ଲାଲୁଙ୍କୁ ମିଳିବ ମାସକୁ ୧୦ ହଜାର ଟଙ୍କାର ପେନସନ୍ : ବିହାର ସରକାର ଦେଲେ ଅନୁମୋଦନ
କନକ ବ୍ୟୁରୋ : ଲାଲୁ ପ୍ରସାଦ ଯାଦବ ପାଇବେ ପେନସନ୍ । ଦଶ ହଜାର ଟଙ୍କା ପେନସନ ପାଇବା ପାଇଁ ଦୁଇ ଦୁଇ ଥର ମୁଖ୍ୟମନ୍ତ୍ରୀ ଥିବା ତଥା ଆରଜେଡି ସୁପ୍ରିମୋ ଲାଲୁ ଯାଦବ ବିହାର ସରକାରଙ୍କୁ ଆବେଦନ କରିଛନ୍ତି । ଗୁରୁତ୍ୱପୂର୍ଣ କଥା ହେଉଛି ବିହାରରେ ଜେଡିୟୁ ଓ ଲାଲୁଙ୍କ ଆରଜେଡି ମେଂଟ ସରକାର ବି ଏହାକୁ ଅନୁମୋଦନ କରିଛନ୍ତି ।
Kanak News is now on WhatsApp
Join and get latest news updates delivered to you via WhatsApp
୧୯୭୫ ଜରୁରୀକାଳୀନ ପରିସ୍ଥିତି ବେଳେ ଯେଉଁମାନେ ଲୋକନାୟକ ଜୟପ୍ରକାଶ ନାରାୟଣଙ୍କ ଆନ୍ଦୋଳନରେ ସାମିଲ ହୋଇ ଜେଲ୍ ଯାଇଥିଲେ ସେମାନେ ଜେପି ସେନାନୀ ସମ୍ମାନ ସହ ଏ ପେନସନ୍ ପାଇବା ନେଇ ୨୦୦୯ରେ ବିହାର ସରକାର ନିଷ୍ପତି ନେଇଥିଲେ ।
ବିହାରର ବର୍ତମାନର ମୁଖ୍ୟମନ୍ତ୍ରୀ ନୀତୀଶ କୁମାରଙ୍କ ସମେତ ସେତେବେଳେ ଛାତ୍ର ଥିବା ଲାଲୁ ପ୍ରସାଦ ଯାଦବ ଏ ଆନ୍ଦୋଳନରେ ସାମିଲ ଥିବାରୁ ମିଶା ଆଇନ୍ ବଳରେ ଗିରଫ ହୋଇ ୧୯୭୫ରେ ଜେଲ୍ ଯାଇଥିଲେ । ଏପରିକି ନିଜ ବଡ଼ଝିଅର ନାଁ ମିଶା ରଖିଥିଲେ ଲାଲୁ । ନିଷ୍ପତି ଅନୁସାରେ ୬ ମାସରୁ କମ୍ କାରାବରଣ କରିଥିଲେ ମାସିକ ୫ ହଜାର ଟଙ୍କା ଓ ୬ ମାସରୁ ଅଧିକ ଜେଲରେ ରହିଥିଲେ ମାସକୁ ୧୦ ହଜାର ଟଙ୍କା ପେନସନ ଦିଆଯିବ ।
ଏ ଆଧାରରେ ଲାଲୁ ୧୦ ହଜାର ଟଙ୍କା ପାଇବାକୁ ଯୋଗ୍ୟ ବିବେଚିତ ହୋଇଛନ୍ତି । ବିହାରରେ ୩ ହଜାର ୧୦୦ ଜଣ ଜେପି ସେନାନୀ ପେନସନ ପାଉଛନ୍ତି । ବରିଷ୍ଠ ବିଜେପି ନେତା ସୁଶୀଲ ମୋଦି କିନ୍ତୁ ପେନସନ ଗ୍ରହଣ କରୁନାହାଁନ୍ତି ।