କନକ ବ୍ୟୁରୋ : କୋରାପୁଟ ଜିଲ୍ଲା ପଟାଙ୍ଗି ବ୍ଲକ କୁଟିଆ ପଂଚାୟତର ୨୧ଟି ଗାଁ ଉପରେ ଆନ୍ଧ୍ର ସରକାରଙ୍କ ଆଖି । ଓଡିଶା ସହ ସୀମା ବିବାଦ ଭିତରେ, ଏସବୁ ଗାଁକୁ କବଜା କରିବା ପାଇଁ ସାଂଘାତିକ ଷଡଯନ୍ତ୍ର । ଆଉ ପଡୋଶୀ ସରକାରଙ୍କ ଷଡଯନ୍ତ୍ର ଧରାପଡିଯାଇଛି ଯେତେବେଳେ ଏହିସବୁ ସୀମାନ୍ତ ଗାଁରେ ପହଂଚିଛନ୍ତି ଆନ୍ଧ୍ରପ୍ରଦେଶ ବିଜୟନଗରମ ଜିଲ୍ଲାର ଜିଲ୍ଲାପାଳ, ଉପଜିଲ୍ଲାପାଳ, ବିଡିଓ, ତହସିଲଦାରଙ୍କ ସହ ରାଜନୈତିକ ନେତା । ଜନ୍ମଭୂମି କାର୍ଯ୍ୟକ୍ରମ ଜରିଆରେ ତଳଗଞ୍ଜେଇପଦର ଗାଁରେ କମ୍ବଲ, ପଲିଥିନ, ସୋଲାର ଲାଇଟ ବାଂଟିବାଠାରୁ ଆରମ୍ଭ କରି ଲୋକଙ୍କୁ ଜବକାର୍ଡ ଓ ବାର୍ଦ୍ଧକ୍ୟ ଭତ୍ତା ବି ପ୍ରଦାନ କରିଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ଓଡିଶା ମାଟିରେ ଆନ୍ଧ୍ର ପ୍ରାଶାସନିକ ଅଧିକାରୀଙ୍କ ଏଭଳି ସନ୍ଦେହଜନକ କାର୍ଯ୍ୟକଳାପର ଖବର ପାଇ କୋଟିଆ ପଂଚାୟତ ତଳଗଞ୍ଜେଇପଦର ଗାଁରେ କୋରାପୁଟ ଉପଜିଲ୍ଲାପାଳଙ୍କ ନେତୃତ୍ୱରେ ପହଂଚିଥିଲେ ଏକ ଟିମ୍ । ଘଟଣାର ଛାନଭିନ କରିବା ସହ ଓଡିଶା ସରକାର ଅଂଚଳର ସମସ୍ତ ପ୍ରକାର ବିକାଶ ପାଇଁ ଯତ୍ନବାନ ଅଛନ୍ତି ଓ ଯାହା ସମସ୍ୟା ରହିଛି ସମାଧାନ କରାଯିବ ବୋଲି ପ୍ରତୁଶ୍ରୁତି ଦେଇଥିଲେ । ପରେ ଏହି ଅଧିକାରୀମାନେ ଜିଲ୍ଲାପାଳଙ୍କୁ ରିପୋର୍ଟ ପ୍ରଦାନ କରିଛନ୍ତି ।
– କୋରାପୁଟ କୁଟିଆ ପଂଚାୟତର ୨୧ଟି ଗାଁକୁ ନେଇ ଆନ୍ଧ୍ର ସହିତ ସୀମା ବିବାଦ ରହିଛି
– ୧୯୬୮ ସୁପ୍ରିମକୋର୍ଟ ଦୁଇ ରାଜ୍ୟକୁ ସ୍ଥିତାବସ୍ଥା ବଜାୟ ରଖିବାକୁ ନିର୍ଦ୍ଦେଶ ଦେଇଥିଲେ
– ମାମଲା ବିଚାରାଧୀନ ଥିବାବେଳେ ଗାଁ ଗୁଡିକୁ କବଜା ପାଇଁ ଆନ୍ଧ୍ରର ଏହା ଚାଲ ନୁହେଁ ତ?
– ଉପହାର ଦେଇ ଲୋକଙ୍କୁ ଆନ୍ଧ୍ରରେ ମିଶିବା ପାଇଁ ପ୍ରବର୍ତ୍ତାଉଛନ୍ତି କି ପଡୋଶୀ ସରକାର?
– ଓଡି଼ଶା ମାଟିରେ ଆନ୍ଧ୍ରପ୍ରଦେଶ ପ୍ରଶାସନ ଯୋଜନା ଚଳାଇବା ପଛର ଉଦ୍ଦେଶ୍ୟ କ’ଣ?
ଓଡିଶାର କୁଟିଆ ପଂଚାୟତକୁ ନେଇ ସର୍ବୋଚ୍ଚ ନ୍ୟାୟାଳୟରେ ମାମଲା ବିଚାରାଧୀନ ଥିବାବେଳେ ଆନ୍ଧ୍ରର ଏଭଳି ଏକପାଖିଆ ପଦକ୍ଷେପ ଆଶ୍ଚର୍ଯ୍ୟ ସୃଷ୍ଟି କରିଛି । ଏବଂ ଓଡିଶା ସରକାର ତୁରନ୍ତ ଏହି ବିବାଦ ଉପରେ ପଦକ୍ଷେପ ନେବା ଜରୁରୀ ହୋଇପଡିଛି।