ଓଡିଶାରେ ପୁଣି ପୁଞ୍ଜିନିବେଶ ପାଇଁ ଦକ୍ଷିଣ କୋରିଆ ପ୍ରସ୍ତୁତ : ମୁଖ୍ୟମନ୍ତ୍ରୀଙ୍କୁ ଭେଟି ଆଲୋଚନା କଲେ ୪୬ ଜଣିଆ ପ୍ରତିନିଧି ଦଳ, ୬ଟି କ୍ଷେତ୍ରରେ ହେବ ପୁଞ୍ଜିନିବେଶ
କନକ ବ୍ୟୁରୋ : ଓଡିଶାରେ ପୁଣି ପୁଞ୍ଜିନିବେଶ କରିବ ଦକ୍ଷିଣ କୋରିଆ । ଏଥିପାଇଁ ଆଜି ମୁଖ୍ୟମନ୍ତ୍ରୀଙ୍କ ସହ ଆଲୋଚନା କରିଛନ୍ତି ଦକ୍ଷିଣ କୋରିଆର ୪୬ ଜଣିଆ ପ୍ରତିନିଧି ଦଳ । ରାଜ୍ୟ ସରକାରଙ୍କ ବିଭିନ୍ନ ବିଭାଗର ମନ୍ତ୍ରୀ ଓ ସଚିବଙ୍କୁ ଭେଟି ଓଡିଶାରେ କିପରି ପୁଞ୍ଜି ନିବେଶ କରିହେବ ସେ ନେଇ ଆଲୋଚନା କରିଛନ୍ତି ଏହି ପ୍ରତିନିଧି ଦଳ । ରାଜ୍ୟ ସରକାରଙ୍କର ବାଣିଜ୍ୟ ନୀତି ଏବଂ ସରକାର ପ୍ରଦାନ କରୁଥିବା ପ୍ରୋତ୍ସାହନ ବିଷୟରେ ମଧ୍ୟ ବିସ୍ତୃତ ଭାବେ ପ୍ରତିନିଧିମାନେ ଆଲୋଚନା କରିଛନ୍ତି । ବୈଠକ ପରେ ଶକ୍ତି ମନ୍ତ୍ରୀ ଦିବ୍ୟଶଙ୍କର ମିଶ୍ର କହିଛନ୍ତି ଓଡିଶାରେ ୬ଟି କ୍ଷେତ୍ରରେ ପୁଞ୍ଜି ନିବେଶ ପାଇଁ କୋରିଆ ପ୍ରତିନିଧିଙ୍କ ସହ ଆଲୋଚନା ହୋଇଛି । ଓଡ଼ିଶା ବିନିଯୋଗର ଗଡ଼ ପାଲଟିଛି । ନିବେଶ ପରେ ଓଡ଼ିଶାର ଯୁବକ ଯୁବତୀଙ୍କୁ ଚାକିରି ସୁଯୋଗ ମିଳିବ । ଉପକୃତ ହେବେ ଓଡ଼ିଶାର ଯୁବସମାଜ ।
Kanak News is now on WhatsApp
Join and get latest news updates delivered to you via WhatsApp
ସେପଟେ ଦକ୍ଷିଣ କୋରିଆ ପ୍ରଦିନିଧି ଦଳର ସଦସ୍ୟ କହିଛନ୍ତି, ଓଡ଼ିଶା ସହ କୋରିଆର ନୂଆ ସମ୍ପର୍କ ସ୍ଥାପନ ହୋଇଛି । ପ୍ରାକୃତିକ ସମ୍ପଦରେ ଭରପୁର ଓଡ଼ିଶା । କୃଷି, ମତ୍ସ୍ୟସମ୍ପଦ, ହର୍ଟିକଲଚର, ଇସ୍ପାତ, ସେବା, ଭିତ୍ତିଭୂମି କ୍ଷେତ୍ରରେ ପୁଞ୍ଜିନିବେଶ କରିବା ପାଇଁ କୋରିଆ ପ୍ରସ୍ତୁତ ବୋଲି କହିଛନ୍ତି ପ୍ରଦିନିଧି ଦଳର ସଦସ୍ୟ ।
ଓଡ଼ିଶାର ଅର୍ଥନୀତି ଓ ପ୍ରସ୍ତାବିତ ପୋସ୍କୋ ପ୍ରକଳ୍ପ ବିଫଳ ହେବା ପରେ ଓଡିଶାରୁ ମୁହଁ ଫେରାଇ ନେଇଥିଲା କୋରିଆ । ତେବେ ପୋସ୍କୋ ସମୟର ଅଭିଜ୍ଞତାକୁ ଆଧାର କରି ପୁଣି ଓଡିଶାରେ ନୂଆ ପ୍ରକଳ୍ପ ପ୍ରତିଷ୍ଠା କରିବାକୁ ଆଗ୍ରହ ଦେଖାଇଛିି କୋରିଆ । ଏଥିପାଇଁ ଆଜି କୋରିଆ ଗଣରାଜ୍ୟର ଶିଳ୍ପ ଓ ବାଣିଜ୍ୟର ୪୬ ଜଣିଆ ପ୍ରତିନିଧି ଦଳ ଓଡିଶା ଆସିଛନ୍ତି ।