ପୁଣି ପାଣି ଘେରରେ କୋଣାର୍କ ସୂର୍ଯ୍ୟ ମନ୍ଦିର । ବାରମ୍ବାର ଦାବି ସତ୍ୱେ ଶୁଣୁନାହିଁ ପ୍ରତ୍ନତତ୍ତ୍ୱ ବିଭାଗ, ଅସନ୍ତୋଷ ବ୍ୟକ୍ତ କଲେ ସ୍ଥାନୀୟ ଲୋକ
କନକ ବ୍ୟୁରୋ : ପୁଣି ଥରେ ଲଗାଣ ବର୍ଷା ହେବାରୁ ବିଶ୍ୱଐତିହ କୋଣାର୍କ ସୂର୍ଯ୍ୟ ମନ୍ଦିରରେ ପାଣି ପଶିଥିବା ଦେଖିବାକୁ ମିଳିଛି । ଗତାକାଲିଠାରୁ ଲଗାଣ ବର୍ଷାରେ ମନ୍ଦିର ଚାରିପାଖରେ ପାଣି ଜମିରହିଥିବା ଦେଖିବାକୁ ମିଳିଛି । ତେବେ ଏହା ପ୍ରଥମ ନୁହେଁ ପୂର୍ବରୁ ୬ଥର ମନ୍ଦିର ପାଶ୍ୱର୍ରେ ପାଣି ଜମି ରହିଛି । ବାରମ୍ବାର ଅଭିଯୋଗ ସତ୍ୱେ ପ୍ରଶାସନ କୈାଣସି ପଦକ୍ଷେପ ନେଉନଥିବାରୁ ଏପରି ଅବସ୍ଥା ହେଉଥିବା ସ୍ଥାନୀୟ ଲୋକମାନେ ଅଭିଯୋଗ କରିଛନ୍ତି । ତେବେ ପାଣି ଜମିରହିଥିବାରୁ କିଛି ପର୍ଯ୍ୟଟକ ମନ୍ଦିର ଭିତରେ ପ୍ରବେଶ ନକରି ଫେରିଯାଇଥିବା ଦେଖିବାକୁ ମିଳଥିଲା । କିନ୍ତୁ ଅନେକ ଲୋକ ପାଣି ଭିତରେ ପଶି ମନ୍ଦିର ଭିତରକୁ ପ୍ରବେଶ କରିଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ପର୍ଯ୍ୟଟକମାନଙ୍କ ସହ ଆସିଥିବା କିଛି ଛୋଟ ପିଲାମାନେ ମନ୍ଦିର ମଧ୍ୟରେ ଜମି ରହିଥିବା ପାଣି ମଧ୍ୟରେ ଖେଳୁଥିବା ଦେଖାଯାଇଛି । ସାମାନ୍ୟ ବର୍ଷାରେ ମନ୍ଦିରରେ ଏପରି ପାଣି ଜମିରହୁଥିବାରୁ ବାହାର ରାଜ୍ୟ ଓ ଦେଶରୁ ଆସୁଥିବା ଲୋକମାନଙ୍କ ମନରେ ନକରାତ୍ମକ ପ୍ରଭାବ ପଡୁଛି । ପାଣି ଜମିରହୁଥିବାରୁ ମନ୍ଦିର ଉପରେ ମଧ୍ୟ ବିପଦ ରହୁଥିବା ସ୍ଥାନୀୟ ଅଞ୍ଚଳର ଲୋକମାନେ ନିଜ ପ୍ରତିକ୍ରିୟାରେ କହିଛନ୍ତି । ମନ୍ଦିରରୁ ପାଣି ନିଷ୍କାସନ ହେବା ପାଇଂ ବାଟ ନଥିବାରୁ ଏପରି ଅବସ୍ଥା ହେଉଥିବା ଜଣାପଡିଛି । ପ୍ରତ୍ୟେକ ଦିନ କୋଣାର୍କରେ ହଜାର ହଜାର ଲୋକ ବୁଲିବାକୁ ଯାଇଥାଆନ୍ତି ତେଣୁ ଯଥାଶୀଘ୍ର ଏହାର ସ୍ଥାୟୀ ସମାଧାନ ଲାଗି ପ୍ରତ୍ନତତ୍ତ୍ୱ ବିଭାଗ ପଦକ୍ଷେପ ନେବା ଜରୁରୀ ବୋଲି ସ୍ଥାନୀୟ ଲୋକମାନେ କହିଛନ୍ତି ।