ଆସିଲା ମୋଦିଙ୍କ ଅତିଥିଙ୍କ ତାଲିକା । ପ୍ରଧାନମନ୍ତ୍ରୀଙ୍କ ଶପଥ ସମାରୋହରେ କମଲ ହାସନଙ୍କୁ କରାଗଲା ଆମନ୍ତ୍ରଣ
ଚଳିତ ନିର୍ବାଚନରେ ଐତିହାସିକ ବିଜୟ ହାସଲ କରିବା ପରେ ଏବେ ନରେନ୍ଦ୍ର ମୋଦିଙ୍କ ଶପଥ ଗ୍ରହଣ ଉତ୍ସବକୁ ନେଇ ଚାଲିଛି ଜୋରିଦାର ପ୍ରସ୍ତୁତି । ତେବେ କୁହାଯାଉଛି କି ଏଥରକ ମୋଦିଙ୍କ ଶପଥ ଗ୍ରହଣ ସମାରୋହ ପୂର୍ବ ଅପେକ୍ଷା ବହୁତ ଧୂମଧାମରେ କରାଯିବ । ଯାହାର ପ୍ରସ୍ତୁତି ଏବେଠୁ ଆରମ୍ଭ ହୋଇଗଲାଣି । ଅନ୍ୟପଟେ, ମୋଦିଙ୍କ ଶପଥ ସମାରୋହରେ କେଉଁମାନେ ଯୋଗେ ଦେବେ ତାର ତାଲିକା ମଧ୍ୟ ଆସିସାରିଛି ।
Kanak News is now on WhatsApp
Join and get latest news updates delivered to you via WhatsApp
ତେବେ ମୋଦିଙ୍କ ଶପଥ ଗ୍ରହଣ ଉତ୍ସବରେ ଦକ୍ଷିଣ ସୁପରଷ୍ଟାର ଏବଂ ନିକଟରେ ରାଜନୀତିରେ ଏଂଟ୍ରି ମାରିଥିବା କମଲ ହାସନଙ୍କୁ ଯୋଗ ଦେବେ ବୋଲି ମିଳିଥିବା ଖବରରୁ ଜଣାପଡିଛି । କମଲ ହାସନ ଲଗାତର ଭାବେ ଭାରତୀୟ ଜନତା ପାର୍ଟିର ବିରୋଧ କରିଆସିଛନ୍ତି । ତାମିଲନାଡୁରେ ସେ ବିଜେପି ଏବଂ ନରେନ୍ଦ୍ର ମୋଦିଙ୍କ ବିରୋଧରେ ମୋର୍ଚ୍ଚା ଖୋଲିଥିଲେ । ତାଙ୍କ ଦଳ ମକ୍କଲ ନିଧି ମିୟାମ ଚଳିତ ଥର ଲୋକସଭା ନିର୍ବାଚନରେ ନିଜ ଭାଗ୍ୟ ପରୀକ୍ଷା କରିଥିଲେ । କିନ୍ତୁ ଦୁର୍ଭାଗ୍ୟବଶତଃ ତାଙ୍କର କୌଣସି ବି ପ୍ରାର୍ଥୀ ବିଜୟ ହାସଲ କରିପାରିନଥିଲେ । ଏହାଛଡା ଟିଆରଏସର ମୁଖ୍ୟ କେସିଆର ଏବଂ ୱାଇଏସଆର କଂଗ୍ରେସ ଦଳର ମୁଖ୍ୟ ୱାଇ.ଏସ.ଜଗନମୋହନ ରେଡ୍ଡିଙ୍କୁ ମଧ୍ୟ ପ୍ରଧାନମନ୍ତ୍ରୀ ମୋଦିଙ୍କ ଶପଥ ଗ୍ରହଣ ଉତ୍ସବରେ ଆମନ୍ତ୍ରିତ କରାଯାଇଛି ।
ସୂଚନା ମୁତାବକ, ମେ ୩୦ ତାରିଖ ସଂଧ୍ୟା ୭ଟାରେ ରାଷ୍ଟ୍ରପତି ଭବନରେ ମୋଦି ପୁଣି ଥରେ ପ୍ରଧାନମନ୍ତ୍ରୀ ପଦବୀ ପାଇଁ ଶପଥ ନେବେ । ତାଙ୍କ ସହିତ ଅନେକ କ୍ୟାବିନେଟ ମନ୍ତ୍ରୀମାନେ ମଧ୍ୟ ଶପଥ ନେବେ । ତେବେ ମନ୍ତ୍ରୀମଣ୍ଡଳରେ କେଉଁମାନେ ସାମିଲ ହେବେ, ବର୍ତ୍ତମାନ ଏହାର ଖୁଲାସା ହୋଇପାରିନାହିଁ । ନରେନ୍ଦ୍ର ମୋଦି ଗତ ଶନିବାର ରାଷ୍ଟ୍ରପତିଙ୍କୁ ଭେଟି ସରକାର ଗଢିବା ନେଇ ଦାବି ଜଣାଇଥିଲେ ।