କର୍ଣ୍ଣାଟକ ବିଧାନସଭା ନିର୍ବାଚନ ପାଇଁ ଆଜି ହୋଇପାରେ ତାରିଖ ଘୋଷଣା !ଦିନ ୧୧ଟାରେ ମୁଖ୍ୟ ନିର୍ବାଚନ କମିଶନଙ୍କ ସାମ୍ବାଦିକ ସମ୍ମିଳନୀ
କନକ ବ୍ୟୁରୋ : ଆଜି କର୍ଣ୍ଣାଟକ ବିଧାନସଭା ନିର୍ବାଚନ ପାଇଁ ହୋଇପାରେ ତାରିଖ ଘୋଷଣା । ଆଜି ନିର୍ବାଚନ କମିଶନ ନିର୍ବାଚନ ତାରିଖ ନେଇ ଘୋଷଣା କରିବାର ସମ୍ଭାବନା ରହିଛି । ଆସନ୍ତା ଜୁନ୍ ୩ ତାରିଖରେ କର୍ଣ୍ଣାଟକରେ ସିଦ୍ଧରମେୟା ସରକାରଙ୍କ କାର୍ଯ୍ୟକାଳ ଶେଷ ହେବ । କର୍ଣ୍ଣାଟକ ବିଧାନସଭାର ମୋଟ୍ ସଦସ୍ୟ ସଂଖ୍ୟା ୨୨୫ । ଏଥିରୁ ୨୨୪ ସିଟରେ ନିର୍ବାଚନ କରାଯାଇଥାଏ । ବାକି ଗୋଟିଏ ଆସନ ପାଇଁ ଜଣେ ଆଂଗ୍ଲୋ ଇଣ୍ଡିଆନ ମନୋନୀତ ହୋଇଥାନ୍ତି । ଗୁଜୁରାଟ ନିର୍ବାଚନ ପରେ ଉଭୟ ବିଜେପି ଓ କଂଗ୍ରେସ କର୍ଣ୍ଣାଟକକୁ ଫୋକସରେ ରଖିଛନ୍ତି । ସେଥପାଇଁ ଲଗାତାର କଂଗ୍ରେସ ଅଧ୍ୟକ୍ଷ ରାହୁଲ ଗାନ୍ଧି ଓ ବିଜେପିର ରାଷ୍ଟ୍ରୀୟ ଅଧ୍ୟକ୍ଷ ଅମିତ୍ ଶାହ, ୟୁପି ମୁଖ୍ୟମନ୍ତ୍ରୀ ଆଦିତ୍ୟନାଥ ଯୋଗୀ ଗସ୍ତ କରିଛନ୍ତି । କର୍ଣ୍ଣାଟକରେ ଚଳିତ ନିର୍ବାଚନରେ କଂଗ୍ରେସ ଓ ବିଜେପି ମଧ୍ୟରେ କଡ଼ା ଟକ୍କରର ହେବାର ସମ୍ଭାବନା ରହିଛି ।
Kanak News is now on WhatsApp
Join and get latest news updates delivered to you via WhatsApp
ଗୋଟିଏ ପରେ ଗୋଟିଏ ଦେଶର ୨୧ଟି ରାଜ୍ୟ ଦଖଲ କରିସାରିଥିବା ବିଜେପି ଏବେ କର୍ଣ୍ଣାଟକ ଦଖଲ ଅଭିଯାନ ଆରମ୍ଭ କରିଛି । ସେପଟେ ରାଜ୍ୟର ଶାସକ ଦଳ କଂଗ୍ରେସ କ୍ଷମତା ବଜାୟ ରଖିବାକୁ ସମସ୍ତ ପ୍ରୟାସ ଜାରି ରଖିଛି। ଏବେ କେବଳ ମାତ୍ର ଦୁଇଟି ବଡ଼ ରାଜ୍ୟ କର୍ଣ୍ଣାଟକ ଓ ପଂଜାବ କଂଗ୍ରେସ ହାତରେ ରହିଛି । ବିଜେପି କର୍ଣ୍ଣାଟକ ପାଇଁ ନିଜର ମୁଖ୍ୟମନ୍ତ୍ରୀ ପ୍ରାର୍ଥୀ ଘୋଷଣା କରିସାରିଛି । ପୂର୍ବତନ ମୁଖ୍ୟମନ୍ତ୍ରୀ ବି.ଏସ୍.ୟେଦୁରପ୍ପାଙ୍କ ନେତୃତ୍ୱରେ ବିଜେପି ନିର୍ବାଚନ ଲଢ଼ିବ ବୋଲି ଦଳ ଅଧ୍ୟକ୍ଷ ଅମିତ ଶାହ ଘୋଷଣା କରିସାରିଛନ୍ତି । ୨୦୧୯ ସାଧାରଣ ନିର୍ବାଚନ ପୂର୍ବରୁ କର୍ଣ୍ଣାଟକ ନିର୍ବାଚନ ବିଜେପି ପାଇଁ ସବୁଠାରୁ ବଡ଼ ଚ୍ୟାଲେଂଜ ବୋଲି ଚର୍ଚ୍ଚା ହେଉଛି। ଅନ୍ୟପଟେ କଂଗ୍ରେସ ତା’ର ଗଡ଼ ବଜାୟ ରଖିବା ପାଇଁ ମଧ୍ୟ ପୁରା ଚେଷ୍ଟା ଚଳାଇଛି ।