ଗଣତନ୍ତ୍ରରେ ଏଭଳି ଚିତ୍ର କମ ଦେଖିବାକୁ ମିଳେ ! ଶିବରାଜଙ୍କ ହାତ ଧରିଲେ କମଲନାଥ, ଏହା ପଛରେ ରହିଛି କି ରାହୁଲଙ୍କ ହାତ ?
ମଧ୍ୟପ୍ରଦେଶର ୧୮ତମ ମୁଖ୍ୟମନ୍ତ୍ରୀ ଭାବେ ଶପଥ ନେଇଛନ୍ତି କମଲନାଥ । ରାଜ୍ୟପାଳ ଆନନ୍ଦୀବେନ୍ ପଟେଲ ଆଜି ୨.୩୦ ମିନିଟ୍ ସମୟରେ କମଲନାଥଙ୍କୁ ଶପଥ ପାଠ କରାଇଛନ୍ତି । ଶପଥ ଗ୍ରହଣ ସମାରୋହରେ ପୂର୍ବତନ ପ୍ରଧାନମନ୍ତ୍ରୀ ମନେମାହନ ସିଂହ, କଂଗ୍ରେସ ଅଧ୍ୟକ୍ଷ ରାହୁଲ ଗାନ୍ଧି, ଏନସିପି ଅଧ୍ୟକ୍ଷ ଶରଦ ପାୱାରଙ୍କ ସମେତ ଅନ୍ୟ ୧୧ଟି ଦଳର ନେତାମାନେ ଉପସ୍ଥିତ ଥିଲେ । ଏମାନଙ୍କ ବ୍ୟତୀତ, ମଧ୍ୟପ୍ରଦେଶର ୪ଜଣ ପୂର୍ବତନ ମୁଖ୍ୟମନ୍ତ୍ରୀ ଶିବରାଜ ସିଂହ ଚୌହାନ, ବାବୁଲାଲ୍ ଗୌର, ଦିଗବିଜୟ ସିଂହ ଏବଂ କୈଲାଶ ଜୋଶୀ ମଧ୍ୟ ଶପଥ ଗ୍ରହଣ ଉତ୍ସବରେ ପହଞ୍ଚିଥିଲେ ।
Kanak News is now on WhatsApp
Join and get latest news updates delivered to you via WhatsApp
କମଲନାଥଙ୍କ ଶପଥ ଗ୍ରହଣ ଉତ୍ସବରେ ଏପରି ଏକ ଦୃଶ୍ୟ ଦେଖିବାକୁ ମିଳିଥିଲା, ଯାହା ଏବେ ଚର୍ଚ୍ଚାର କେନ୍ଦ୍ରବିନ୍ଦୁ ପାଲଟିଛି । ମଞ୍ଚ ଉପରକୁ ଆସିବା ପରେ କମଲନାଥ, ନେତାମାନଙ୍କୁ ଏବଂ ଲୋକମାନଙ୍କୁ ଅଭିବାଦନ କରିବା ସର ନିଜ ପରିବାର ପାଖରେ ଯାଇ ବସିଥିଲେ । ତେବେ ମଞ୍ଚର ଅନ୍ୟ ପାଖରେ ବସିଥିଲେ କଂଗ୍ରେସ ଅଧ୍ୟକ୍ଷ ରାହୁଲ ଗାନ୍ଧି । ରାହୁଲ କମଲନାଥଙ୍କୁ ପାଖକୁ ଡାକିବା ସହ ତାଙ୍କ କାନରେ କିଛି କହୁଥିବାର ଦୃଶ୍ୟ ଦେଖିବାକୁ ମିଳିଥିଲା ।
ରାହୁଲଙ୍କ ସହ କଥା ହୋଇସାରିବା ପରେ କମଲନାଥ ଅନ୍ୟ କୌଣସି ନେତାମାନଙ୍କୁ ସାକ୍ଷାତ କରିବା ପୂର୍ବରୁ ସିଧା ଯାଇ ପହଞ୍ଚିଥିଲେ, ପୂର୍ବତନ ମୁଖ୍ୟମନ୍ତ୍ରୀ ଶିବରାଜ ସିଂହ ଚୌହାନଙ୍କ ପାଖରେ । ଆଉ ଏହାରି ଭିତରେ ସେଠାରେ ପହଞ୍ଚିଥିଲେ ଜ୍ୟୋତିରାଦିତ୍ୟ ସିନ୍ଧିଆ ! କମଲନାଥ ଏବଂ ଜ୍ୟୋତିରାଦିତ୍ୟ ସିନ୍ଧିଆ ମିଶି ଶିବରାଜଙ୍କ ହାତକୁ ଉପରକୁ ଟେକିବା ସହ ଲୋକମାନଙ୍କ ଅଭିଭାଦନ କରିଥିଲେ । ନେତାମାନଙ୍କୁ ଏକାଠି ଦେଖି ଲୋକମାନଙ୍କ ମଧ୍ୟରେ ଉତ୍ସାହ ଭରିଯାଇଥିଲା ।