ରାଜଧାନୀ ରାଜରାସ୍ତାରେ କ୍ଷୀର କାଣ୍ଡ : ଓମଫେଡ ଚାଷୀ ମୁହାଁମୁହିଁ ଫର୍ଦ୍ଦରେ ଯୋଡି ହେଉଛି ନୂଆ ଅଧ୍ୟାୟ
ଭୁବନେଶ୍ୱର ବ୍ୟୁରୋ, କନକ ନ୍ୟୁଜ୍ : ତେଜିଲା ଓମଫେଡ ବିରୋଧୀ ଆନ୍ଦୋଳନ । ରାସ୍ତାକୁ ଓହ୍ଲାଇଲେ ଚାଷୀ, କଲେ ପ୍ରତିବାଦ । ରାଜଧାନୀରେ କ୍ଷୀର ଢାଳି ଆସିଥିଲେ ପ୍ରତିବାଦ କରିବାକୁ, ହେଲେ ଶେଷରେ ଅଭିନବ ଉପାୟ ଆପଣାଇ ଲୋକଙ୍କୁ କ୍ଷୀର ବାଂଟିଲେ ଆଉ ସରକାରୀ ନିଷ୍ପତିର ବିରୋଧ କଲେ । ରାଜ୍ୟରେ ଗତ କିଛି ଦିନ ଧରି ବିଭିନ୍ନ ଅଂଚଳରେ କ୍ଷୀର ଢାଲି ଓମଫେଡର କ୍ଷୀର ସଂଗ୍ରହ ସିଲିଂ ନିଷ୍ପତିକୁ ଚାଷୀ ବିରୋଧ କରି ଆସୁଛନ୍ତି । ଏହାରି ଭିତରେ ବଢୁଥିବା ବିବାଦକୁ ଆଖି ଆଗରେ ରଖି ବିଷ୍ଣୁପଦ ସେଠୀଙ୍କୁ ଓମଫେଡ ପଦରୁ ସରକାର ବାଦ ଦେଇଛନ୍ତି । ତାଙ୍କ ସ୍ଥାନରେ ଖାଦ୍ୟ ଓ ଯୋଗାଣ ସଚିବ ମଧୁସୁଦନ ପାଢୀ ଅତିରିକ୍ତ ଦାୟିତ୍ୱ ତୁଲାଇବେ । ହେଲେ ପଦକୁ ଆସିବା ଆଗରୁ ତାଙ୍କ ସାମ୍ନାରେ ରହିଛି ଅନେକ ଚାଲେଂଜ ।
Kanak News is now on WhatsApp
Join and get latest news updates delivered to you via WhatsApp
ବିଭିନ୍ନ ସ୍ଥାନରେ ମୁଣ୍ଡ ଟେକୁଥିବା ଚାଷୀ ଆନ୍ଦୋଳନ କିଭଳି ପ୍ରଶମିତ କରିବେ? କ୍ଷୀର ସଂଗ୍ରହ ସିଲିଂ ପରିବର୍ତ୍ତନ ବାବଦରେ କିଛି ନିଷ୍ପତ୍ତି ନେବେ କି? କିଭଳି ଓମଫେଡର ଗୁଣାତ୍ମକ ମାନକୁ ବଢାଯିବ ଓ ବଜାରରେ ପୁଣି ଆସ୍ଥାଭାଜନ ହୋଇପାରିବ? ଚାଷୀ ଠାରୁ ସଂଗ୍ରୃହୀତ କ୍ଷୀରର ମାନ ସହ ହେଉଥିବା ସାଲିସକୁ କିଭଳି ରୋକାଯିବ? ଆଉ ଏହି ସବୁ ଚାଲେଂଜକୁ ସଫଳତାର ସହ ମୁକାବିଲା କରିବା ତାଙ୍କ ସମ୍ନାରେ ହେବ ବଡ ଆହ୍ୱାନ ।
ଗତ ମାର୍ଚ୍ଚ ୩୧ରେ ସରକାରଙ୍କ ଚିଠିକୁ ନେଇ ଓମଫେଡ ଓ ଦୁଗ୍ଧ ଚାଷୀଙ୍କ ମଧ୍ୟରେ ବିବାଦ ମୁଣ୍ଡ ଟେକିଥିଲା । କ୍ଷୀର ସଂଗ୍ରହକୁ ପାଖାପାଖି ୩୧% ହ୍ରାସ କରିବାକୁ ଏଥିରେ ଉଲ୍ଲେଖ ଥିଲା । ଫଳରେ ଚାଷୀଙ୍କ ଠାରୁ ଦୈନିକ ପାଖାପାଖି ୨ ଲକ୍ଷ ଲିଟର କ୍ଷୀର ସଂଗ୍ରହ ବନ୍ଦ ହୋଇଗଲା । ଯାହାକୁ ନେଇ ବିଭିନ୍ନ ସ୍ଥାନରେ ଆନ୍ଦୋଳନକୁ ଓହ୍ଲାଇଲେ ଚାଷୀ । ଉପକୂଳରୁ ଆରମ୍ଭ କରି ପଶ୍ଚିମ ଓଡିଶା ଯାଏଁ, ସବୁଠି ରାସ୍ତାରେ କ୍ଷୀର ଢାଳି କରାଗଲା ପ୍ରତିବାଦ । ଆଉ ଏହାରି ଭିତରେ କଂଟକିତ ଆସନର ଭାର ପଡିଲା ମଧୁ ପାଢୀଙ୍କ ହାତରେ । ନଜର ବିବାଦ ସମାଧାନ ହେଉଛି, ନା ଆଗକୁ ଉଗ୍ରରୂପ ଧାରଣ କରୁଛି ।