ବାଘ ଦିବସରେ ବଡ ଖବର । ରାଇଗୁଡାର ପ୍ରେମ କାହାଣୀ, ଏକାଠି ହେଲେ ସାତକୋଶିଆ ବାଘୁଣୀ ଓ ମଧ୍ୟପ୍ରଦେଶ ବାଘ ।
କନକ ବ୍ୟୁରୋ : ଓଡିଶା ବାଘୁଣୀ ପ୍ରେମରେ ମହାବୀର । ମଧ୍ୟପ୍ରଦେଶର କାହ୍ନା ବ୍ୟାଘ୍ର ପ୍ରକଳ୍ପରୁ ସାତକୋଶିଆ ଆସିଥିବା ଯୁବ ବାଘ ମହାବୀର, ଏଠାରେ ପୂର୍ବରୁ ଥିବା ବାଘୁଣୀ ସହ ଏକାଠି ବୁଲୁଥିବାର ସୂଚନା ପାଇଛି ବନବିଭାଗ । ସାତକୋଶିଆ କର୍ତ୍ତୃପକ୍ଷ ଆକଳନ କରିଥିଲେ ଯେ, ପ୍ରଥମେ ମହାବୀରକୁ ଜଙ୍ଗଲକୁ ଛାଡି, ସେଠାରେ ଥିବା ଏକମାତ୍ର ବାଘୁଣୀ ସହ ସଙ୍ଗମ କରିବାକୁ ସୁଯୋଗ ଦେଲେ ବଂଶବୃଦ୍ଧି ହେବାର ନୂତନ ସୁଯୋଗ ସୃଷ୍ଟି ହେବ । ଫଳରେ ବନବିଭାଗର ବାଘ ବଂଶ ବୃଦ୍ଧି ଉଦ୍ୟମକୁ ମିଳିଛି ପ୍ରଥମ ସଫଳତା ।
Kanak News is now on WhatsApp
Join and get latest news updates delivered to you via WhatsApp
ସେପଟେ ସାତକୋଶିଆରେ ବାଘ ଛଡାଯିବାକୁ ନେଇ ଅଭୟାରଣ୍ୟ ମଧ୍ୟରେ ଥିବା ଗ୍ରାମବାସୀଙ୍କ ବିରୋଧ ପରେ ଘଟଣା ନେଇ ବିସ୍ତୃତ ରିପୋର୍ଟ ମାଗିଛି ଜାତୀୟ ବ୍ୟାଘ୍ର ସଂରକ୍ଷଣ କତ୍ତୃପକ୍ଷ (ଏନଟିସିଏ) । ପ୍ରକଳ୍ପ ଭିତରେ ବସବାସ କରୁଥିବା ଲୋକଙ୍କ ସହ ତୁରନ୍ତ ଆଲୋଚନା କରି ସମସ୍ୟାର ସମାଧାନ କରିବାକୁ ଦେଇଛି ପରାମର୍ଶ । ଫଳରେ ବର୍ଷାଋତୁ ସରିବା ପରେ ଦ୍ୱିତୀୟ ପର୍ଯ୍ୟାୟ ବାଘ ସ୍ଥାନାନ୍ତରଣ କାର୍ଯ୍ୟ କରାଯାଇପାରିବ ।
ସାତକୋଶିଆକୁ ବାଘ ଆଣିବା ପୂର୍ବରୁ କୋର ଏରିଆରେ ଥିବା ଏକ ଗ୍ରାମକୁ ଅନ୍ୟତ୍୍ର ସ୍ଥାନାନ୍ତର କରାଯାଇଥିଲା । କିନ୍ତୁ ଏହା ସତ୍ତେ୍ୱ ଅଭୟାରଣ୍ୟ ଭିତରେ ଥିବା ଅନ୍ୟ କିଛି ଗ୍ରାମକୁ ସ୍ତାନାନ୍ତର କରାଯାଇବାରିନାହିଁ । କିନ୍ତୁ ବନବିଭାଗ ପକ୍ଷରୁ ସଂପୃକ୍ତ ଅଂଚଳରେ ଗଠନ କରାଯାଇଥିବା ଇକୋ ଡେଭେଲୋପମେଂଟ ସେଂଟର ଗୁଡିକ ସହ ଆଲୋଚନା କରି ବାଘ ଆଣିବା ନିଷ୍ପତି ନେଇଥିଲେ । ତେଣୁ ବିରୋଧ ପଛରେ କିଛି ରାଜନୈତିକ ଅଭିସନ୍ଧି ଥିବା ଅନୁମାନ କରୁଛି ବନବିଭାଗ ।
ସାତକୋଶିଆରେ ଥିବା ବାଘୁଣୀ ସହ ମହାବୀରର ମିଳାମିଶା ଦେଖି ଆଶାବାଦୀ ହୋଇପଡିଛନ୍ତି କର୍ତ୍ତୃପକ୍ଷ । ତେଣୁ ଖୁବ୍ ଶୀଘ୍ର ଏନକ୍ଲୋଜରରେ ଥିବା ବାଘୁଣୀ ସୁନ୍ଦରୀକୁ ମଧ୍ୟ ଜଙ୍ଗଲକୁ ଛାଡିବାକୁ ବିଚାର କରାଯାଉଛି । ଏପଟେ ବିରୋଧ କରୁଥିବା ଗ୍ରାମବାସୀଙ୍କ ସହ ଚାଲିଛି ଆଲୋଚନା । ବିରୋଧ ପରେ ମଧ୍ୟପ୍ରଦେଶ ଆଉ ବାଘ ଦେବାକୁ ରାଜି ହେବନି ବୋଲି ଗଣମାଧ୍ୟମରେ ରିପୋର୍ଟ ପ୍ରକାଶ ପାଇବା ପରେ ବନବିଭାଗ ମୁଣ୍ଡରେ ଚିନ୍ତା ପଶିଛି । ତେଣୁ ଖୁବ୍ ଶୀଘ୍ର ଘଟଣାର ସମାଧାନ ପାଇଁ ଉଦ୍ୟମ କରାଯାଉଛି ବୋଲି କହିଛନ୍ତି ବନ କର୍ତ୍ତୃପକ୍ଷ ।