ଶୀତ ଦିନିଆ ଥଣ୍ଡା, କାଶରୁ କିଭଳି ପାଇବେ ମୁକ୍ତି ! ଆପଣାନ୍ତୁ କିଛି ଘରୋଇ ଉପଚାର
ଶୀତ ଦିନେ ଥଣ୍ଡା ହେବା ସ୍ୱାଭାବିକ କଥା । ଏହି ଋତୁରେ ବହୁ ସ୍ୱାସ୍ଥ୍ୟ ସମସ୍ୟା ଦେଖାଯାଏ । ଶିଶୁଙ୍କ ଠାରୁ ବୃଦ୍ଧ ପର୍ଯ୍ୟନ୍ତ ସମସ୍ତେ ପ୍ରାୟ ଶ୍ୱାସ ଜନିତ ସମସ୍ୟାରେ ସଂକ୍ରମିତ ହୋଇଥାନ୍ତି । ଶୀତ ପୋଷାକ ବୃଦ୍ଧଙ୍କଠାରୁ ଶିଶୁ ପର୍ଯ୍ୟନ୍ତ ସମସ୍ତେ ପିନ୍ଧିବା ଉଚିତ୍ । ସଂକ୍ରମଣ ହେବାର ସମ୍ଭାବନା ଏହି ଋତୁରେ ଅଧିକ ଦେଖାଯାଏ । ଥଣ୍ଡା ହେଲେ ପୂରା ଉପଶମ ପାଇଁ କୌଣସି ଔଷଧ ନାହିଁ, କିନ୍ତୁ ଏହାର ଲକ୍ଷଣ- କାଶ, ଗଳାଫୁଲା, ନାକ ରୁନ୍ଧିହୋଇଯିବା, ଛିଙ୍କ ଓ ଜ୍ଜରର ଚିକିତ୍ସା କରାଯାଇପାରେ । ତେଣୁ ଏଭଳି ସଂକ୍ରମଣରୁ କିଭଳି ରକ୍ଷା ପାଇବେ ସେଥିପାଇଁ ସଚେତନ ରହିବା ଜରୁରୀ । ସର୍ଦ୍ଦି ଓ ଥଣ୍ଡା, କାଶରୁ ରକ୍ଷା ପାଇବାକୁ ହେଲେ ଘରକୁ ସଫା କରିବା ଦରକାର । ତେବେ ଆସନ୍ତୁ ଜାଣିବା, ଥଣ୍ଡା ଓ କାଶ ଜନିତ ସମସ୍ୟାରୁ କିଭଳି ମୁକ୍ତି ପାଇବେ । ଏଥିପାଇଁ ଆମେ ଆପଣଙ୍କୁ କେତେକ ଉପାୟ ସମ୍ବନ୍ଧରେ ଜଣାଉଛୁ ।
Kanak News is now on WhatsApp
Join and get latest news updates delivered to you via WhatsApp
ଗଣ୍ଠି ଯନ୍ତ୍ରଣା ବଢିଯାଏ
ଶୀତ ଦିନେ ରକ୍ତ ପ୍ରବାହ କମ୍ ହେବା ଯୋଗୁଁ ଗଣ୍ଠି ଜାଗାଗୁଡିକର ସଂଚାଳନ ସମସ୍ୟା ଦେଖାଦିଏ ଏବଂ ବାୟୁମଣ୍ଡଳର ଚାପରେ ପରିବର୍ତ୍ତନ ହେତୁ ଗଣ୍ଠିଫୁଲି ଯନ୍ତ୍ରଣା ହୋଇଥାଏ । ଶରୀର ସୂର୍ଯ୍ୟକିରଣ ବି କମ୍ ପାଏ । ଭିଟାମିନ୍-ଡିର ଅଭାବ ହାଡକୁ ଦୁର୍ବଳ କରିଦିଏ । ଏଣୁ ସୂର୍ଯ୍ୟାଲୋକରେ କିଛି ସମୟ ରୁହନ୍ତୁ ।
ଗଣ୍ଠି ଯନ୍ତ୍ରଣାରୁ ମୁକ୍ତି
ଅଳ୍ପ ଉଷୁମ ପାଣିରେ ସ୍ନାନ କରନ୍ତୁ । ସ୍ନାନ ପରେ ହଠାତ୍ ବାହାରକୁ ଯାଆନ୍ତୁ ନାହିଁ । ହାତରେ ଗ୍ଲୋବସ୍ ପିନ୍ଧନ୍ତୁ । ସକ୍ରିୟ ରହିବା ପାଇଁ ଘର ଭିତରେ ବ୍ୟାୟାମ କରନ୍ତୁ । ଖରାରେ କିଛି ସମୟ ରୁହନ୍ତୁ ଯାହା ଭିଟାମିନ-ଡି ଯୋଗାଇଦେବ । ଏହା ସମ୍ଭବ ନହେଲେ ଭିଟାମିନ-ଡି ସପ୍ଲିମେଣ୍ଟ ଖାଆନ୍ତୁ । ଓମେଗା-୩ ଫ୍ୟାଟି ଏସିଡ୍ ଫୁଲା କମାଏ । ଏହା ଦିନକୁ ୨ରୁ୩ ହଜାର ମିଲିଗ୍ରାମ ଆବଶ୍ୟକ । ସେବନ କରିବା ପୂର୍ବରୁ ଚିକିତ୍ସକଙ୍କ ପରାମର୍ଶ ନିଅନ୍ତୁ, କାରଣ ଏହା ବ୍ଲିଡିଂ ସମସ୍ୟା ସୃଷ୍ଟି କରିଥାଏ । ଶୀତରେ ମସାଜ କଲେ ଗଣ୍ଠି ଯନ୍ତ୍ରଣା ହ୍ରାସ ପାଏ ।
ପେଟ ସମସ୍ୟା
ଶୀତଦିନେ ପେଟ ଗୋଳମାଳ ବେଶୀ ହୁଏ । ଦିନ ଛୋଟ ସାଙ୍ଗକୁ ସୂର୍ଯ୍ୟକିରଣ କମ୍ ରହେ । ଶାରୀରିକ ପରିଶ୍ରମ ବି କମ୍ ହୁଏ । ଯେତିକି କ୍ୟାଲୋରୀ ନେଉ ତାହା ସେହି ଅନୁପାତରେ କ୍ଷୟ ନହେବା ଯୋଗୁ ଅଳସୁଆ ଲାଗେ, ଓଜନ ବି ବୃଦ୍ଧି ହୋଇଥାଏ । ଶୀତରେ ଆଲକୋହଲ, ଚା, କଫି ଧୂମପାନ ଅଭ୍ୟାସ ବି ବଢିଯାଏ । ଏଭଳି ସ୍ଥିତିରେ ଛାତିପୋଡା ସମସ୍ୟା ଦେଖାଦିଏ । କୋଷ୍ଠକାଠିନ୍ୟ ସମସ୍ୟା ଜଟିଳ ହୁଏ । ଗରିଷ୍ଠ ଖାଦ୍ୟରୁ ଦୂରେଇ ରହିଲେ ଭଲ ।
ତ୍ୱଚା ସମସ୍ୟା
ଶୀତଦିନେ ତ୍ୱଚା ଶୁଷ୍କ ରହେ ଓ ଫାଟେ । ଏଣୁ ମହିଳା ଓ ଶିଶୁମାନଙ୍କ ପାଦରେ କିମ୍ବା ଆଙ୍ଗୁଳିରେ ଲାଲ ଦାଗ ହୋଇ ଫୁଲିଯାଇ ଫୋଟକା ଭଳି ହୋଇଯାଏ । ଏହା ନାକ କାନରେ ମଧ୍ୟ ଦେଖାଦିଏ । ଏହା ଦୁଇରୁ ତିନି ସପ୍ତାହ ଯାଏ ରହେ ଓ ଭୀଷଣ କୁଣ୍ଡାଇ ହୁଏ । ଏହାକୁ ଚିଲବ୍ଲେନସ କୁହାଯାଏ ।
ପ୍ରତିରୋଧକ ଶକ୍ତି
ଶୀତରେ ଶରୀରର ରୋଗପ୍ରତିରୋଧକ ଶକ୍ତି ବୃଦ୍ଧି କରିବା ପାଇଁ ପ୍ରତିଦିନ ତୁଳସୀ ପତ୍ର ସେବନ କରନ୍ତୁ । ଏହା ସହ ଖାଦ୍ୟରେ ଗୋଲମରିଚ ଓ ହଳଦୀ ବି ଖାଇବା ଦରକାର । ରସୁଣ ଓ ଚା’ବି ରୋଗ ପ୍ରତିରୋଧକ ଶକ୍ତି ବୃଦ୍ଧି ହୁଏ ।