ଆରମ୍ଭରୁ ବାଟବଣା ହେଲା କେନ୍ଦ୍ର ସରକାରଙ୍କ ଆୟୁଷ୍ମାନ ଭାରତ ଯୋଜନା : ଯୋଗ୍ୟ ହିତାଧିକାରୀଙ୍କ ପରିବର୍ତ୍ତେ ତାଲିକାରେ ଅଛି ମନ୍ତ୍ରୀ ଓ ବିଧାୟକଙ୍କ ନାମ
କନକ ବ୍ୟୁରୋ : କେନ୍ଦ୍ର ସରକାରଙ୍କ ଆୟୁଷ୍ମାନ ଭାରତ ଯୋଜନା ମାତ୍ର କିଛି ଦିନ ପୂର୍ବରୁ ଆରମ୍ଭ ହୋଇଛି । କିନ୍ତୁ ଯୋଜନା ଆରମ୍ଭ ହେଉ ହେଉ ଅନେକ ଗଡ଼ବଡ଼ି ସାମ୍ନାକୁ ଆସିଲାଣି । ଯୋଗ୍ୟ ହିତାଧିକାରୀଙ୍କ ପରିବର୍ତ୍ତେ ଅନେକ ନେତାମନ୍ତ୍ରୀଙ୍କ ନାମ ଏହି ଯୋଜନାରେ ସାମିଲ ରହିଛି । ଆୟୁଷ୍ମାନ୍ ଭାରତ ଯୋଜନା ତାଲିକାରେ ଉତ୍ତରପ୍ରଦେଶର ବ୍ୟକାବିନେଟ୍ ମନ୍ତ୍ରୀ ସତିଶ ମହାନାଙ୍କ ସମେତ ଅନେକ ନେତାମନ୍ତ୍ରୀଙ୍କ ନାମ ଚଢ଼ାଯାଇଛି ।
Kanak News is now on WhatsApp
Join and get latest news updates delivered to you via WhatsApp
ସୂଚନା ଅନୁସାରେ ଆୟୁଷ୍ମାନ୍ ଯୋଜନା ତାଲିକାରେ କ୍ୟାବିନେଟ୍ ମନ୍ତ୍ରୀ ସତୀଶ ମହାନାଙ୍କ ବ୍ୟତୀତ ପୂର୍ବ କଂଗ୍ରେସ ବିଧାୟକ ଅଜୟ କପୁର,ବିଜେପି ବିଧାୟକ ସଲିଲ ବିଶୋଇଙ୍କ ସହ ସେହି ଅଂଚଳର ଅନେକ ନେତାମନ୍ତ୍ରୀ ଓ ତାଙ୍କ ପରିବାର ଲୋକଙ୍କ ନାମ ସାମିଲ ଅଛି ।
ତେବେ ତାଲିକାରେ କେବଳ ନେତା ମନ୍ତ୍ରୀଙ୍କ ନାମ ନୁହେଁ ବରଂ ସହରର ଅନେକ କୋଟିପତି ଲୋକଙ୍କ ନାମ ମଧ୍ୟ ସାମଲି ଅଛି । ଗଡ଼ବଡ଼ି ମାମଲାରେ ସାମନା ଆସିବା ପରେ ମନ୍ତ୍ରୀ ଯାଂଚ କରିବା ପାଇଁ କହିଛନ୍ତି । ମନ୍ତ୍ରୀ ସତୀଶ ମହାନା କହିଛନ୍ତି ଯେତେବେଳ ମୁଁ ଜାଣିଲି ମୋର ଓ ମୋ ପରିବାରର ନାମ ଆୟୁଷ୍ମାନ ଯୋଜନା ତାଲିକାରେ ସାମିଲ ଅଛି, ମୁଁ ତୁରନ୍ତ କାନପୁର ଜିଲ୍ଲାଧିକାରୀଙ୍କ ସହ ଆଲୋଚନା କରି ଯାଂଚ କରିବା ପାଇଁ ନିର୍ଦ୍ଦେଶ ଦେଇଛି ।
ସୂଚନାଯୋଗ୍ୟ ଗରିବଙ୍କ ପାଇଁ ଆରମ୍ଭ ହୋଇଛି ଆୟୁଷ୍ମାନ ଯୋଜନା । ଗରିବ,ଗ୍ରାମିଣ ପରିବାର ଏବଂ ସହରର ଶ୍ରମିକ ଶ୍ରେଣୀର ପରିବାରକୁ ଏହି ଯୋଜନାର ଫାଇଦା ମିଳିବ । ଜନଗଣନା ଆଧାରରେ ଏବେ ପର୍ଯ୍ୟନ୍ତ ୮.୦୩% ଗ୍ରାମୀଣ ଏବଂ ୨.୩୩% ସହର ପରିବାରକୁ ଏହି ଯୋଜନାରେ ସାମିଲ କରାଯାଇଛି । ଗରିବ ପରିବାରରେ ସ୍ୱାସ୍ଥ୍ର୍ୟ ସମ୍ବନ୍ଧୀୟ କିଛି ଅସୁବିଧା ଉପୁଜିଲେ, ସରକାରଙ୍କ ତରଫରୁ ୫ ଲକ୍ଷ ଟଙ୍କାର ସାହାଯ୍ୟ ମିଳିବ । ଯୋଜନା ମୁତାବକ,ହସ୍ପିଟାଲରେ ଭର୍ତ୍ତି ହେବାର ୩ ଦିନ ପୂର୍ବରୁ ନେଇ ୧୫ ଦିନ ପର୍ୟ୍ୟନ୍ତର ଔଷଧ ଏବଂ ଚିକିତ୍ସାର ଖର୍ଚ୍ଚ ସରକାର ବହନ କରିବେ । ଯଦି କୌଣସି ବ୍ୟକ୍ତି ପୂର୍ବରୁ ରୋଗରେ ପୀଡିତ ଥିବେ ତେବେ ଏହି ଯୋଜନାର ଫାଇଦା ତାଙ୍କୁ ମିଳିବ । ଗତ ମାସରେ ପ୍ରଧାନମନ୍ତ୍ରୀ ମୋଦି ଝାଡଖଣ୍ଡର ଏହି ଯୋଜନାର ଶୁଭାରମ୍ଭ କରିଥିଲେ ।