କର୍ଣ୍ଣାଟକରେ ସରକାର ଗଢିବା ଆଶାରେ ଭାରତୀୟ ଜନତାପାର୍ଟି ! ୟେଦୁରପ୍ପା କହିଲେ ବଜେଟ ଆସିବା ପର୍ଯ୍ୟନ୍ତ କରିବୁ ଅପେକ୍ଷା ?
କନକ ବ୍ୟୁରୋ : କର୍ଣ୍ଣାଟକ ରାଜନୀତିରେ ଘଡିକେ ଘୋଡା ଛୁଟୁଛି । କଂଗ୍ରେସ ସହ ମେଣ୍ଟ କରି ସରକାର ଗଠନ କରିବା ପରେ ଜେଡିଏସ ଦଳ ଭିତରେ ଥମିବାରେ ନା ଧରୁନି କନ୍ଦଳ । ସମସ୍ତେ କ୍ଷମତା ପାଇଁ ବିକଳ । ଯାହାକୁ କ୍ଷମତା ନ ମିଳିଛି ସେ ଦଳରୁ ବାହାରି ଯିବା ଲାଗି ଧମକ ମଧ୍ୟ ଦେଉଛନ୍ତି ବୋଲି ଚର୍ଚ୍ଚା ଜୋର ଧରିଛି । ଏ ପଟେ ବିଜେପି ସେଠାରେ ସରକାର ଗଠନ କରିବା ଲାଗି ଅଣ୍ଟାମଧ୍ୟ ଭିଡୁଥିବା ଚର୍ଚ୍ଚା ହେଉଛି ।
Kanak News is now on WhatsApp
Join and get latest news updates delivered to you via WhatsApp
ଠିକ୍ ଏତିକି ବେଳେ କର୍ଣ୍ଣାଟକର ବିଜେପି ରାଜ୍ୟ ସଭାପତି ବି. ଏସ ୟେଦୁରୁପ୍ପା ଶନିବାର କହିଛନ୍ତି ଯେ, ଯେଉଁ କଂଗ୍ରେସ ଓ ଜେଡିଏସ ନେତା ଆମ ଦଳରେ ସାମିଲ ହେବା ଲାଗି ଚାହୁଁଛନ୍ତି ସେମାନଙ୍କୁ ସ୍ୱାଗତ । ଏହା ସହ ୟେଦୁରୁପ୍ପା କହିଛନ୍ତି ବିଜେପିର କୈାଣସି ନେତା ଡରିବାର ଆବଶ୍ୟକତା ନାହିଁ । କାରଣ ଅନ୍ୟ ଲୋକ ଆମ ଦଳକୁ ଆସିଲେ ବି ଦଳରେ ପୂର୍ବରୁ ଥିବା ଲୋକମାନଙ୍କର ସ୍ଥାନ ସେମାନଙ୍କୁ ମିଳିବ । ସେମାନେ ଆସିଲେ ଆମେ ସେମାନଙ୍କ ସହ ମିଶିକି ଅଧିକ କାମ କରିବା ।
ୟେଦୁରୁପ୍ପା ଶୁକ୍ରବାର ଦିନ ଦାବି କରିଛନ୍ତି ଯେ, ଆମ ଦଳରେ ବିରୋଧୀ ଦଳର ଅନେକ ନେତା ମିଶିବା ନେଇ ପ୍ରସ୍ତୁତ ହେଲେଣି । ବିଜେପିର ରାଜ୍ୟ କାର୍ଯ୍ୟକାରିଣୀ ବୈଠକରେ ସେ ଏହା କହିଛନ୍ତି । ଏହା ସହ ଜେଡିଏସ ଓ କଂଗ୍ରେସର ମେଣ୍ଟଣ୍ଟ ସରକାରକୁ ଅପବିତ୍ର ମଧ୍ୟ କହିଥିବା ଜଣାପଡିଛି ।
“ମେଣ୍ଟ ସରକାର ଯେପରି ଭାବରେ କାମ କରୁଛି ତାହା ଦେଖିଲେ ସ୍ପଷ୍ଟ ଭାବରେ ଜଣାପଡୁଛି ଯେ, ଆଗାମୀ ୫ ବର୍ଷ ଏ ସରକାରରେ ତିଷ୍ଠି ପାରିବେ ନାହିଁ । ତେଣୁ ଆମେ ବଜେଟ ଅଧିବେଶନ ପରେ ହିଁ କିଛି ପଦକ୍ଷେପ ନେବୁ । ସେମାନେ ଯେପରି ଭାବରେ ତରତର ହୋଇ କାମ କରୁଛନ୍ତି । ଆମେ ସେପରି କେବେ ବି କରିବୁ ନାହିଁ । ଠିକ ସମୟ ଆସିଲେ ଠିକ କାମ କରିବୁ” ବୋଲି ପୂର୍ବତନ ମୁଖ୍ୟମନ୍ତ୍ରୀ ତଥା ବିରୋଧୀ ଦଳ ନେତା ୟେଦୁରୁପ୍ପା କହିଛନ୍ତି ।
ନିଜ ଦଳୀୟ କର୍ମୀଙ୍କୁ ଦେଲେ ୨୦୧୯ ନିର୍ବାଚନୀ ମନ୍ତ୍ର
ଦଳୀୟ ନେତାମାନଙ୍କୁ ଉଚ୍ଛାହିତ କରିବା ଲାଗି ୨୦୧୯ ରେ ୨୮ ଟି ଲୋକସଭା ସିଟରୁ ୨୫ ଟି ରେ ବିଜେପି ନିଶ୍ଚୟ ଭାବରେ ଜିତିବ ବୋଲି ୟେଦୁରୁପ୍ପା କହିଛନ୍ତି । ନିଜ ଭାଷଣରେ ମେଣ୍ଟ ସରକାରକୁ ସମାଲୋଚନା ମଧ୍ୟ କରିଛନ୍ତି । ଆମ ଦଳକୁ ଆସିଲେ ଆତ୍ମସମ୍ମାନ ସହ କାମ କରିବା ଲାଗି ସୁଯୋଗ ପାଇପାରିବ ବୋଲି ଅନ୍ୟ ଦଳ ନେତାଙ୍କ ଉଦ୍ଦେଶ୍ୟରେ ସେ କହିଛନ୍ତି । ବିଜେପି ନିଶ୍ଚୟ ଭାବରେ ସରକାର କରିବ ବୋଲି ସେ ଦୃଢ ଦାବି କରିଆସୁଛନ୍ତି ।
ଅମିତ ଶାହାଙ୍କୁ ଭେଟିଲା ପରେ ୟେଦୁରୁପ୍ପାଙ୍କ ବଢିଲା ମନୋବଳ
ଅହମ୍ମଦାବାଦଠାରେ ବିଜେପି ରାଷ୍ଟ୍ରୀୟ ସଭାପତି ଅମିତ ଶାହାଙ୍କୁ ଭେଟିଲା ପରେ ସେ ବାରମ୍ବାର କହି ଆସୁଛନ୍ତି କି ବିରୋଧୀମାନେ ସେମାନଙ୍କ ଦଳକୁ ଆସିବାକୁ ଅପେକ୍ଷା କରି ବସିଛନ୍ତି । ତେବେ କେଉଁ ନେତା ଆସିବେ ବୋଲି ପଚାରିଲେ ଅପେକ୍ଷା କରନ୍ତୁ ବଳେ ଦେଖିବେ ବୋଲି ୟେଦୁରୁପ୍ପା କହୁଛନ୍ତି । ବିଧାନ ସଭାରେ ଆମେ ସଂଖ୍ୟା ଗରିଷ୍ଠତା ଦେଖାଇ ପାରିନାହୁଁ । କିନ୍ତୁ ଅଗାମୀ ଦିନରେ ଆମେ ମାନେ ନିଶ୍ଚୟ ଭାବରେ ସରକାର ଗଠନ କରିବୁ ବୋଲି ସେ ଦାବୀର ସହ କହିଛନ୍ତି ।