ସୁନ୍ଦରଗଡ ହେମଗିରିରେ ଭୂତ ବିକ୍ରି କରୁଛି ଜମି । ୨୦୧୨ରୁ ମୃତ ବ୍ୟକ୍ତିଙ୍କ ଜାଲ୍ ଦସ୍ତଖତରେ ୩ ଏକର ୭୫ ଡିସମିଲ ଜମି ବିକ୍ରି
କନକ ବ୍ୟୁରୋ : ଭୂତ ବିକ୍ରି କରୁଛି ଜମି । ଶୁଣିଲେ ଅଡୁଆ ଲାଗୁଛି ହେଲେ ଘଟଣାଟି ସତ୍ୟ । ଭୂତ ଜମି ବିକ୍ରି କରୁଛି ଏବଂ ମଣିଷ ଏହାକୁ କିଣୁଛି । ଏହିଭଳି କିଛି ଘଟଣା ଦେଖିବାକୁ ମିଳିଛି ସୁନ୍ଦରଗଡ ଜିଲ୍ଲା ହେମଗିରି ତହସିଲରେ । ୨୦୧୨ରେ ମୃତ୍ୟୁ ବରଣ କରିସାରିଥିବା ଜଣେ ଲୋକଙ୍କ ସମସ୍ତ ଜମିକୁ ଦଲାଲ ଓ ତହସିଲ କର୍ମଚାରୀ ହଡପ କରିନେଇଥିବା ଅଭିଯୋଗ ହୋଇଛି । ସୁନ୍ଦରଗଡ ଜିଲ୍ଲା ହେମଗିରିର ମୁଣ୍ଡେରକ୍ଷେତ ଗାଁର ଜଗତରାମ କୁଅଁରଙ୍କ ୨୦୧୨ ମସିହା ମେ’ ମାସରେ ମୃତ୍ୟୁ ହୋଇଥିଲା ।
Kanak News is now on WhatsApp
Join and get latest news updates delivered to you via WhatsApp
ଡିସେମ୍ବର ମାସରେ ଜଗତରାମଙ୍କ ପୁଅ ସୁନ୍ଦରଙ୍କ ପାଖକୁ ହେମଗିରି ତହସିଲ କାର୍ଯ୍ୟାଳୟର ମ୍ୟୁଟେସନ ପାଇଁ ନୋଟିସ ଆସିବା ପରେ ଏହି ଚଚଂକତା ପଦାରେ ପଡିଛି । କେବଳ ଘରଡିହ ୧୨ ଡିସମିଲକୁ ଛାଡି ଦେଲେ ଅନ୍ୟ ୩ ଏକର ୭୫ ଡିସମିଲ ଜମି ଦୁଇ ଜଣ ବ୍ୟକ୍ତିଙ୍କୁ ଜଗତରାମ ନିଜେ ବିକ୍ରି କରିଛନ୍ତି ଏବଂ ଏଥିରେ ସୁନ୍ଦରଙ୍କ ଦସ୍ତଖତ ଦରକାର ବୋଲି ଦର୍ଶାଯାଇଥିଲା । କିଛି ଦଲାଲ ଏବଂ ଦୁଇ ଜଣ କ୍ରେତା ଓ ଦୁଇ ମିଛ ସାକ୍ଷୀଦାର ମିଶି ଏହି ଜମିକୁ ହଡପ କରିଥିବା ଅଭିଯୋଗ ହୋଇଛି ।
ଜଗତରାମ କୁଅଁରଙ୍କ ନାଁରେ ଜାଲ୍ ଆଧାର କାର୍ଡ ବାହାର କରି ଏହି ଜାଲିଆତି କରାଯାଇଥିବା ଅଭିଯୋଗ ହୋଇଛି । ସୁନ୍ଦରଗଡ ଜିଲ୍ଲା ଭଷ୍ମା ଥାନା କରେଇବଗା ଗାଁର ସୁରେଶ ପଟେଲ ଓ ବଡଗାଁ ଥାନା ଜରଙ୍ଗୋଲୋଇ ଗାଁ ର ରଘୁନନ୍ଦନ ବଢାଇଙ୍କୁ ଜମି ବିକ୍ରି କରାଯାଇଛି । ଜମି ମ୍ୟୁଟେସନ ପାଇଁ ସୁନ୍ଦର ଙ୍କୁ ନୋଟିସ ଆସିଲା ପରେ ଏହି ଘଟଣା ସାମ୍ନା କୁ ଆସିଛି ।