କେସିଆରଙ୍କୁ ପସନ୍ଦ ଆସିଲା ନବୀନଙ୍କ ‘କାଳିଆ’ ଯୋଜନା ! ନବୀନଙ୍କ ୧୮ ବର୍ଷର ଶାସନ ଓ ନେତୃତ୍ୱକୁ କଲେ ଭୁରି ଭୁରି ପ୍ରଂଶସା
କନକ ବ୍ୟୁରୋ : ଦେଶର ରୋଲ ମଡେଲ ହେଉଛନ୍ତି ଓଡିଶାର ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । ଦୁଇ ଦିନିଆ ଓଡିଶା ଗସ୍ତରେ ଆସିଥିବା ତେଲେଙ୍ଗାନା ମୁଖ୍ୟମନ୍ତ୍ରୀ କେସିଆର ନବୀନଙ୍କୁ ଭେଟିବା ପରେ ନବୀନଙ୍କ ସରକାରଙ୍କ କାମକୁ ପ୍ରଂଶସାରେ ପୋତି ପକାଇଛନ୍ତି । ଦେଶର ବଡ ନେତାଙ୍କ ତାଲିକାରେ ନବୀନଙ୍କ ନାଁକୁ ଯୋଡିଛନ୍ତି କେସିଆର ।
Kanak News is now on WhatsApp
Join and get latest news updates delivered to you via WhatsApp
ନବୀନ ନିବାସରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁ ଭେଟିବା ପରେ କେସିଆର ନିଜ ପ୍ରତିକ୍ରିୟାରେ ବିଜେଡି ସରକାରର ୧୮ ବର୍ଷ ଶାସନକୁ ବେଶ ପ୍ରଂଶସା କରିଛନ୍ତି । ଖାସକରି କୃଷକ ମାନଙ୍କ ପାଇଁ ନବୀନ ଯେଉଁ ଯୋଜନା କରୁଛନ୍ତି ତାହା ବାସ୍ତବରେ ପ୍ରଂଶସନୀୟ । ଏପରିକି ଦୁଇ ଦିନ ପୂର୍ବେ ଘୋଷଣା ହୋଇଥିବା କାଳିଆ ଯୋଜନାକୁ ମଧ୍ୟ ଭୁରି ଭୁରି ପ୍ରଂଶସା କରିଛନ୍ତି ତେଲେଙ୍ଗାନା ମୁଖ୍ୟମନ୍ତ୍ରୀ । ଓଡିଶା ପାଇଁ ନବୀନ ଅନେକ ଗୁଡିଏ ଭଲ କାମ କରିଛନ୍ତି ଖାସକରି କୃଷକଙ୍କ ପାଇଁ ନବୀନ ଯେଉଁ ପଦକ୍ଷେପ ନେଇଛନ୍ତି ସେଥିପାଇଁ ଧନ୍ୟବାଦ ଜଣାଇଛନ୍ତି କେସିଆର । ନବୀନଙ୍କ ଭଳି ନିସ୍ୱାର୍ଥପର ମୁଖ୍ୟମନ୍ତ୍ରୀ ଦେଶ ପାଇଁ ରୋଲ୍ ମଡେଲ ବୋଲି କହିବାକୁ ପଛାଇନାହାନ୍ତି କେସିଆର । ନବୀନଙ୍କ ଭଳି ନେତା ପାଇଁ ସେ ଗର୍ବିତ ବୋଲି କହିଛନ୍ତି କେସିଆର ।
ଏହାଛଡା ବିଧାନସଭା ଓ ସଂସଦରେ ମହିଳାଙ୍କ ପାଇଁ ୩୩% ସଂରକ୍ଷଣ ରଖିିବାକୁ ନବୀନ ଯେଉଁ ଦାବି ଉଠାଇଛନ୍ତି ତାହାକୁ ମଧ୍ୟ ସମର୍ଥନ କରିଛନ୍ତି କେସିଆର । ଏହି ଭେଟଘାଟ ପରେ ୨୦୧୯ ପୂର୍ବରୁ ଫେଡରାଲ ଫ୍ରଣ୍ଟର ଗଠନ ନେଇ ଚର୍ଚ୍ଚା ଜୋର ଧରିଛି । ଏପରିକି ଦେଶରେ ପରିବର୍ତ୍ତନ ଆବଶ୍ୟକ ଓ ବିଜେପି ଓ କଂଗ୍ରେସର ବିକଳ୍ପ ଆବଶ୍ୟକ ବୋଲି କେସିଆର କହିଛନ୍ତି । ଆଉ ଏହି ଚର୍ଚ୍ଚାକୁ ଆଉ ଟିକିଏ ଖୋରାକ ଯୋଗାଇଛି ନବୀନଙ୍କ ବୟାନ । ନବୀନ କହିଛନ୍ତି, ସମଭାବାପନ୍ନ ଦଳ ଗୁଡିକ ସହ ବନ୍ଧୁତା ନେଇ ଆଲୋଚନା ହୋଇଛି । ଆଉ ଏଭଳି କହି ଫେଡରାଲ ଫ୍ରଣ୍ଟ ଗଠନକୁ ଆଉ ଟିକିଏ ଜାଳେଣି ଦେଇଛନ୍ତି ନବୀନ । ସିଧାସଳଖ ଫେଡରାଲ ଫ୍ରଣ୍ଟ ଗଠନ ନେଇ କେହି ମୁହଁ ଖୋଲିନଥିଲେ ମଧ୍ୟ ବିଜେପି ଓ କଂଗ୍ରେସ ବିକଳ୍ପ ଭାବେ ସବୁ ଆଞ୍ଚଳିକ ଦଳ ଏକାଠି ହେବା ଆବଶ୍ୟକ ବୋଲି କହିଛନ୍ତି କେସିଆର ।
ଅନ୍ୟପଟେ କେସିଆରଙ୍କ ଟିଆରଏସକୁ ବିଜେପି ଓ କଂଗ୍ରେସର ବି ଟିମ୍ କୁହାଯାଉଥିବା ପ୍ରଶ୍ନର ଉତ୍ତରରେ କେସିଆର କହିଛନ୍ତି ଏହା ହେଉଛି ଦେଶର ସବୁଠୁ ବଡ ଜୋକ । ଆଉ କଥା ମଝିରେ ନବୀନ କହିଛନ୍ତି ଆମେ କାହାର ବି ଟିମ୍ ନୁହେଁ । ଆମେ ସମସ୍ତେ ହେଉଛୁ ଷ୍ଟେଟ ଟିମ୍ । ଆଉ ଏଭଳି କହି ଫେଡରାଲ ଫ୍ରଣ୍ଟ ଚର୍ଚ୍ଚାକୁ ଉଜ୍ଜୀବୀତ କରିଛନ୍ତି ନବୀନ । ଏହାପୂର୍ବରୁ ହକି ବିଶ୍ୱକପର ଆୟୋଜନ କରି ନବୀନ ବାହାବା ନେଇଥିବା ବେଳେ ଏବେ ୧୮ ବର୍ଷର ଶାସନର ସାର୍ଟିଫିକେଟ ଦେଇଛନ୍ତି ତେଲେଙ୍ଗାନା ମୁଖ୍ୟମନ୍ତ୍ରୀ । ମହିଳା ଓ କୃଷକଙ୍କ ପ୍ରସଙ୍ଗରେ ନବୀନ ସରକାରଙ୍କୁ ଢେର ପ୍ରଂଶସା କରିଛନ୍ତି କେସିଆର ।