କନକ ବ୍ୟୁରୋ : ରାଜ୍ୟରେ ବସ୍ତିବାସିନ୍ଦାଙ୍କୁ ଜମି ଦେବା ପାଇଁ କ୍ୟାବିନେଟ ନେଇଥିବା ନିଷ୍ପତିକୁ ଉତ୍କଳ ଭାରତ ସଭାପତି ଖାରବେଳ ସ୍ୱାଇଁ ତୀବ୍ର ବିରୋଧ କରିଛନ୍ତି । ଏହି ନିଷ୍ପତି ବିରୋଧରେ ଦରକାର ପଡିଲେ ସେ କୋର୍ଟ ଯିବେ ବୋଲି ଚେତାବନୀ ଦେଇଛନ୍ତି ଖାରବେଳ । କନକନ୍ୟୁଜକୁ ଖାରବେଳ କହିଛନ୍ତି, ବସ୍ତିବାସିନ୍ଦାଙ୍କୁ ଜମି ଦେବା ନିଷ୍ପତିକୁ ସେ ତୀବ୍ର ବିରୋଧ କରୁଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ପୌରପରିଷଦ ନିର୍ବାଚନକୁ ଦୃଷ୍ଟିରେ ରଖି ଗତକାଲି ରାଜ୍ୟ କ୍ୟାବିନେଟ ଏହି ନିଷ୍ପତି ନେଇଥିଲା ।ଓଡ଼ିଶାର ସହରାଂଚଳରେ ବସ୍ତି ବନାଇ ରହୁଥିବା ଲୋକଙ୍କୁ ନିଜ ଆଡକୁ ଟାଣିବା ପାଇଁ ନବୀନ ସରକାରଙ୍କ ମାଷ୍ଟର ଷ୍ଟ୍ରୋକ୍ । ଆସନ୍ତା ବର୍ଷ ସହରାଂଚଳ ନିର୍ବାଚନ ଥିବା ବେଳେ ବିଜେଡି ସରକାରଙ୍କ ଏହି ନିଷ୍ପତି ନିର୍ବାଚନୀ ରାଜନୀତି ଦୃଷ୍ଟିକୋଣରୁ ବେଶ ଗୁରୁତ୍ୱପୂର୍ଣ୍ଣ ମନେ କରାଯାଉଛି । ଓଡ଼ିଶାର ୫ଟି ମହାନଗର ନିଗମ, ୩୫ଟି ମୁନିସିପାଲିଟି କାଉନସିଲ ଓ ୬୩ଟି ବିଜ୍ଞାପିତ ପରିଷଦ ଅଂଚଳର ବସ୍ତି ଲୋକଙ୍କ ପାଇଁ ମନଲୋଭା ଘୋଷଣା କରିଛନ୍ତି ସରକାର ।
ମୁନସିପାଲିଟି କାଉନସିଲର ବସ୍ତିରେ ରହୁଥିବା ଲୋକଙ୍କୁ ମିଳିବ ୪୫୦ ବର୍ଗ ଫୁଟର ଜମି । ସେମାନଙ୍କୁ ମିଳିପାରେ ରହୁଥିବା ଜାଗାର ଜମି ପଟ୍ଟା । ଯଦି ଜମି ସେଠାରେ ନଥିବ, ତେବେ ଅନ୍ୟତ୍ର ସେମାନଙ୍କୁ ଥଇଥାନ କରାଯିବ । ଏହି ଜମିକୁ ବନ୍ଧକ ରଖି ସେମାନେ ଘର ପାଇଁ ବ୍ୟାଙ୍କ ଋଣ ବି ନେଇପାରିବେ ।
ବିଜ୍ଞାପିତ ପରିଷଦ ଅଂଚଳରେ ରହୁଥିବା ଲୋକଙ୍କୁ ମିଳିବ ୬୦୦ ବର୍ଗ ଫୁଟର ଜମି । ମୁନିସିପାଲିଟି ଭଳି ଏଠାରେ ମଧ୍ୟ ସେମାନେ ରହୁଥିବା ଜାଗାକୁ ଅଗ୍ରାଧିକାର ଦିଆଯିବ । କେବଳ ବାସଗୃହ ନିର୍ମାଣ କରିବା ପାଇଁ ଜମି ଦିଆଯିବ । ସରକାର ଦେଇଥିବା ଜମିକୁ ବିକ୍ରି କି ବଦଳ କରାଯାଇପାରିବ ନାହିଁ ।
ସେହିପରି ଯେଉଁମାନେ ମୁନିସିପାଲ କର୍ପୋରେସନରେ ବସ୍ତି ବାସିନ୍ଦା ହୋଇଥିବେ, ସେମାନଙ୍କୁ ମିଳିବ ୩୦୦ ବର୍ଗ ଫୁଟର ଫ୍ଲାଟ । ହେଲେ ମହାନଗର ନିଗମରେ ମିଳିବ ନାହିଁ ଜମି ଅଧିକାର । ମିଳିଥିବା ଘରକୁ ୧୦ବର୍ଷ ପରେ ସେମାନେ ବିକ୍ରି କିମ୍ବା ବଦଳ ମଧ୍ୟ କରିପାରିବେ । ଏହି ଫ୍ଲାଟକୁ ରହିବା ଘର ପାଇଁ କେବଳ ବ୍ୟବହାର କରିହେବ ।
ରାଜ୍ୟ କ୍ୟାବିନେଟ ନିଷ୍ପତିକୁ କାର୍ଯ୍ୟକାରୀ କରିବା ପାଇଁ ଦୁଇଟି ଅର୍ଡିନାନ୍ସ ଆଣିବେ ସରକାର । ଇଡବ୍ଲୁଏସ୍ ଇକୋନମିକ୍ ଓି୍ୱକର ସେକ୍ସନ କ୍ୟାଟେଗୋରି ଅଧିନରେ ଆସୁଥିବା ବ୍ୟକ୍ତିମାନେ, ଯାହାର ବାର୍ଷିକ ଆୟ ୧ଲକ୍ଷ ୮୦ହଜାର ଟଙ୍କା ପର୍ଯ୍ୟନ୍ତ ଥିବ, ସେହି ବ୍ୟକ୍ତିଙ୍କୁ ମାଗଣାରେ ଏହି ଜମି ଦିଆଯିବ । ଇଡବ୍ଲୁଏସ୍ କ୍ୟାଟେଗୋରୀ ବ୍ୟତୀତ ବସ୍ତିରେ ବାସ କରୁଥିବା ବ୍ୟକ୍ତିଙ୍କୁ ଏକ ଧାର୍ଯ୍ୟ ମୂଲ୍ୟରେ ଜମି ଦିଆଯିବ ।
ତେବେ ବସ୍ତି ମୁକ୍ତ ସହର ପାଇଁ କଥା ଉଠୁଥିବା ବେଳେ ଏବେ ସହରଗୁଡିକ ବସ୍ତି ଯୁକ୍ତ ହେବାକୁ ଯାଉଛି । ପ୍ରଶ୍ନ ଉଠୁଛି,
୧- ଏହି ପଦକ୍ଷେପ ଅଧିକରୁ ଅଧିକ ବସ୍ତି ଗଢି ଉଠିବା ପାଇଁ ବାଟ ଖୋଲି ଦେବ କି?
୨- ଅସାଧୁ ଉପାୟରେ ଜବରଦଖଲ କରୁଥିବା ବ୍ୟକ୍ତିଙ୍କୁ ଫାଇଦା ମିଳିବ କି?
୩- ସରକାରୀ ଯୋଜନାର ସୁଫଳ ପ୍ରକୃତ ହିତାଧିକାରୀ ପାଇବେ କି?
ପଂଚାୟତ ନିର୍ବାଚନରେ ଧକ୍କା ଖାଇବା ପରେ ସହରାଂଚଳ ନିର୍ବାଚନ ଉପରେ ଫୋକସ କରିଛି ବିଜେଡି । ଆଉ ଓଡ଼ିଶାର ସହରାଂଚଳ ବସ୍ତିରେ ରହୁଥିବା ୨୦ରୁ ୨୫ ଲକ୍ଷ ଲୋକଙ୍କୁ ଟାର୍ଗେଟ କରୁଛି ଦଳ ।