କନକ ବ୍ୟୁରୋ : ଯାତ୍ରା ପେଣ୍ଡାଲ ଉପରେ ଶୁଭିବ ବଲିଉଡ ହିରୋଙ୍କ ଡାଇଲଗ । କେତେବେଳେ ରୋମାନ୍ସ କିଙ୍ଗ ଶାହାରୁଖ ନଜର ଆସିବେ ତ ପୁଣି କେତେବେଳେ ଦବଙ୍ଗଗିରି ଦେଖାଇବାକୁ ଚୁଲବୁଲ ପାଣ୍ଡେଙ୍କୁ ଦେଖିବାକୁ ମିଳିବ ପେଣ୍ଡାଲ ଉପରେ । ଆଉ କେତେବେଳେ ନିଜର ଡାଇଲଗ ଯାଦୁରେ ଦର୍ଶକଙ୍କ ମନୋରଞ୍ଜନ କରିବେ ମୁନ୍ନାଭାଇ । ରାତି ଅନିଦ୍ରା ହୋଇଥିବା ଦର୍ଶକ ଏଣିକି ଯାତ୍ରାରେ ପାଇବେ ବଲିଉଡର ଛୁଙ୍କ ।
Kanak News is now on WhatsApp
Join and get latest news updates delivered to you via WhatsApp
ସବୁବେଳେ ଦର୍ଶକଙ୍କୁ କିଛି ନୂଆ ଉପହାର ଦେବାର ପ୍ରୟାସ ଜାରି ରଖିଥିବା ଇଷ୍ଟନ୍ ଅପେରା, ଚଳିତବର୍ଷ ଦର୍ଶକଙ୍କ ପାଇଁ ଯାତ୍ରାରେ ରଖିଛି ବଲିଉଡ ଛୁଙ୍କ । ବଲିଉଡର ନାମୀଦାମୀ କଳାକାରଙ୍କୁ ଅବିକଲ ନକଲ କରିପାରୁଥିବା କିଛି ଜୁନିୟର କଳାକାର ଏଥର ଇଷ୍ଟର୍ଣ୍ଣ ଅପେରା ଯାତ୍ରା ମଂଚରେ ଅଭିନୟ କରିବେ । ଶାହାରୁଖ୍ ଖାନ୍, ସଲମାନ ଖାନ୍ ଏବଂ ସଂଜୟ ଦତ୍ତଙ୍କ ଢ଼ାଣିରେ ଅଭିନୟ କରିପାରୁଥିବା, ସେମାନଙ୍କ ଭଳି ସମାନ ସ୍ୱରରେ ଡାଇଲଗ୍ ମାରିପାରୁଥିବା କଳାକାରଙ୍କୁ ଏଥର ଯାତ୍ରା ମଂଚରେ ଭେଟି ଦେବାକୁ ଯାଉଛି ଇଷ୍ଟର୍ଣ୍ଣ ଅପେରା । ଆଉ ଏହାଦ୍ୱାରା ଏକ ନୂଆ ରୂପରେ ଯାତ୍ରା ଦେଖିବାକୁ ପାଇବେ ଦର୍ଶକ ।
ଏହି ଜୁନିୟର କଳାକାର ମାନେ ଅସଲି ଶାହାରୁଖ, ସଲମାନ ଓ ସଞ୍ଜୟ ଦତ୍ତଙ୍କ ଭଳି ଅଭିନୟ କରି ବେଶ ପ୍ରଂଶସା ସାଉଁଟିଛନ୍ତି । ଏପରିକି ବିପଦପୂର୍ଣ୍ଣ ଷ୍ଟଣ୍ଟ ବେଳେ ଏହି ଜୁନିୟର କଳାକାରଙ୍କୁ ଖୋଜା ପଡିଥାଏ । ଆଉ ଦର୍ଶକଙ୍କ ପାଇଁ ଏମାନେ ମଧ୍ୟ ଜଣେ ଜଣେ ଷ୍ଟାର । ତେଣୁ ଇଷ୍ଟର୍ଣ୍ଣ ଅପେରା ଏହି ଷ୍ଟାର ମାନଙ୍କୁ ଓଡିଶାର ଗାଁ ଗହଳିର ଲୋକ ମାନଙ୍କ ପାଖରେ ପହଞ୍ଚାଇବା ପାଇଁ ଆରମ୍ଭ କରିଛି ଭିନ୍ନ ପ୍ରୟାସ । ଇଷ୍ଟର୍ଣ୍ଣ ଅପେରାର ଯାତ୍ରାରେ ଓଡିଶାର ବିଭିନ୍ନ ସ୍ଥାନରେ ଏମାନେ ନିଜର ଅଭିନୟ ମାଧ୍ୟମରେ ଦର୍ଶକଙ୍କ ମନୋରଞ୍ଜନ କରିବେ । ଏହା ପୂର୍ବରୁ ବଲିଉଡର ବ୍ୟାଡ ବଏ ଶକ୍ତି କପୁର ମଧ୍ୟ ଗତବର୍ଷ ଇଷ୍ଟର୍ଣ୍ଣ ଅପେରାରେ ଅଭିନୟ କରି ବେଶ ପ୍ରଂଶସା ସାଉଁଟିଥିଲେ ।