କିଷାନ ଯୋଜନା ପାଇଁ ହିତାଧିକାରୀଙ୍କ ତାଲିକା ମାଗିଲା କେନ୍ଦ୍ର । ମାର୍ଚ୍ଚ ୩୧ ସୁଦ୍ଧା ମିଳିବ ପ୍ରଥମ କିସ୍ତି ଟଙ୍କା, ଅନ୍ୟପଟେ ଖୁବଶୀଘ୍ର ମିଳିବ ଦ୍ୱିତୀୟ ପର୍ଯ୍ୟାୟ କାଳିଆ ଟଙ୍କା
କନକ ବ୍ୟୁରୋ : ପିଏମ୍ କିଷାନ ଯୋଜନା କାର୍ଯ୍ୟକାରୀ କରିବା ପାଇଁ କ୍ଷୁଦ୍ର ଓ ନାମମାତ୍ର ଚାଷୀ ପରିବାରର ତାଲିକା ଓ ସେମାନଙ୍କ ବ୍ୟାଙ୍କ୍ ଆକାଉଂଟ୍ ବିବରଣୀ ପଠାଇବା ପାଇଁ କେନ୍ଦ୍ର, ସମସ୍ତ ରାଜ୍ୟକୁ ଚିଠି ଲେଖିଛି । ଫେବ୍ରୁଆରୀ ୨୫ ତାରିଖ ସୁଦ୍ଧା ସମସ୍ତ ତଥ୍ୟ ପଠାଇବା ପାଇଁ ଚିଠିରେ କୁହାଯାଇଛି । ମାର୍ଚ୍ଚ ୩୧ ମଧ୍ୟରେ ପ୍ରଥମ କିସ୍ତିରେ ୨ ହଜାର ଟଙ୍କା ଚାଷୀଙ୍କ ନିକଟକୁ ପଠାଇବେ ସରକାର । ତେବେ ଏହି ସମୟ ସୀମା ମଧ୍ୟରେ ଚାଷୀ ତାଲିକା ପଠାଇବା ସମ୍ଭବ ନୁହେଁ ବୋଲି ପଶ୍ଚିମବଙ୍ଗ ଓ ମଧ୍ୟପ୍ରଦେଶ ଭଳି ରାଜ୍ୟ କହି ସାରିଛନ୍ତି । ଅର୍ଥମନ୍ତ୍ରୀ ଶଶୀଭୂଷଣ ବେହେରା କହିଛନ୍ତି, ସରକାର ସକରାତ୍ମକ ମନୋଭାବ ରଖିଛନ୍ତି, ପ୍ରଶାସନିକ ସ୍ତରରେ ବିଚାରବିମର୍ଶ ଚାଲିଛି । ସେପଟେ ଖୁବ ଶୀଘ୍ର ୧୮ ଲକ୍ଷ ହିତାଧିକାରୀଙ୍କ ବ୍ୟାଙ୍କ ଖାତାକୁ ଦ୍ୱିତୀୟ ପର୍ଯ୍ୟାୟ କାଳିଆ ଟଙ୍କା ପଠାଯିବ ବୋଲି ରାଜ୍ୟ ସରକାର କହିଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ନିର୍ବାଚନୀ ବର୍ଷରେ ଚାଷୀଙ୍କ ମନ ଜିଣିବାକୁ ଚାଲିଥିବା ପ୍ରତିଯୋଗିତା ଭିତରେ ସମସ୍ତ ରାଜ୍ୟର ମୁଖ୍ୟମନ୍ତ୍ରୀଙ୍କୁ ଚିଠି ଲେଖିଛନ୍ତି କେନ୍ଦ୍ର କୃଷିମନ୍ତ୍ରୀ ରାଧାମୋହନ ସିଂହ । ଏହା ସହ ମୁଖ୍ୟ ଶାସନ ସଚିବଙ୍କ ନିକଟକୁ ପଠାଯାଇଛି ବିସ୍ତୃତ ଗାଇଡଲାଇନ୍ । ପିଏମ୍ କିଷାନ ଯୋଜନା କାର୍ଯ୍ୟକାରୀ କରିବା ପାଇଁ କ୍ଷୁଦ୍ର ଓ ନାମମାତ୍ର ଚାଷୀ ପରିବାରର ତାଲିକା ଓ ସେମାନଙ୍କ ବ୍ୟାଙ୍କ୍ ଆକାଉଂଟ୍ ବିବରଣୀ ପଠାଇବା ପାଇଁ ଅନୁରୋଧ କରିଛନ୍ତି କେନ୍ଦ୍ର କୃଷିମନ୍ତ୍ରୀ । ଫେବ୍ରୁଆରୀ ୨୫ ତାରିଖ ସୁଦ୍ଧା ସମସ୍ତ ତଥ୍ୟ ପଠାଇବା ପାଇଁ କୁହାଯାଇଛି । କାରଣ ମାର୍ଚ୍ଚ ୩୧ ମଧ୍ୟରେ ପ୍ରଥମ କିସ୍ତିରେ ୨ ହଜାର ଟଙ୍କା ଚାଷୀଙ୍କ ନିକଟକୁ ପଠାଇବେ ସରକାର । ୫ ଏକରରୁ କମ୍ ଜମି ଥିବା ଚାଷୀଙ୍କ ବ୍ୟାଙ୍କ ଖାତାକୁ ତିନିଟି କିସ୍ତିରେ ବର୍ଷକୁ ମୋଟ ୬ ହଜାର ଟଙ୍କା ପଠାଯିବ । ୧୨ କୋଟି ହିତାଧିକାରୀ ଏଥିରେ ଉପକୃତ ହେବା ଲକ୍ଷ୍ୟ ରଖିଛନ୍ତି କେନ୍ଦ୍ର ସରକାର ।
ଏହି ସମୟ ସୀମା ମଧ୍ୟରେ ଚାଷୀ ତାଲିକା ପଠାଇବା ସମ୍ଭବ ନୁହେଁ ବୋଲି ପଶ୍ଚିମବଙ୍ଗ ଓ ମଧ୍ୟପ୍ରଦେଶ ଭଳି ରାଜ୍ୟ କହି ସାରିଛନ୍ତି । ତେବେ କାଳିଆ ଯୋଜନା ଭଳି ଲୋକପ୍ରିୟ ଯୋଜନା କରିଥିବା ନବୀନ ସରକାର ଏ ନେଇ କି ପଦକ୍ଷେପ ନେଉଛନ୍ତି ତାହା ଉପରେ ରହିଛି ସମସ୍ତଙ୍କ ନଜର । ଆୟୁଷ୍ମାନ୍ ଭାରତ ଯୋଜନାକୁ ପ୍ରତ୍ୟାଖ୍ୟାନ କରି ନିଜସ୍ୱ ବିଜୁ ସ୍ୱାସ୍ଥ୍ୟ କଲ୍ୟାଣ ଯୋଜନା ଘୋଷଣା କରିଥିଲେ ରାଜ୍ୟ ସରକାର । ତେବେ ପିଏମ୍ କିଷାନ ଯୋଜନା ବାବଦରେ ଅର୍ଥମନ୍ତ୍ରୀ ଶଶିଭୂଷଣ ବେହେରା କହିଛନ୍ତି ଏ ନେଇ ସରକାର ସକରାତ୍ମକ ମନୋଭାବ ରଖିଛନ୍ତି, ପ୍ରଶାସନିକ ସ୍ତରରେ ବିଚାରବିମର୍ଶ ଚାଲିଛି । ପୂର୍ବରୁ ରାଜ୍ୟ ସରକାରଙ୍କ ପରାମର୍ଶ ନନେଇ ଯୋଜନା କରାଯାଉଥିବାରୁ କ୍ଷୋଭ ପ୍ରକାଶ କରିଛନ୍ତି ଶଶି ବେହେରା ।
ସେପଟେ ଖୁବ ଶୀଘ୍ର ମିଳିବ ଦ୍ୱିତୀୟ ପର୍ଯ୍ୟାୟ କାଳିଆ ଟଙ୍କା । ଦ୍ୱିତୀୟ ପର୍ଯ୍ୟାୟରେ ୧୮ ଲକ୍ଷ ହିତାଧିକାରୀଙ୍କ ବ୍ୟାଙ୍କ ଖାତାକୁ କାଳିଆ ଟଙ୍କା ପଠାଯିବ । ୧୮ ଲକ୍ଷ ହିତାଧିକାରୀଙ୍କ ମଧ୍ୟରୁ ୧୩ ଲକ୍ଷ ଚାଷୀ ଓ ୫ ଲକ୍ଷ ଭୂମିହୀନ କୃଷକଙ୍କୁ ଜୀବିକା ସହାୟତା ବାବଦରେ କାଳିଆ ଟଙ୍କା ମିଳିବ । ପ୍ରଥମ ପର୍ଯ୍ୟାୟରେ ୧୨ ଲକ୍ଷ ୪୫ ହଜାର ହିତାଧିକାରୀଙ୍କୁ ମିଳିସାରିଛି କାଳିଆ ଟଙ୍କା ।