ଫେସବୁକରେ ଲିଙ୍କ୍ ହେବ ଆଧାରକାର୍ଡ ? ସୋସିଆଲ୍ ସାଇଟରୁ ସଫା ହେବ ଫେକ୍ ଆଇଡି, ଖୁବଶୀଘ୍ର ନିଷ୍ପତ୍ତି ନେଇପାରନ୍ତି ସୁପ୍ରିମକୋର୍ଟ ।
କନକ ବ୍ୟୁରୋ : ଫେସବୁକ, ଟ୍ୱିଟର, ଇନଷ୍ଟାଗ୍ରାମ, ହ୍ୱାଟ୍ସଆପ୍ ଭଳି ସୋସିଆଲ ମିଡିଆ ସାଇଟ୍ ଗୁଡିକ ଆଧାର ସହ ସଂଯୋଗ ହୋଇପାରେ । ହୁଏତ ଆପଣଙ୍କୁ ଏହା ଆଶ୍ଚର୍ଯ୍ୟ ଲାଗୁଥାଇପାରେ, କିନ୍ତୁ ଏଭଳି ହିଁ କିଛି ଖବର ବର୍ତ୍ତମାନ ସମୟରେ ଜାତୀୟ ଗଣମାଧ୍ୟମର ଶିରୋନାମା ପାଲଟିଛି । ଦିନକୁ ଦିନ ସୋସିଆଲ ସାଇଟର ବ୍ୟବହାର ଯେତିକି ବୃଦ୍ଧି ପାଉଛି, ସୋସିଆଲ ସାଇଟ ଦ୍ୱାରା ଅନେକ ଅପରାଧିକ କାର୍ଯ୍ୟକଳାପ ମଧ୍ୟ ବୃଦ୍ଧି ପାଉଥିବା ଦେଖିବାକୁ ମିଳୁଛି । ଆଉ ଏହାକୁ ନଜରରେ ରଖି ନିକଟରେ ତାମିଲନାଡୁ ସରକାର, ସୋସିଆଲ ମିଡିଆରେ ବେନିୟମ୍ କାମକୁ ରୋକିବା ପାଇଁ ଫେସବୁକ, ଟ୍ୱିଟର, ଇନଷ୍ଟାଗ୍ରାମ, ହ୍ୱାଟ୍ସଆପ୍ ଆଦିରେ ଆଧାରକାର୍ଡ ସଂଯୋଗ କରିବାକୁ ଦାବି କରିବା ପରେ ଏବେ ଏହାକୁ ନେଇ ଜୋରଦାର ଚର୍ଚ୍ଚା ହେଉଛି ।
Kanak News is now on WhatsApp
Join and get latest news updates delivered to you via WhatsApp
ପୂର୍ବରୁ ଏହି ପ୍ରସଙ୍ଗରେ ଚେନ୍ନାଇରୁ ୨ଟି, ଓଡିଶାରୁ ଗୋଟିଏ ଏବଂ ମୁମ୍ବାଇରୁ ଗୋଟିଏ ଯାଚିକା ବିଭିନ୍ନ ଅଦାଲତରେ ଦାୟର କରାଯାଇଥିଲା । ସୋସିଆଲ ମିଡିଆ ବ୍ୟବହାରକାରୀଙ୍କ ଆକାଉଣ୍ଟକୁ ଆଧାରକାର୍ଡ ସହ ସଂଯୋଗ କରିବା ପାଇଁ ଯେଉଁ ଯାଚିକା ଦାୟର ହୋଇଥିଲା, ତାହା ଉପରେ ଖୁବ ଶୀଘ୍ର ନିଷ୍ପତ୍ତି ନେଇପାରନ୍ତି ସୁପ୍ରିମକୋର୍ଟ ।
ଅନ୍ୟପଟେ ତାମିଲନାଡୁ ସରକାରଙ୍କ ସମେତ ବିଭିନ୍ନ ରାଜ୍ୟର ଏଭଳି ଦାବିକୁ ବିରୋଧ କରି ସର୍ବୋଚ୍ଚ ନ୍ୟାୟାଳୟଙ୍କ ଦ୍ୱାରସ୍ଥ ହୋଇଛି ଫେସବୁକ । ଆଉ ଏହା ପରେ ଏହି ମାମଲାର ବିଚାର କରିବା ପାଇଁ ସୁପ୍ରିମକୋର୍ଟ, କେନ୍ଦ୍ର ସରକାରଙ୍କ ସମେତ, ଗୁଗୁଲ, ଟ୍ୱିଟର ଏବଂ ଅନ୍ୟ ସୋସିଆଲ୍ ନେଟୱାର୍କ ସାଇଟକୁ ନୋଟିସ୍ ଜାରି କରିଛନ୍ତି । ଅନ୍ୟପଟେ ହ୍ୱାଟ୍ସଆପ୍ ପକ୍ଷରୁ କୁହାଯାଇଛି ଯେ, ଏହି ପ୍ରସଙ୍ଗରେ ଜଡିତ ସମସ୍ତ ମାମଲାକୁ ସୁପ୍ରିମକୋର୍ଟକୁ ସ୍ଥାନାନ୍ତର କରାଯିବା ଆବଶ୍ୟକ । ଯାହା ଫଳରେ ସୁପ୍ରିମକୋର୍ଟ ସମସ୍ତ ମାମଲାକୁ ବିଚାରକୁ ନେଇ ଉଚିତ ଶୁଣାଣି କରିବେ ।
ସୋସିଆଲ ମିଡିଆରେ ଅପରାଧ ବଢୁଥିବା ବେଳେ, ବିଶେଷ କରି ନକଲି ଆକାଉଣ୍ଟ ଖୋଲାଯାଇ, ବିପୁଳ ମାତ୍ରାରେ ଭାରତ ବିରୋଧୀ ତଥା ଅନ୍ୟାନ୍ୟ ଆପତ୍ତିଜନକ ପୋଷ୍ଟ ଦେଖିବାକୁ ମିଳୁଛି । ଏପରିକି ଅନେକ ବେନାମି ପୋଷ୍ଟ ଦେଶର ସାଂପ୍ରଦାୟିକ ଭାବନାକୁ କ୍ଷୁର୍ଣ୍ଣ କରୁଛି । ଆଉ ଏସବୁର ସମାଧାନ ପାଇଁ ସୋସିଆଲ୍ ମିଡିଆ ସାଇଟ୍ ଗୁଡିକରେ ଆଧାରକାର୍ଡ ସଂଯୋଗ କରିବା ନେଇ ପ୍ରସ୍ତାବ ଦେଇଛନ୍ତି ତାମିଲନାଡୁ ସରକାର । ଜାତୀୟ ଗଣମାଧ୍ୟମରୁ ମିଳିଥିବା ସୂଚନା ଅନୁଯାୟୀ, ଆଗାମୀ ସେପ୍ଟେମ୍ବର ମାସ ୧୩ ତାରିଖରେ ଏହି ମାମଲାର ପରବର୍ତ୍ତୀ ଶୁଣାଣି ହେବ । ତେବେ ଏହା ପୂର୍ବରୁ ଏହି ମାମଲାରେ ଫେସବୁକ, ହ୍ୱାଟ୍ସଆପ୍, ଗୁଗଲ, ୟୁଟ୍ୟୁବ ଭଳି ସୋସିଆଲ୍ ମିଡିଆ ପ୍ଲାଟଫର୍ମ ସମେତ ସମସ୍ତ ଆବେଦନକାରୀଙ୍କୁ ଏବଂ କେନ୍ଦ୍ର ସରକାରଙ୍କୁ ନୋଟିସ ଜାରି କରିଛନ୍ତି ସୁପ୍ରିମକୋର୍ଟ ।