ତରଖାନାରେ ଭର୍ତ୍ତି କରାଯାଇଥିଲା । ତେବେ ଦୀର୍ଘ ୧୦ ଦିନ ଧରି ଜୀବନ ସହ ସଂଗ୍ରାମ କରିବା ପରେ ଶେଷରେ ପ୍ରାଣ ହରାଇଥିଲେ ଅମୃତ ଲାଲ । ତେବେ ଡ଼୍ୟୁଟି କରୁଥିବା ସମୟରେ ଅମୃତ ଲାଲ ପ୍ରାଣ ହରାଇଥିବାରୁ ତାଙ୍କୁ ସହିଦର ମାନ୍ୟତା ଦେବାକୁ ଘୋଷଣା କରିଛନ୍ତି ମୁଖ୍ୟମନ୍ତ୍ରୀ ଶିବରାଜ ସିଂ ଚୌହାନ । ଶୁକ୍ରବାର ଆୟୋଜିତ ଶ୍ରଦ୍ଧାଞ୍ଜଳି ସଭାରେ ମୁଖ୍ୟମନ୍ତ୍ରୀ ଯୋଗ ଦେଇ ଅମୃତ ଲାଲଙ୍କ କୋକେଇରେ କାନ୍ଧ ଦେବା ସହ ତାଙ୍କ ପରିବାର ପାଇଁ ୧ କୋଟି ଟଙ୍କାର ସହାୟତା ରାଶି ଦେବାକୁ ଘୋଷଣା କରିଥିଲେ । ଶିବରାଜଙ୍କ କହିବା ଅନୁଯାୟୀ, ଡ଼୍ୟୁଟି ସମୟରେ ଅମୃତ ଲାଲ ବୀରଗତି ପ୍ରାପ୍ତ କରିଥିଲେ । ତେଣୁ ତାଙ୍କ ତାଙ୍କ ପରିବାର ସଦସ୍ୟଙ୍କ ମଧ୍ୟରୁ ଜଣକୁ ଚାକିରି ଦେବାକୁ ବିଚାର କରାଯାଉଥିବା କହିଛନ୍ତି ଶିବରାଜ । ଏପରିକି ଏହି ଘଟଣାରେ ଯେଉଁ ବ୍ୟକ୍ତି ସାମିଲ ଅଛନ୍ତି ତାଙ୍କ ଉପରେ ଦୃଢ଼ କାର୍ଯ୍ୟାନୁଷ୍ଠାନ ନେବାକୁ କହିଛନ୍ତି ମୁଖ୍ୟମନ୍ତ୍ରୀ ।