କନକ ବ୍ୟୁରୋ : ଆତ୍ମଘାତୀ ଆକ୍ରମଣରେ ପ୍ରାଣ ହରାଇଥିବା ବୀର ଯବାନଙ୍କ ବଳିଦାନକୁ ଦେଶବାସୀ ମଥା ନଇଁ ସମ୍ମାନ ଜଣାଇଛନ୍ତି । ସେପଟେ ଯବାନଙ୍କୁ ଶେଷ ଶ୍ରଦ୍ଧାଂଜଳି ଜ୍ଞାପନ କରିଛି ଦେଶ । ପୁଲୱାମା ଆତଙ୍କୀ ହମଲାରେ ଯାଇଛି ୩୭ଟି ଅମୂଲ୍ୟ ଜୀବନ । ଆଉ ଅମର ଯବାନଙ୍କ ପାଇଁ ସାରା ଦେଶ ଜଣାଇଛି ଶେଷ ସମ୍ମାନ । ଯବାନଙ୍କ ବଳିଦାନ ବ୍ୟର୍ଥ ଯିବନି ପ୍ରଧାନମନ୍ତ୍ରୀ ମୋଦି ଗତକାଲି କହିଥିବା ବେଳେ ଆଜି ସାରା ଦେଶ ଏକାକାର୍ ହୋଇଛି ଓ ଗୋଟିଏ ସ୍ୱରରେ ଶୁଣିବାକୁ ମିଳିଛି ଶହୀଦ ଯବାନ ଅମର୍ ରହେ ।
Kanak News is now on WhatsApp
Join and get latest news updates delivered to you via WhatsApp
ଯବାନଙ୍କୁ ଦେଶର ଶେଷ ଶ୍ରଦ୍ଧାଂଜଳି । ବୀର ସହିଦଙ୍କୁ ଅଶ୍ରୁଳ ବିଦାୟ । ସାରା ଦେଶରେ ଲାଗିଥିବା ଭିଡ଼ ସାଧାରଣ ଲୋକଟିଏ ପାଇଁ ନୁହେଁ, ହାତରେ ତ୍ରିରଙ୍ଗା ଧରି ନାରାବାଜି କରିବା ପଛରେ ନାହିଁ କୌଣସି ରାଜନୈତିକ ଉଦ୍ଦେଶ୍ୟ ବରଂ ଏ କାହାଣୀ ସେହି ବୀର ଯବାନର ଯାହାର ଜୀବନ ଅକାଳରେ ଝରିପଡ଼ିଲା ମାଟି ମାଆର ସେବା କରୁ କରୁ । କାନ୍ଦୁଛି ଗାଁ କାନ୍ଦୁଛି ମାଆ । କିଏ ହରାଇଛି ମଥାର ସିନ୍ଦୁର ତ କିଏ ହରାଇଛି ବୃଦ୍ଧାବସ୍ଥାର ଆଶ୍ରାବାଡି଼ । ଆଉ କେହି ପୁଣି ହୋଇଯାଇଛି ବାପଛେଉଣ୍ଡ । ଗ୍ରାମବାସୀ ବି ଅବାକ୍ ବୀର ଯବାନର ବଳିଦାନରେ । ଖାଲି ଗାଁ ଆଖପାଖ ନୁହେଁ ରାସ୍ତାଘାଟରେ ବି ସେହି ସମାନ ଦୃଶ୍ୟ, ଗୋଟିଏ ସ୍ୱର ବ୍ୟର୍ଥ ଯିବନି ବଳିଦାନ । ତୋ’ ପରିବାର ସହ ଅଛି ଏଇ ମାଟି, ଗାଁ ଆଉ ଦେଶ ।
ଏ କାହାଣୀ ଦେଶ ପାଇଁ ସବୁଠୁ ବଡ଼ ବଳିଦାନର । ଏ ଘଟଣା ମାଟି ମାଆ ପାଇଁ ହସି ହସି ଜୀବନ ଦେବା ପରର । କାନ୍ଦ, ବୋବାଳିରେ ଫାଠି ପଡୁଛି ସାରା ପରିବେଶ । କାଶ୍ମୀରରୁ କନ୍ୟାକୁମାରୀ, ଉତ୍ତର ପ୍ରଦେଶରୁ ଓଡ଼ିଶା, ବଙ୍ଗରୁ ବିହାର୍- ଯବାନଙ୍କ ବଳିଦାନ ଘଟଣା ସ୍ତବ୍ଧ କରିଦେଇଛି ସମସ୍ତଙ୍କୁ । ତେବେ ଏଭଳି ଘଟଣା ପରେ ବି ଭାଂଗିନି ଯବାନଙ୍କ ପରିବାରର ଦମ୍ଭ । ମାଟି ମାଆପାଇଁ ଜୀବନ ଦେବା ସମସ୍ତଙ୍କ ଭାଗ୍ୟରେ ନଥାଏ ଓ ସମସ୍ତଙ୍କୁ ମିଳେନି ଶହୀଦର ଗୌରବ ବାରମ୍ବାର ଦୋହରାଇ ଚାଲିଛି ହୃଦୟ ।
କାହାରି ଓଠରେ ଭାଷା ନାହିଁ । ନୀରବି ଯାଇଛି ଗାଁ, ଘର ଆଉ ଜନପଦ । କାରଣ ଦେଶସେବା କରୁ କରୁ ଅଫେରା ରାଇଜକୁ ଅସମୟରେ ବାହୁଡ଼ି ଯାଇଛି ପରିବାରର ଅତି ପ୍ରିୟ କେହି । ବୋଲ ମାନୁନି ଆଖିର ଲୁହ ଆଉ ଯେତେଥର ମନେ ପଡ଼ିବ ତା’ କଥା ଲୁହରେ ପ୍ରତିଥର ଆଖି ଭିଜୁଥିବ ଏହା ବି ଠିକ୍ ସେତିକି ସତ । ତେବେ ଏ ଲୁହର ମୂଲ୍ୟ ଠିକ୍ ସେତିକି ବେଳେ ମିଳିବ ଯଦି ବଳିଦାନର ନିଆ ଯାଏ ଉଚିତ୍ ପ୍ରତିଶୋଧ, ଆଉ ଏହି ଦାବି କେବଳ ଗୋଟେ ପରିବାରର ନୁହଁ ବରଂ ସାରା ଦେଶର ।