କନକ ବ୍ୟୁରୋ : ନିମ୍ନମାନର ସାର ଓ ଔଷଧ ଯୋଗାଣ ଯୋଗୁଁ ରାଜ୍ୟରେ ଧାନ ଚାଷ ଉଜୁଡି ଯାଇଥିବା ବେଳେ ଏବେ ଟସର ଚାଷୀଙ୍କ ପାଳି ପଡିଛି । ସରକାର ଧାନ ଚାଷୀଙ୍କୁ ଠକିବା ପରି ଟସର ଚାଷୀଙ୍କୁ ମଧ୍ୟ ଠକିଥିବା ଅଭିଯୋଗ ହୋଇଛି । ସରକାରଙ୍କ ପ୍ରଦତ୍ତ ରେଶମ ଅଣ୍ଡା ନିମ୍ନମାନର ହୋଇଥିବାରୁ ରେଶମ ହେବା ଆଗରୁ ରେଶମ ପୋକ ମରି ଯିବାରୁ ଚାଷ ଉଜୁଡି ଯାଇଛି । ଫଳରେ ଶହଶହ ଏକର ଜମିରେ ଟସର ଚାଷ କରିଥିବା ଚାଷୀ ମୁଣ୍ଡରେ ଏବେ ଚଡକ ପଡିଛି । କେନ୍ଦୁଝର ଜିଲ୍ଲାର ଗୋଟିଏ ଗାଁକୁ ଉଦାହରଣ ଭାବେ ନେଲେ ଏହା ବେଶ ବାରି ହୋଇପଡୁଛି ।
Kanak News is now on WhatsApp
Join and get latest news updates delivered to you via WhatsApp
କେନ୍ଦୁଝର ତେଲକୋଇ ବ୍ଲକ ବିଂଜବାହାଳ ଗାଁର ୧୦୦ରୁ ଅଧିକ ଚାଷୀ ୧୦୦ ହେକ୍ଟର ଜମିରେ କରିଛନ୍ତି ଟସର ଚାଷ । ସରକାରଙ୍କ ସିକୃତି ପ୍ରାପ୍ତ ସମବାୟ ସମିତି ଜଗମୋହନପୁର ଟସର ସୋସାଇଟରୁ ସରକାରଙ୍କ ପ୍ରଦତ ରୋଗ ମୁକ୍ତ ରେଶମ ଅଣ୍ଡା ଆଣି ଚାଷ କରିଛି ଚାଷୀ । କିଲୋ ପ୍ରତି ୬ହଜାର ଟଙ୍କା ଦେଇ ଡି.ଏଲ.ଏଫ ଅଣ୍ଡା ଆଣି ଚାଷ କରିଥିବା ଚାଷୀର ସ୍ୱପ୍ନ ଭାଙ୍ଗି ଯାଇଛି ।
ଅଣ୍ଡା ଫାଟିବା ସମୟରେ ସରକାର ଔଷଧ ଯୋଗାଇବାରେ ବିଳମ୍ବ ସାଙ୍ଗକୁ ନିମ୍ନମାନର ବିହନ ଯୋଗୁଁ ରେଶମ ପୋକ ଲାଗିବା ପୂର୍ବରୁ ଅଣ୍ଡା ସବୁ ଶୁଖି ଝଡି ପଡିଛି । ଏନେଇ ବାରମ୍ବାର ବିଭାଗୀୟ ଅଧିକାରୀଙ୍କୁ ଜଣାଇଲେ ସୁଦ୍ଧା ଏଯାଏଁ ଚାଷୀଙ୍କ ନିକଟରେ କୌଣସି ବିଭଗୀୟ କର୍ମଚାରୀ ପହଂଚି ପାରିନଥିବା ଅଭିଯୋଗ ହୋଇଛି । ଏଣେ ୩୦ଲକ୍ଷରୁ ଅଧିକ ଟଙ୍କା କ୍ଷତି ସହିଥିବା ଚାଷୀଙ୍କୁ ଏବେ ଋଣ ପରିଶୋଧ ଚିନ୍ତାରେ ଘାରିଛି ।
ଟସର ଚାଷୀଙ୍କ ଅଭିଯୋଗକୁ ସ୍ୱୀକାର କରିଛନ୍ତି ତେଲକୋଇ ଟସର ସମବାୟ ସମିତିର ସଂପାଦକ । କହିଛନ୍ତି, ବିଭିନ୍ନ କାରଣରୁ ରେଶମ ପୋକ ମରିଥାନ୍ତି, ନିମ୍ନ ମାନର ଅଣ୍ଡା ବିହନ ମଧ୍ୟ ଏକ କାରଣ । ଚଳିତ ବର୍ଷ ଉଜୁଡି ଯାଇଥିବା ଟସର ଚାଷ ପାଇଁ କ୍ଷତି ପୁରଣ ଦିଆନଗଲେ ଆଉ ଟସର ଚାଷ କରିବେ ନାହିଁ ବୋଲି ଚେତାବନୀ ଦେଇଛନ୍ତି ଚାଷୀ ।