ଜଙ୍ଗଲ ପ୍ରେମରେ ପୂରା ଗାଁ: ପିଲା ଭଳି ପାଳୁଛନ୍ତି, ପାଳି କରି ଜଗୁଛନ୍ତି । ୧୯୯୨ରୁ ଦିନରାତି ଜଙ୍ଗଲକୁ ସୁରକ୍ଷା ଦେଇ ଆସୁଛନ୍ତି ଗାଁ ସାରା ଲୋକେ
କନକ ବ୍ୟୁରୋ: ସକାଳ ହେବା କ୍ଷଣି ସମସ୍ତେ ଜଙ୍ଗଲକୁ ବାହାରି ଯାଆନ୍ତି । ହାତରେ ଥାଏ କଟୁରୀ, କାନ୍ଧରେ ଥାଏ କୁରାଢି । ଆଉ ଘଞ୍ଚ ଜଙ୍ଗଲକୁ ସାଙ୍ଗ ହୋଇ ପଶନ୍ତି ସମସ୍ତେ । ତେବେ ଜଙ୍ଗଲ ଭିତରେ କାଠ ହାଣିବା ପାଇଁ ନୁହେଁ ବରଂ ରାତି ପାହିଲେ ଜଙ୍ଗଲ ଜଗିବାକୁ ବାହାରି ଯାଆନ୍ତି ଗାଁ ଲୋକେ । ଜଙ୍ଗଲର ଯତ୍ନ ନିଅନ୍ତି, ଜଙ୍ଗଲକୁ ସୁରକ୍ଷା ଦିଅନ୍ତି ଆଉ ଅନାବନା ଗଛ ଉପାଡି ସାରା ଜଙ୍ଗଲକୁ ସଫାସୁତୁରା ରଖନ୍ତି ।
Kanak News is now on WhatsApp
Join and get latest news updates delivered to you via WhatsApp
ତେବେ ଜଙ୍ଗଲ ପ୍ରେମରେ ପଡିଥିବା ଏଭଳି ଏକ ଗାଁ ହେଉଛି ଢେଙ୍କାନାଳ ଜିଲ୍ଲା କାମାକ୍ଷାନଗର ବ୍ଲକ କାନପୁରା ଗାଁ । ଯେଉଁଠି ଗାଁ ସାରା ଲୋକେ ଜଙ୍ଗଲକୁ ସୁରକ୍ଷା ଦେବା ପାଇଁ ପ୍ରତିଜ୍ଞା ନେଇଛନ୍ତି । ବାପଅଜା ଅମଳରୁ ଆଜି ଯାଏଁ ଅର୍ଥାତ ୧୯୯୨ରେ ଜଙ୍ଗଲ ସୃଷ୍ଟି ହେବା ପରଠାରୁ ଦୀର୍ଘ ୨୮ ବର୍ଷ ହେବ ତାର ଯତ୍ନ ନେଇ ଛୋଟ ଗଛକୁ ଘଞ୍ଚ ଜଙ୍ଗଲରେ ପରିଣତ କରିବା ପଛରେ ରହିଛି କାନପୁରା ଗାଁ ଲୋକଙ୍କ ନିଷ୍ଠା ଓ ପରିଶ୍ରମ ।
ଜଙ୍ଗଲକୁ ପରିବାରର ପିଲା ଭାବୁଥିବା ଗାଁର ସମସ୍ତ ଲୋକେ ୨୮ ବର୍ଷ ହେବ ପାଳିକରି ସୁରକ୍ଷା ଦେଇ ଆସୁଛନ୍ତି । ତେବେ ସବୁଦିନ ୧୬ ଜଣ ଜଙ୍ଗଲ ଭିତରେ ଓ ବାହାରେ ପହରା ଦେଉଥିବା ବେଳେ ଦିନରେ ୮ ଜଣ ଆଉ ରାତିରେ ୮ ଜଣ ଲେଖାଏଁ ଜଙ୍ଗଲ ଜଗୁଛନ୍ତି । ୨୦୦ ହେକ୍ଟର ଜମିର ଏ ଜଙ୍ଗଲକୁ କାଠ ମାଫିଆ ଟାର୍ଗେଟ କରିଥିବାରୁ ଏହାର ସୁରକ୍ଷା ପାଇଁ ଜଗି ଆସୁଛନ୍ତି ଗାଁ ଲୋକେ । ତେବେ ଯଦି କେବେକେବେ କାଠ ଚୋରି କଲା ବେଳେ ଚୋର ଧରାପଡନ୍ତି ତେବେ ସେମାନଙ୍କୁ ଦଣ୍ଡିତ କରାଯାଏ ।
ତେବେ ବୃକ୍ଷ ହିଁ ଜୀବନ ବୋଲି ମାନି ନେଇଥିବା ଏ ଗାଁ ଲୋକେ ଜଙ୍ଗଲର ସୁରକ୍ଷା, ତାର ରକ୍ଷଣାବେକ୍ଷଣ କେମିତି କରିହେବ ସେନେଇ ପ୍ରତିମାସ ଏହି ଜଙ୍ଗଲ ପାଖରେ ଏକ ବୈଠକ କରି ଆଲୋଚନା କରନ୍ତି । ତେବେ ବିନା ସ୍ୱାର୍ଥରେ ବୃକ୍ଷର ଯତ୍ନ ନେଉଥିବା ଆଉ ପରିବେଶ ପାଇଁ ଜଙ୍ଗଲ ଜଗୁଥିବା ଏ କାନପୁରା ଗାଁ ଅନ୍ୟମାନଙ୍କ ପାଇଁ ଉଦାହରଣ ପାଲଟିଛି ।