ସ୍ମୃତି ସାଇତି ରଖିବାର ବିରଳ ପ୍ରୟାସ । ରାଜା ଓ ମହାରାଜାଙ୍କ ବିରଳ ଫଟୋ ଓ ଦସ୍ତଖତ ସଂଗ୍ରହ କରି ଲିମକା ବୁକ ଅଫ ରେକର୍ଡ୍ସରେ ସାମିଲ ହେଲେ ଓଡିଆ ପୁଅ ଅଜୟ
କନକ ବ୍ୟୁରୋ: ରାଜ ମହାରାଜାଙ୍କ ସ୍ମୃତି ସାଇତି ରଖିବାର ବିରଳ ପ୍ରୟାସ । ଆଉ ଏହି ପ୍ରୟାସ ତାଙ୍କୁ ଆଣି ଦେଇଛି ସ୍ୱତନ୍ତ୍ର ପରିଚୟ । ସେ ହେଉଛନ୍ତି ସମ୍ବଲପୁର ଜିଲ୍ଲା କୁଚିଣ୍ଡା ଅଂଚଳର ଅଜୟ ଅଗ୍ରୱାଲ । ଶତାଧିକ ରାଜା ଓ ମହାରାଜାଙ୍କ ବିରଳ ଫଟୋ ଓ ଦସ୍ତଖତ ସଂଗ୍ରହ କରି ଅଜୟ ଲିମକା ବୁକ ଅଫ ରେକର୍ଡ୍ସରେ ସାମିଲ ହୋଇଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ନୀଳଗିରି ରାଜା ଜୟନ୍ତ ଚନ୍ଦ୍ର ମର୍ଦ୍ଦରାଜ, ବଲାଙ୍ଗିର ରାଜା କେ ଭି ସିଂଦେଓ, ଗୁଜୁରାଟ ରାଜପିପଲାର ରାଜା ରଘୁବୀର ସିଂ ଗୋହିଲ, ଯୋଧପୁରର ମହାରାଜା ପଦ୍ମନାଭ, ନେପାଳ ରାଜା ଲେଟ କିଙ୍ଗ ବୀରେନ୍ଦ୍ର ଓ ପାକିସ୍ଥାନର ଜଣେମାତ୍ର ହିନ୍ଦୁ ରାଜା ରାଣା ହମୀର ସିଂ । ଏହିପରି ଦେଶ ବିଦେଶରେ ଶତାଧିକ ରାଜା ଓ ମହାରାଜାଙ୍କ ବିରଳ ଫଟୋ ଓ ଦସ୍ତଖତ ସଂଗ୍ରହ କରି ନିଜକୁ ଲିମକା ବୁକ ଅଫ ରେକର୍ଡ୍ସରେ ସାମିଲ କରି ପାରିଛନ୍ତି । ଅଜୟ ଅଗ୍ରୱାଲା ସମ୍ବଲପୁର ଜିଲ୍ଲା କୁଚିଣ୍ଡା ଅଂଚଳର ଜଣେ ପର୍ଯ୍ୟଟନ ପ୍ରଫେସନାଲ । ଚାକିରୀ କରନ୍ତି ଦିଲ୍ଲୀର ଏକ ମଲଟି ନ୍ୟାସନାଲ କମ୍ପାନୀରେ । ଚାକିରୀ ସହିତ ରାଜା ମହାରାଜାଙ୍କ ସ୍ମୁତିକୁ ସାଇତି ରଖିବା ତାଙ୍କର ଏକ ହବି ।
୨୦୧୧ରୁ ଆଜି ପର୍ଯ୍ୟନ୍ତ ସେ ଭାରତ ସମେତ ନେପାଳ, ପାକିସ୍ତାନ, ଭୁଟାନ, ଇରାନ ଆଦି ଦେଶରେ ଥିବା ରାଜା ମହାରାଜାଙ୍କ ଦସ୍ତଖତ ସଂଗ୍ରହ କରିସାରିଛନ୍ତି । ତାଙ୍କ ସଂଗ୍ରହ ସଂଖ୍ୟା ୨ଶହରୁ ଅଧିକ ରହିଥିବାବେଳେ ୧୩୦ ଜଣ ରାଜାଙ୍କ ଦସ୍ତଖତ ଓ ଫଟୋକୁ ସେ ସାଇତି ରଖିଛନ୍ତି । ଅଜୟ ରାଜ ରାଜୁଡା ଐତିହ୍ୟକୁ ଲୋକଲୋଚନକୁ ଆଣିବା ପାଇଁ ପ୍ରିନ୍ସିଲି ଇଣ୍ଡିଆ ନାମକ ଏକ ୱେବସାଇଟ ମଧ୍ୟ ତିଆରି କରିଛନ୍ତି । ଯେଉଁଥିରେ ୬ହଜାରରୁ ଅଧିକ ରୟାଲ ରାଜ ପରିବାରର ସଦସ୍ୟ ଅଛନ୍ତି । ତେବେ ଆଗକୁ ଯୋଧପୁରରେ ନିଜର ସଂଗ୍ରହକୁ ନେଇ ଏକ ପ୍ରଦର୍ଶନୀ ଆୟୋଜନ କରିବାକୁ ଲକ୍ଷ୍ୟ ରଖିଛନ୍ତି ଅଜୟ ।