ଭାରତ-ପାକ୍ ମଧ୍ୟରେ ଅଶାନ୍ତି : ଏଲଓସି ପାଖରେ ରହୁଥିବା ଲୋକ ବଖାଣିଲେ ନିଜ ଦୁଃଖ । କହିଲେ, ଏକା ଥରକେ କାହିଁକି ମାରିଦେଉନାହାଁନ୍ତି
ଦୁଇ ସପ୍ତାହ ହେଲାଣି ଭାରତ-ପାକ୍ ମଧ୍ୟରେ ଅଶାନ୍ତି ଲାଗି ରହିଛି । ଫେବୃଆରୀ ୧୪ରେ ପୁଲଓ୍ଵାମାରେ ଆତଙ୍କବାଦୀମାନେ ଆକ୍ରମଣ କରିବା ପରେ ଭାରତର ୪୦ଜଣ ଯବାନ ସହିଦ୍ ହୋଇଥିଲେ । ଯାହା ପରେ ଭାରତ-ପାକ୍ ମଧ୍ୟରେ ଯୁଦ୍ଧର ସ୍ଥିତି ଉପୁଜିଥିଲା । ଭାରତୀୟ ବାୟୁସେନା ୪୦ଜଣ ଯବାନଙ୍କ ମୃତ୍ୟୁର ଜବାବ ଏୟାର ଷ୍ଟ୍ରାଇକ୍ କରି ଦେବା ସହ ୩୦୦ଆତଙ୍କବାଦୀଙ୍କୁ ନିହତ କରିଥିଲେ । ଏହି ଘଟଣା ପରେ ପରେ ଦୁଇ ଦେଶ ମଧ୍ୟରେ ତିକ୍ତତା ବଢ଼ିଯିବା ସହ ଭାରତ-ପାକ୍ ସୀମାରେ ବାରମ୍ବାର ଅସ୍ତ୍ରବିରତି ନିୟମ ଉଲ୍ଲଂଘନ କରାଯାଉଥିବା ଦେଖାଯାଇଛି ।
Kanak News is now on WhatsApp
Join and get latest news updates delivered to you via WhatsApp
ଦୁଇ ଦେଶ ମଧ୍ୟ ଗୁଳି ବିନିମୟ ଚାଲିଥିବାବେଳେ ଏହାର ପ୍ରଭାବ ନିୟନ୍ତ୍ରଣ ରେଖା ପାଖରେ ରହୁଥିବା ଲୋକମାନଙ୍କ ଉପରେ ପଢ଼ୁଥିବା ଦେଖା ଯାଇଛି । ପୁଞ୍ଚରେ ଏକ ଏଭଳି ଘଟଣା ସାମ୍ନାକୁ ଆସିଛି । ଯେଉଁଥିରେ ଗୋଟେ ପରିବାରର ୩ଜଣ ମୃତ୍ୟୁବରଣ କରିଥିବା ଜଣାପଡ଼ିଛି । ରଖମତ୍ ବିବି ନାମକ ଜଣେ ବୃଦ୍ଧା ନିଜ ବୋହୁ ଏବଂ ନାତି ନାତୁଣୀଙ୍କୁ ହରାଇ ଏବେ ମୃତ୍ୟୁର ଭିକ୍ଷା ମାଗିବା ଆରମ୍ଭ କରିଛନ୍ତି ।
ସୂଚନା ମୁତାବକ, ଭାରତ-ପାକ୍ ମଧ୍ୟରେ ଗୁଳିବର୍ଷା ଆରମ୍ଭ ହୋଇଥିବା ବେଳେ ନିୟନ୍ତ୍ରଣ ରେଖା ପାଖରେ ରହୁଥିବା ରଖମତଙ୍କ ପରିବାର ଉପରେ ଏହାର ଗଭୀର ପଡ଼ିଛି । ଶୁକ୍ରବାର ନିୟନ୍ତ୍ରଣ ରେଖାରେ ଗୁଳି ବର୍ଷା ଅଧିକ ବଢ଼ିଯିବା ସହ ବୋମା ବିସ୍ଫୋରଣ ମଧ୍ୟ ହୋଇଥିଲା । ଏହି ସମୟରେ ଗୋଟେ ବୋମା ଆସି ରଖମତଙ୍କ ଘର ଉପରେ ପଡ଼ିବା ପରେ ବିସ୍ଫୋରଣରେ ତାଙ୍କ ବୋହୁ, ନାତି ଏବଂ ନାତୁଣି ଘଟଣା ସ୍ଥଳରେ ମୃତ୍ୟୁବରଣ କରିଥିଲେ । ରଖମତଙ୍କ ପୁଅକୁ ସଙ୍ଗେ ସଙ୍ଗେ ଡ଼ାକ୍ତରଖାନା ନିଆଯାଇଥିବା ବେଳେ ସେ ଏବେ ଜୀବନ-ମୃତ୍ୟୁ ସହ ସଂଗ୍ରାମ କରୁଥିବା ଜଣାପଡ଼ିଛି । ଏତେ ସବୁ ହେବା ପରେ ମଧ୍ୟ ରଖମତ୍ ନିଜ ଭଙ୍ଗା ଘରକୁ ଛାଡ଼ି ଯିବାକୁ ରାଜି ନାହାନ୍ତି । ସେ ନିଜ ଘରେ ହିଁ ମରିବାକୁ ଚାହାନ୍ତି ବୋଲି କହିଛନ୍ତି । ପ୍ରତିଦିନ ଡ଼ରାଇ ଡ଼ରାଇ ମାରିବା ଅପେକ୍ଷା ଏକା ଥରକେ ଆମକୁ କ’ଣ ପାଇଁ ମାରି ଦେଉ ନାହାନ୍ତି ବୋଲି କହିଛନ୍ତି ରଖମତ୍ ।