ଜ୍ୟୋତିରାଦିତ୍ୟଙ୍କୁ ନେଇ ସସପେନ୍ସ ବଢିଲା । ଆଜି ବିଜେପି ଶିବିରରେ ମାରିବେନି ଏଣ୍ଟ୍ରି, ଜାଣନ୍ତୁ ପଦ୍ମ ପୋଖରୀରେ କେବେ ହୋଇପାରନ୍ତି ସାମିଲ ।
କନକ ବ୍ୟୁରୋ : ଜ୍ୟୋତିରାଦିତ୍ୟ ସିନ୍ଧିଆଙ୍କୁ ନେଇ ପୁଣି ସସପେନ୍ସ । କଂଗ୍ରେସରୁ ଇସ୍ତଫା ଦେବା ପରେ ଆଜି ବିଜେପିରେ ଜ୍ୟୋତିରାଦିତ୍ୟ ସାମିଲ ହେବା ନେଇ ଚର୍ଚ୍ଚା ମଧ୍ୟ ଜୋର ଧରିଥିଲା । ଏପରିକି ପ୍ରଧାନମନ୍ତ୍ରୀ ମୋଦିଙ୍କୁ ଭେଟିବା ଏହି ଚର୍ଚ୍ଚାକୁ ଅଧିକ ଖୋରାକ ଯୋଗାଇଥିଲା ତେବେ କୌଣସି କାରଣରୁ ଆଜି ପଦ୍ମ ଦଳରେ ସାମିଲ ହୋଇନାହାନ୍ତି ଜ୍ୟୋତିରାଦିତ୍ୟ । ଏପରିକି ଦିଲ୍ଲୀ ବଦଳରେ ଭୋପାଳରେ ପଦ୍ମ ଶିବିରକୁ ଜ୍ୟୋତିରାଦିତ୍ୟ ଏଣ୍ଟ୍ରି ମାରି ପାରନ୍ତି ବୋଲି ଜାତୀୟ ଗଣମାଧ୍ୟମରେ ଚର୍ଚ୍ଚା ହେଉଛି । ଆସନ୍ତା ୧୨ କିମ୍ବା ୧୩ରେ ଭୋପାଳରେ ଗେରୁଆ କ୍ୟାମ୍ପକୁ ଜ୍ୟୋତିରାଦିତ୍ୟ ଯାଇପାରନ୍ତି ବୋଲି ଚର୍ଚ୍ଚା ହେଉଛି ।
Kanak News is now on WhatsApp
Join and get latest news updates delivered to you via WhatsApp
ମଧ୍ୟପ୍ରଦେଶ କଂଗ୍ରେସ ରାଜନୀତିର ହେଭିୱେଟ ଚେହେରା ଥିବା ଜ୍ୟୋତିରାଦିତ୍ୟ ଦୀର୍ଘ ଦିନ ହେବ ଦଳରେ ଉପେକ୍ଷିତ ହୋଇ ଆସୁଥିଲେ । ପ୍ରଥମେ ମୁଖ୍ୟମନ୍ତ୍ରୀ ଆସନ, ପରେ ପ୍ରଦେଶ ସଭାପତି ଓ ପୁଣି ରାଜ୍ୟସଭା ଆସନରୁ ଦୂରେଇ ରଖାଯିବାରୁ ଜ୍ୟୋତିରାଦିତ୍ୟଙ୍କ ଭିତରେ ଅସନ୍ତୋଷ ଚରମରେ ପହଂଚିଥିଲା । ତେଣୁ ନିଜେ ଦଳର ପ୍ରାଥମିକ ସଦସ୍ୟ ପଦରୁ ଇସ୍ତଫା ଦେବାପରେ ଦଳରେ ତାଙ୍କର ଅନୁଗତ ନେତାମାନେ ଇସ୍ତଫା ଦେଇଛନ୍ତି । ଆଉ ଶେଷର କଂଗ୍ରେସ ହାତ ଛାଡିବାକୁ ମନସ୍ଥ କରିଥିଲେ ସିନ୍ଧିଆ । ଆଉ ଏହାସହ କଂଗ୍ରେସ ସହ ଦୀର୍ଘ ୧୮ ବର୍ଷର ସମ୍ପର୍କକୁ ଛିନ୍ନ କରିଛନ୍ତି ସିନ୍ଧିଆ ।
ଏହାପୂର୍ବରୁ ଆଜି ଦିଲ୍ଲୀରେ ଅମିତ ଶାହାଙ୍କ ସହ ଯାଇ ପ୍ରଧାନମନ୍ତ୍ରୀଙ୍କୁ ଭେଟିଥିଲେ ଜ୍ୟୋତିରାଦିତ୍ୟ । ଏହାପରେ ସୋନିଆଙ୍କ ପାଖକୁ ଇସ୍ତଫା ପତ୍ର ପଠାଇଥିଲେ ଜ୍ୟୋତିରାଦିତ୍ୟ । ସିନ୍ଧିଆଙ୍କ ଇସ୍ତଫା ପରେ ତାଙ୍କ ସମର୍ଥକ ୨୨ ଜଣ ବିଧାୟକ ମଧ୍ୟ ଇସ୍ତଫା ଦେଇଛନ୍ତି । ୨୨ ବିଧାୟକ ରାଜ୍ୟପାଳଙ୍କ ପାଖକୁ ଇସ୍ତଫା ପତ୍ର ପଠାଇଥିବା ସୂଚନା ମିଳିଛି । ଏହି ଇସ୍ତଫା ପରେ ମଧ୍ୟପ୍ରଦେଶରେ କମଳନାଥ ସରକାର ଭାଙ୍ଗିବା ଏକ ପ୍ରକାର ନିଶ୍ଚିତ ହୋଇଯାଇଛି । ଅନ୍ୟପଟେ ସିନ୍ଧିଆଙ୍କ ଇସ୍ତଫାକୁ ବିଶ୍ୱାସଘାତ ବୋଲି କହିଛି କଂଗ୍ରେସ ।
ମଧ୍ୟପ୍ରଦେଶ କଂଗ୍ରେସରୁ ଜ୍ୟୋତିରାଦିତ୍ୟ ସିନ୍ଧିଆଙ୍କ ବିଦାୟ ସହ ସଂକଟରେ ପଡିଯାଇଛନ୍ତି କମଲନାଥ ସରକାର । ସଂଖ୍ୟାଲଘୁରେ ପରିଣତ ହୋଇଥିବା ସରକାର ଭାଙ୍ଗି ଯାଇପାରେ । ସିନ୍ଧିଆଙ୍କ ବିଦାୟ ପରେ ଦଳ ଛାଡିଛନ୍ତି ୨୨ ଜଣ କଂଗ୍ରେସ ବିଧାୟକ । ଏମାନଙ୍କ ଭିତରେ କମଲନାଥ ସରକାରରେ ଥିବା ମନ୍ତ୍ରୀ ମଧ୍ୟ ରହିଛନ୍ତି । ୨୦୧୮ ବିଧାନସଭା ନିର୍ବାଚନରେ ମଧ୍ୟପ୍ରଦେଶର ମୋଟ ୨୩୦ ଆସନରୁ ସର୍ବାଧିକ ୧୧୪ଟି ଆସନରେ ଜିତି ସରକାର ଗଢିଥିଲା କଂଗ୍ରେସ । ବିଜେପିକୁ ୧୦୯ଟି ଆସନ ମିଳିଥିବାବେଳେ ବିଏସପି ୨, ଏସପି ଗୋଟିଏ ଓ ସ୍ୱାଧୀନ ପ୍ରାର୍ଥୀ ୪ଟି ଆସନରେ ଜିତିଥିଲେ । ଏବେ ୨୨ ଜଣ କଂଗ୍ରେସ ବିଧାୟକଙ୍କ ଇସ୍ତଫା ପରେ ମୋଟ ସଦସ୍ୟ ସଂଖ୍ୟା ୨୦୮କୁ ଖସିଆସିଛି । ଫଳରେ ସରକାର ଗଠନ ପାଇଁ ମ୍ୟାଜିକ ନମ୍ବର ୧୦୫ । ୨୨ କଂଗ୍ରେସ ବିଧାୟକଙ୍କ ଇସ୍ତଫା ପରେ ଦଳର ସଦସ୍ୟ ସଂଖ୍ୟା ୯୨କୁ ଖସିଆସିଛି । ତେଣୁ ସରକାରରେ ରହିବା ପାଇଁ ଦଳକୁ ଆଉ ୧୩ ସଦସ୍ୟଙ୍କ ସମର୍ଥନ ଦରକାର ।
ତେବେ କମଲନାଥଙ୍କ ନେତୃତ୍ୱାଧୀନ କଂଗ୍ରେସ ସରକାରକୁ ବିଏସପିର ୨, ଏସପି ୧ ଓ ୪ ସ୍ୱାଧୀନ ସଦସ୍ୟଙ୍କ ସମର୍ଥନ ରହିଥିଲା । ଏମାନଙ୍କ ସମର୍ଥନ ପୂର୍ବପରି ରହିଲେ ମଧ୍ୟ ଆହୁରି ୬ ବିଧାୟକଙ୍କ ସମର୍ଥନ ଆବଶ୍ୟକ କରୁଛି କଂଗ୍ରେସ । ସେପଟେ କିନ୍ତୁ ସରକାର ଗଢିବା ପାଇଁ ବିଜେପି ନିକଟରେ ଆବଶ୍ୟକ ସଂଖ୍ୟା ରହିଛି । କାରଣ ଗତ ନିର୍ବାଚନରେ ଦଳ ୧୦୯ଟି ଆସନ ପାଇଛି । ପୁଣି ପରିବର୍ତିତ ସମୀକରଣରେ ଏସପି, ବିଏସପି ଓ ସ୍ୱାଧୀନ ବିଧାୟକଙ୍କ ସମର୍ଥନ କଂଗ୍ରେସ ପ୍ରତି ରହିବ ନା ବିଜେପି ପଟକୁ ଯିବ ତାକୁ ନେଇ ମଧ୍ୟ ସନ୍ଦେହ ରହିଛି । ଅନୁମାନ କରାଯାଉଛି କମଲନାଥ ସରକାର ସଂଖ୍ୟାଲଘୁରେ ପରିଣତ ହୋଇଥିବାରୁ ରାଜ୍ୟପାଳଙ୍କ ନିକଟରେ ସରକାର ଗଠନ ପାଇଁ ଦାବି ଜଣାଇପାରେ ବିଜେପି । ଏହା ସମ୍ଭବ ହେଲେ ପୁଣି ଗୋଟିଏ ରାଜ୍ୟ କଂଗ୍ରେସ ହାତରୁ ଖସିଯିବ ।
ତେବେ ଜ୍ୟୋତିରାଦିତ୍ୟ ସିନ୍ଧିଆଙ୍କ ଏଭଳି ନିଷ୍ପତି ପରେ ପୂରା ପରିବାର ତାଙ୍କ ସହ ଛିଡା ହୋଇଛି । ଏପରିକି ପୁଅ ମହାଆର୍ଯ୍ୟମାନ ଟ୍ୱିଟ୍ କରି କହିଛନ୍ତି, ଏଭଳି ନିଷ୍ପତି ପାଇଁ ସାହସ ଦରକାର ଓ ବାପାଙ୍କ ଏଭଳି ନିଷ୍ପତି ପାଇଁ ମୁଁ ଗର୍ବିତ । ଇତିହାସ ସାକ୍ଷୀ ଅଛି ଯେ, ମୋର ପରିବାର କେବେ କ୍ଷମତାର ଲୋଭ ରଖିନାହିଁ । ତେବେ ନିର୍ବାଚନ ସମୟରେ ଦିଆଯାଇଥିବା ପ୍ରତିଶୃତି ମୁତାବକ ଭାରତ ଓ ମଧ୍ୟପ୍ରଦେଶରେ ବଡ ଧରଣର ପରିବର୍ତ୍ତନ ଅଣାଯିବ ।
ସେହିଭଳି ତାଙ୍କ ପିଉସୀ ଯଶୋଧରା ସିନ୍ଧିଆ କହିଛନ୍ତି, ମୁଁ ବହୁତ ଖୁସି ଓ ଏଥିପାଇଁ ତାଙ୍କୁ ଶୁଭକାମନା ଜଣାଉଛି । ଏହା ଜ୍ୟୋତିରାଦିତ୍ୟଙ୍କ ଘର ବାହୁଡା ବୋଲି କହିଛନ୍ତି । ଜ୍ୟୋତିରାଦିତ୍ୟଙ୍କ ବାପା ମାଧବରାଓ ସିନ୍ଧିଆ ନିଜର ରାଜନୀତିକ କ୍ୟାରିୟରର ଆରମ୍ଭ ଜନସଂଘରୁ କରିଥିଲେ । ଏପରିକି କଂଗ୍ରେସରେ ଏବେ ଜ୍ୟୋତିରାଦିତ୍ୟଙ୍କୁ ଉପେକ୍ଷା କରାଯାଉଛି । ଏସବୁ ଭିତରେ ଜ୍ୟୋତିରାଦିତ୍ୟ ସିନ୍ଧିଆଙ୍କ ଇସ୍ତଫାକୁ ତାଙ୍କ ସମର୍ଥକ ସ୍ୱାଗତ କରିଛନ୍ତି । କହିଛନ୍ତି ଆଗକୁ ମଧ୍ୟପ୍ରଦେଶ ବିକାଶ ପଥରେ ଆଗେଇବ । ସିନ୍ଧିଆଙ୍କ ସମର୍ଥକମାନେ ମଧ୍ୟ କଂଗ୍ରେସରୁ ଇସ୍ତଫା ଦେବେ ବୋଲି କହିଛନ୍ତି ।
ତେବେ ବିଜେପିରେ ସାମିଲ ହେଲେ ତାଙ୍କୁ ରାଜ୍ୟସଭା ପ୍ରାର୍ଥୀ କରାଯିବା ନେଇ ଚର୍ଚ୍ଚା ଜୋର ଧରିଛି । ଏପରିକି ତାଙ୍କୁ ମୋଦିଙ୍କ ମନ୍ତ୍ରୀମଣ୍ଡଳରେ ସ୍ଥାନ ମିଳିପାରେ ବୋଲି କୁହାଯାଉଛି । ଏଭଳି ସ୍ଥଳେ ରାଜସ୍ଥାନର ପୂର୍ବତନ ମୁଖ୍ୟମନ୍ତ୍ରୀ ବସୁନ୍ଧରା ରାଜେ ସିନ୍ଧିଆ କହିଛନ୍ତି, ଜ୍ୟୋତିରାଦିତ୍ୟଙ୍କୁ ଶୁଭକାମନା ଜଣାଇଛନ୍ତି ।