ସକାଳୁ କୁହୁଡି, ଦିନରେ ଖରାର ପ୍ରକୋପ ! ଟିଟଲାଗଡ ପାଲଟିଲା ତତଲାଗଡ, ହିଟୱେଭର ସତର୍କ ସୂଚନା
କନକ ବ୍ୟୁରୋ: ଆଜିଠାରୁ ରାଜ୍ୟର କିଛି ସ୍ଥାନରେ କାଳବୈଶାଖୀ ବର୍ଷା ହେବ ବୋଲି ଭୁବନେଶ୍ୱରସ୍ଥିତ ଆଞ୍ଚଳିକ ପାଣିପାଗ କେନ୍ଦ୍ର ପୂର୍ବାନୁମାନ କରିଛି । ଆଭ୍ୟନ୍ତରୀଣ ଓଡ଼ିଶାର କେତେକ ସ୍ଥାନ ସମେତ ଉପକୂଳ ଓଡିଶାରେ କାଳବୈଶାଖୀ ହୋଇପାରେ ବୋଲି ପାଣିପାଗ କେନ୍ଦ୍ର ସୂତ୍ରରୁ ସୂଚନା ମିଳିଛି । ଏହାର ପ୍ରଭାବରେ ୨୦ ତାରିଖ ପର୍ଯ୍ୟନ୍ତ ରାଜ୍ୟରେ ଗ୍ରୀଷ୍ମ ପ୍ରବାହ କମ୍ ହେବ। ୨୦ ତାରିଖ ପରଠାରୁ ରାଜ୍ୟରେ ପୁଣିଥରେ ତାତିର ପ୍ରକୋପ ବଢିବ ବୋଲି ପାଣିପାଗ କେନ୍ଦ୍ର ପକ୍ଷରୁ ସୂଚନା ଦିଆଯାଇଛି ।
Kanak News is now on WhatsApp
Join and get latest news updates delivered to you via WhatsApp
ସେପଟେ, ଖରାଦିନ ଆରମ୍ଭ ହେଉ ହେଉ ଓଡ଼ିଶାର ଟିଟିଲାଗଡ଼ ପାଲଟିଛି ଦେଶର ତତଲାଗଡ଼। ଗତକାଲି ଏଠାରେ ଦେଶର ସର୍ବୋଚ୍ଚ ତାପମାତ୍ରା ୪୦.୫ ଡିଗ୍ରି ରେକର୍ଡ ହୋଇଛି । ମଧ୍ୟାହ୍ନ ୧୨ଟାରୁ ଅପରାହ୍ନ ୨ଟା ପର୍ଯ୍ୟନ୍ତ ଏଠାରେ ତାପମାତ୍ରା ୩୮ରୁ ୪୦.୫ ଡିଗ୍ରି ମଧ୍ୟରେ ରହିଥିଲା। ପବନର ବେଗ କମ୍ ରହିଥିବାରୁ ତାପମାତ୍ରା ବଢ଼ିଥିଲା ବୋଲି ଭାରତୀୟ ପାଣିପାଗ ବିଭାଗ କହିଛି । କେବଳ ଟିଟିଲାଗଡ଼ ନୁହେଁ ସମ୍ବଲପୁର ମଧ୍ୟ ଦେଶର ଅନ୍ୟତମ ତତଲା ସହର ପାଲଟିଛି । ଏଠାରେ ଦେଶର ଦ୍ୱିତୀୟ ସର୍ବୋଚ୍ଚ ତାପମାତ୍ରା ରେକର୍ଡ କରାଯାଇଛି । ମହରାଷ୍ଟ୍ରର ଏକ ସହର ସମେତ ସମ୍ବଲପୁରର ତାପମାତ୍ରା ମିଳିତ ଭାବେ ୪୦.୩ ଡିଗ୍ରି ରହିଛି । ଦେଶର ମୋଟ ୬ଟି ସହରର ତାପମାତ୍ରା ୪୦ ଡିଗ୍ରି ଉପରେ ରହିଥିବା ବେଳେ ଓଡ଼ିଶାର ଦୁଇଟି ସହର ପ୍ରଥମ ଓ ଦ୍ୱିତୀୟ ସ୍ଥାନରେ ରହି ଉତ୍ତପ୍ତ ସହରରେ ପରିଣତ ହେବା ଚିନ୍ତା ବଢ଼ାଇଛି ।
ଚଳିତବର୍ଷ ପ୍ରଥମ ଥର ପାଇଁ ଓଡ଼ିଶାରେ ତାପମାତ୍ରା ୪୦ ଡିଗ୍ରି ଟପିଛି । ଆଞ୍ଚଳିକ ପାଣିପାଗ କେନ୍ଦ୍ର ପକ୍ଷରୁ ଗତକାଲି ଉପକୂଳ ଓଡ଼ିଶାରେ ହିଟ୍ ଓ୍ଵଭ୍ ସତର୍କ ସୂଚନା ଜାରି ହୋଇଥିବା ବେଳେ ପଶ୍ଚିମ ଓଡ଼ିଶାର ଟିଟିଲାଗଡ଼ ଓ ସମ୍ବଲପୁର ସହ ଅନ୍ୟ ସମସ୍ତ ସହରର ତାପମାତ୍ରା ମଧ୍ୟ ୩୮ ଡିଗ୍ରି ଉପରକୁ ଚାଲିଯାଇଛି । ତାଳଚେର ଓ ଅନୁଗୁଳ ସହର ବି ତାତିଛି । ତାଳଚେରର ତାପମାତ୍ରା ୩୯.୯ ଡିଗ୍ରି ଓ ଅନୁଗୁଳରେ ୩୯.୪ ଡିଗ୍ରି ରହିଥିଲା । ବଲାଙ୍ଗିରରେ ୩୯.୩, ଝାରସୁଗୁଡ଼ାରେ ୩୯.୨, ହୀରାକୁଦ ୩୯.୧, ସୋନପୁରରେ ୩୯, ଭବାନୀପାଟଣା ୩୮ ଡିଗ୍ରି ରେକର୍ଡ କରାଯାଇଛି । ଭୁବନେଶ୍ୱର ସମେତ ଉତ୍ତର ଓ ଦକ୍ଷିଣ ଓଡ଼ିଶାର କେତେକ ସ୍ଥାନରେ ପ୍ରବଳ ତାତି ଅନୁଭୂତ ହୋଇଛି । ରାଜ୍ୟର ୨୦ଟି ସହରର ତାପମାତ୍ରା ୩୫ ଡିଗ୍ରି ଉପରେ ରହିଥିବା ନେଇ ଆଞ୍ଚଳିକ ପାଣିପାଗ କେନ୍ଦ୍ର ପକ୍ଷରୁ ସୂଚନା ଦିଆଯାଇଛି ।