ଗର୍ଭବତୀଙ୍କୁ କାନ୍ଧରେ ବୋହି ୧୮ କି.ମି. ଚାଲିଲେ ଗାଁର ମହିଳା : ପହଁଚାଇଲେ ଡାକ୍ତରଖାନା
ଦେଶରେ ବିକାଶର ଚର୍ଚ୍ଚା ହେଉଥିବା ବେଳେ ହିମାଚଳ ପ୍ରଦେଶରୁ ଏକ ଅଭାବନୀୟ ଚିତ୍ର ସାମ୍ନାକୁ ଆସିଛି । କୁଲ୍ଲୁରେ ହସ୍ପିଟାଲ ଓ ସଡକ ନଥିବା କାରଣରୁ ଗାଁର ମହିଳାମାନେ ଗର୍ଭବତି ନାରୀକୁ ବାଉଁସ ଚେୟାରରେ ବସାଇ ୧୮ କିଲୋମିଟର ପାଦରେ ଚାଲି ହସ୍ପିଟାଲରେ ପହଞ୍ଚାଇଥିଲେ।
Kanak News is now on WhatsApp
Join and get latest news updates delivered to you via WhatsApp
ସୂଚନା ମୁତାବକ, ଗୁରୁବାର ୨୭ ବର୍ଷୀୟା ସୁନୀତା ଦେବୀଙ୍କ ପ୍ରସବ ଯନ୍ତ୍ରଣା ଆରମ୍ଭ ହୋଇଥିଲା । ସୁନୀତାଙ୍କ ସ୍ୱାମୀ ଓ ପରିଜନ ଚିନ୍ତିତ ହୋଇଯାଇଥିଲେ କିପରି ତାଙ୍କୁ ହସ୍ପିଟାଲରେ ପହଞ୍ଚା ଯାଇପାରିବ । ପରିବାର ଲୋକେ ଏଥିପାଇଁ ଗାଁ ଲୋକଙ୍କର ସାହାଯ୍ୟ ନେଇ ବାଉଁସ ଚୌକିରେ ମହିଳାଙ୍କୁ ବସାଇ ଏକ ଘଣ୍ଟା ମଧ୍ୟରେ ୧୮ କିମି ରାସ୍ତା ଅତିକ୍ରାନ୍ତ କରି ତାଙ୍କୁ ନୀହାନୀରେ ପହଁଚାଇଥିଲେ । ଆଶ୍ଚର୍ଯ୍ୟର କଥା ହେଉଛି ଗାଁ ଲୋକଙ୍କ ମଧ୍ୟରେ ଅଧିକ ମହିଳା ସାମିଲ୍ ଥିଲେ ଏବଂ ସେମାନେ ଗର୍ଭବତୀଙ୍କୁ ଅଧାରାସ୍ତା କାନ୍ଧରେ ବୋହିଥିଲେ । ସେଠାରୁ ଗାଡି ମାଧ୍ୟମରେ ତାଙ୍କୁ ହସ୍ପିଟାଲ ନିଆ ଯାଇଥିଲା ।
ବର୍ତ୍ତମାନ ସେଠାରେ ତାଙ୍କ ଚିକିତ୍ସା ହେଉଥିବା ଜଣାପଡିଛି । କିଛିଦିନ ତଳେ ସେହି ସ୍ଥାନରେ ଜଣେ ଅଙ୍ଗନୱାଡି କର୍ମଚାରୀ ଛୁଆଙ୍କୁ ପୋଲିଓ ଦେବାକୁ ଯାଉଥିବା ବେଳେ ବରଫ ରାସ୍ତାରେ ଖାଇରୁ ଖସି ଜୀବନ ହରାଇଥିବାର ଖବର ଆସିଥିଲା । ଏହିଭଳି ଯିବା ଆସିବାର ସୁବିଧା ନଥିବା ହେତୁ ବାରମ୍ବାର ଲୋକଙ୍କୁ ଅସୁବିଧାର ସମ୍ମୁଖୀନ ହେବାକୁ ପଡୁଛି ।