କନକ ବ୍ୟୁରୋ : ଚନ୍ଦ୍ର ଅଭିଯାନର ଆଜି ଆଉ ଏକ ପାଦ ଆଗେଇବ ଚନ୍ଦ୍ରଯାନ-୨ । ଅର୍ବିଟରରୁ ଅଲଗା ହୋଇସାରିଥିବା ଲାଣ୍ଡର ବିକ୍ରମ ଆଜି ପ୍ରବେଶ କରିବ ନୂଆ କକ୍ଷ ପଥରେ । ଇସ୍ରୋର ମିଶନ ମୁନରେ ଚନ୍ଦ୍ରଯାନ- ୨ର ଏହା ଆଉ ଏକ ଗୁରୁତ୍ୱପୂର୍ଣ୍ଣ ଅଂଶ । ଅର୍ବିଟରରୁ ଅଲଗା ହୋଇଥିବା ଲ୍ୟାଣ୍ଡର ବିକ୍ରମକୁ ଚନ୍ଦ୍ରର ନୂଆ କକ୍ଷପଥରେ ପ୍ରବେଶ କରାଇବାକୁ ମାତ୍ର ୩ ସେକେଣ୍ଡ ପାଇଁ ଏହାର ଇଂଜିନକୁ ଷ୍ଟାର୍ଟ କରାଯିବ । ଏହା ପରେ ସକାଳ ୯ଟାରୁ ୧୦ ମଧ୍ୟରେ ନୂଆ କକ୍ଷ ପଥରେ ପ୍ରବେଶ କରିବ ଲ୍ୟାଣ୍ଡର ବିକ୍ରମ । ଏହା ଜରିଆରେ ଚନ୍ଦ୍ରର ଆଉ ଟିକେ ନିକଟତର ହୋଇଯିବ ବିକ୍ରମ । ଏହି ପରି ଗତି କରି ଆସନ୍ତାକାଲି ଲ୍ୟାଣ୍ଡର ବିକ୍ରମ ଦ୍ୱିତୀୟ ଥର ଏହାର କକ୍ଷପଥ ପୁଣି ବଦଳାଇ ଚନ୍ଦ୍ରର ଆଉ ଟିକେ ନିକଟତର ହେବ । ଏହି କ୍ରମରେ ଆସନ୍ତା ୩ ଦିନ ଯାଏଁ ଲ୍ୟାଣ୍ଡର ବିକ୍ରମ ଏହାର ଅଣ୍ଡାକାର କକ୍ଷପଥରେ ଗତି କରି ଚନ୍ଦ୍ର ଠାରୁ ମାତ୍ର ୩୫ କିମି ଉଚ୍ଚକୁ ଆସିଯିବ । ଯାହାକୁ ଅନୁଧ୍ୟାନ କରୁଥିବେ ଇସ୍ରୋର ବୈଜ୍ଞାନିକ ।
Kanak News is now on WhatsApp
Join and get latest news updates delivered to you via WhatsApp
ଲାଣ୍ଡର ବିକ୍ରମ ଚନ୍ଦ୍ର ଅଭିଯାନରେ ଆଉ ଏକ କକ୍ଷ ପଥରେ ପ୍ରବେଶ କରିବା ପରେ ଇସ୍ରୋ ପାଇଁ ବଢିଯିବ ଚ୍ୟାଲେଂଜ । କାରଣ ଆଜି ଠାରୁ ଆସନ୍ତା ୩ ଦିନ ଲ୍ୟାଣ୍ଡର ବିକ୍ରମ ଅଣ୍ଡାକାର ପଥରେ ଗତି କରି ଚନ୍ଦ୍ର ର ନିକଟତରୁ ଅତି ନିକଟତର ହେବ । ଏହି କ୍ରମରେ ସେପ୍ଟେମ୍ୱର ୭ ତାରିଖ ବେଳକୁ ଚନ୍ଦ୍ର ଠାରୁ ମାତ୍ର ୩୫ କିମି ଉଚ୍ଚକୁ ଆସିଯାଇଥିବ ଲ୍ୟାଣ୍ଡର ବିକ୍ରମ । ଏତିକି ବେଳେ ଇସ୍ରୋ ବୈଜ୍ଞାନିକଙ୍କ ପାଇଁ ରହିବ ସବୁଠାରୁ ବଡ ଚ୍ୟାଲେଞ୍ଜ । କାରଣ ସେପ୍ଟେମ୍ୱର ୭ ତାରିଖ ଦିନ ରାତି ଗୋଟାଏ ୩୦ ମିନିଟରେ ଚନ୍ଦ୍ରର ଦକ୍ଷିଣ ମେରୁରେ ଧୀର ଅବତରଣ କରିବ ଲ୍ୟାଣ୍ଡର ବିକ୍ରମ ।
ଅବତରଣର ଶେଷ ୧୫ ମିନିଟ୍ ହେବ ସବୁଠାରୁ ଜଟିଳ । କାରଣ ଇସ୍ରୋ ବୈଜ୍ଞାନିକ ଲ୍ୟାଣ୍ଡର ବିକ୍ରମର ବେଗକୁ ହ୍ରାସ କରାଇ ଚନ୍ଦ୍ର ପୃଷ୍ଠରେ ଧୀର ଅବତରଣ କରାଇବେ । ଅବତରଣ କରିବାର ୨ ଘଂଟା ପରେ ଖୋଲିବ ଏହାର ରାମ୍ପ । ଯାହା ଜରିଆରେ ୬ ଚକ ବିଶିଷ୍ଟ ପ୍ରଜ୍ଞାନ ରୋଭର ଚନ୍ଦ୍ର ପୃଷ୍ଠରେ ଅବତରଣ କରିବ । ପ୍ରଜ୍ଞାନ ରୋଭର ଅବତରଣ କରିବାର ଏକ ଘଂଟା ୧୦ ମିନିଟ ପରେ ଏହାର ସୋଲାର ପ୍ୟାନେଲ୍ ଖୋଲିବ । ଅବତରଣର ୫ ମିନିଟ୍ ପରେ ପ୍ରାୟ ସକାଳ ୫ଟା ୧୦ ମିନିଟରେ ରୋଭର ପ୍ରଜ୍ଞାନ ଚନ୍ଦ୍ର ପୃଷ୍ଠରେ ଗତି କରିବା ଆରମ୍ଭ କରିବ ।