ପ୍ରେମ ଆଗରେ ହଜିଗଲା ଶିଶୁର କଅଁଳ କାନ୍ଦ ! ଗର୍ଲଫ୍ରେଣ୍ଡ ସହ ବିବାହ କରିବାକୁ ନିଜ ତିନି ମାସର ଝିଅକୁ ଅପହରଣ କଲା ବାପା
ହଜିଗଲା ମାନବିକତା । ପ୍ରେମିକା ସହ ବିବାହ କରିବା ପାଇଁ ନିଜ ତିନି ବର୍ଷର ଝିଅକୁ ଅପହରଣ କଲା ପ୍ରେମରେ ଅନ୍ଧ ହୋଇଯାଇଥିବା ବାପା । ଆଉ ଏଭଳି ଏକ ଘୃଣ୍ୟ କାମରେ ସହଯୋଗ କରିଥିଲା ସମ୍ପୃକ୍ତ ପ୍ରେମିକା । ଏଭଳି ଏକ ଅଭାବନୀୟ ଘଟଣା ଦେଖିବାକୁ ମିଳିଛି ରାଜଧାନୀ ଦିଲ୍ଲୀରେ । ଅପହରଣ କରିବା ପରେ ଦୁଇ ଜଣ ପ୍ରେମିକ ଓ ପ୍ରେମିକା ଝିଅର ଅପହରଣ ନେଇ ପୋଲିସକୁ ଖବର ଦେଇଥିଲେ । ତେବେ ପୋଲିସ ଏହି ଘଟଣାର ତୁରନ୍ତ ପର୍ଦ୍ଦାଫାସ କରିଦେଇଥିଲା । ତିନି ମାସର କଅଁଳ ଶିଶୁଟିକୁ ଉଦ୍ଧାର କରିବା ସହ ପୋଲିସ ଦୁଇ ଜଣ ଅଭିଯୁକ୍ତଙ୍କୁ ଗିରଫ କରିଛି ।
Kanak News is now on WhatsApp
Join and get latest news updates delivered to you via WhatsApp
ସୂଚନା ଅନୁଯାୟୀ, ମାର୍ଚ୍ଚ ୨୩ ତାରିଖ ସନ୍ଧ୍ୟାରେ ରାଜଧାନୀ ଦିଲ୍ଲୀର କଲନ୍ଦର କଲୋନୀରେ ରହୁଥିବା ଶ୍ୟାମବାବୁ ଓରଫ ଦୀପକ, ନିଜ ଝିଅର ଅପହରଣ ହୋଇଥିବା ସୂଚନା ପୋଲିସକୁ ଦେଇଥିଲେ । ଘଟଣାର ତଦନ୍ତ ପାଇଁ ଏସଏଚଓ ସଞ୍ଜୀବ କୁମାର ଘଟଣାସ୍ଥଳରେ ପହଞ୍ଚିଥିଲେ । ଆଉ ଏହା ପରେ ଏହି ମାମଲାର ତଦନ୍ତଭାର ଏସଆଇ ରାକେଶ ମଲିକଙ୍କ ଟିମ୍ କୁ ଦିଆଯାଇଥିଲା । ତେବେ ତଦନ୍ତ ସମୟରେ ଜଣାପଡିଥିଲା ଯେ, ଜଣେ ମହିଳା ସେହି ତିନି ମାସର ଶିଶୁଟିକୁ ନେଇଯାଇଛନ୍ତି ।
ଆଖପାଖ ଅଞ୍ଚଳରେ ମିଳିଥିବା ସୂଚନା ଏବଂ ସେହି ମହିଳାଙ୍କ ଚେହେରାର ସୂଚନା ଆଧାରରେ ଏସଆଇ ରାକେଶ ସମ୍ପୃକ୍ତ ମହିଳାଙ୍କୁ ଖୋଜିବା ଆରମ୍ଭ କରିଥିଲେ । ପୋଲିସକୁ ଦୀପକଙ୍କ ପ୍ରେମିକାଙ୍କ ସମ୍ପର୍କରେ ସୂଚନା ମିଳିଥିଲା । ଆଉ ଏହା ପରେ ପୋଲିସ ଦୀପକକୁ ତାର ପ୍ରେମିକା ସମ୍ପର୍କରେ ପଚରାଉଚୁରା କରିଥିଲା । ଏବଂ ଦୀପକ କହିଥିଲା ଯେ, ସମ୍ପୃକ୍ତ ମହିଳାଙ୍କ ନାଁ ଲକ୍ଷ୍ମୀ । ତାଙ୍କ ଦୁଇଜଣଙ୍କ ମଧ୍ୟରେ ଅନେକ ସମୟରୁ ପ୍ରେମ ସମ୍ପର୍କ ରହିଥିଲା । କିନ୍ତୁ ଏବେ ସେ ଆଉ ଲକ୍ଷ୍ମୀ ସହ କଥା ହେଉନାହାନ୍ତି ।
ପୋଲିସ ସମ୍ପୃକ୍ତ ମହିଳାଙ୍କ ସମ୍ବନ୍ଧରେ ସମସ୍ତ ତଥ୍ୟ ଏକାଠି କରିଥିଲା । ଆଉ ସେଥିରୁ ଜଣାପଡିଥିଲା ଯେ, ମହିଳାଜଣଙ୍କ ବିବାହିତା ଅଟନ୍ତି । କିନ୍ତୁ ସେ ନିଜ ସ୍ୱାମୀଙ୍କ ଠାରୁ ଅଲଗା ଦିଲଶାଦ ଗାର୍ଡେନରେ ରୁହନ୍ତି । ଲକ୍ଷ୍ମୀଙ୍କୁ ପଚରାଉଚୁରା କରିବା ପାଇଁ ପୋଲିସ ସେଠାରେ ପହଞ୍ଚିଥିଲା । କିନ୍ତୁ ଲକ୍ଷ୍ମୀ ପୋଲିସକୁ ବାଟବଣା କରିବା ପାଇଁ ଚେଷ୍ଟା କରିଥିଲେ । କିନ୍ତୁ ପୋଲିସର ତଦନ୍ତ ଆଗରେ ଶେଷରେ ହାର ମାନିଥିଲା ଲକ୍ଷ୍ମୀ । ଆଉ ଏହା ପରେ ପୋଲିସକୁ କହିଥିଲା ପୁରା କାହାଣୀ । ପୋଲିସ ଲକ୍ଷ୍ମୀଙ୍କୁ ଗିରଫ କରିବା ସହ ଶିଶୁଟିକୁ ଗାଜିଆବାଦରୁ ଉଦ୍ଧାର କରିଥିଲା ।
ମହିଳାଜଣଙ୍କ କହିଛନ୍ତି ଯେ, ସେ ଦୀପକକୁ ପ୍ରେମ କରୁଥିଲେ । କିନ୍ତୁ ସେ ବିବାହିତା ଥିଲେ ଏବଂ ତାଙ୍କର ୯ବର୍ଷର ଗୋଟିଏ ପୁଅ ମଧ୍ୟ ଥିଲା । ସମୟକ୍ରମେ ସେ ତାଙ୍କ ସ୍ୱାମୀଙ୍କ ଠାରୁ ଅଲଗା ହୋଇଯାଇଥିଲେ । କୋର୍ଟରେ ତାଙ୍କର ଡିଭର୍ସ କେସ୍ ମଧ୍ୟ ଚାଲିଛି । ସେପଟେ ଦୀପକ ମଧ୍ୟ ନିଜ ସ୍ତ୍ରୀଙ୍କ ଠାରୁ ଅଲଗା ହେବା ପାଇଁ ନିଜ ତିନି ମାସର ଝିଅକୁ ଅପହରଣ କରିବାର କାହାଣୀ ରଚିଥିଲେ । ମାର୍ଚ୍ଚ ୨୩ ତାରିଖରେ ଦୀପକର ଘରେ ଏକ ପୂଜାର ଆଯୋଜନ କରାଯାଇଥିଲା । ଆଉ ଦୀପକର ସ୍ତ୍ରୀ ସେଥିରେ ବ୍ୟସ୍ତ ଥିଲେ ।
ଆଉ ଠିକ ସେହି ଦିନ ସନ୍ଧ୍ୟାରେ ଲକ୍ଷ୍ମୀ ସେଠାରେ ପହଞ୍ଚିଥିଲେ । ଆଉ ଶିଶୁଟିକୁ ସେଠାରୁ ଉଠାଇ ଆଣିଥିଲେ । ଶିଶୁଟିକୁ ଅପସରା ବର୍ଡର ଦେଇ ଆନନ୍ଦ ବିହାର ଏବଂ ପରେ ଇନ୍ଦିରାପୁରମ ସ୍ଥିତ ଚାମୁଣ୍ଡା ମନ୍ଦିରରେ ପହଞ୍ଚିଥିଲେ । ଆଉ ସେହିଠାରେ ହିଁ ଶିଶୁଟିକୁ ଛାଡିଦେଇ ନିଜ ଘରକୁ ଫେରିଆସିଥିଲେ । ତେବେ ଏହି ଘଟଣାର ପୋଲିସ ଉଭୟ ଦୀପକ ଏବଂ ଲକ୍ଷ୍ମୀଙ୍କୁ ଗିରଫ କରି ଜେଲକୁ ପଠାଇ ଦେଇଛି । ୨୪ ଘଣ୍ଟା ମଧ୍ୟରେ ହିଁ ପୋଲିସ ଏହି ମାମଲାକୁ ସମାଧାନ କରିଛି ।