କନକ ବ୍ୟୁରୋ: ବିମାନଯାତ୍ରୀଙ୍କ ପାଇଁ ଜରୁରୀ ସୂଚନା । ଆଜି ରାତିରେ ଘରୋଇ ରୁଟରେ ବିମାନ ଚଳାଚଳ ବନ୍ଦ କରିପାରେ ଜେଟ୍ ଏୟାରୱେଜ୍ । କାରଣ ପ୍ରାୟ ୮ ହଜାର କୋଟି ଋଣ ସହ ଦେବାଳିଆ ସ୍ଥିତିରେ ପହଞ୍ଚିଥିବା ଘରୋଇ ବିମାନ ସେବା କମ୍ପାନି ଜେଟ ଏୟାରେଓ୍ଵଜ ଆଜି ରାତି ପାଇଁ ନିଜର ସବୁ ଘରୋଇ ଫ୍ଲାଇଟ ସ୍ଥଗିତ ରଖିବାର ସମ୍ଭାବନା ରହିଛି ବୋଲି ସୂଚନା ମିଳିଛି ।
Kanak News is now on WhatsApp
Join and get latest news updates delivered to you via WhatsApp
ଅନ୍ୟପଟେ ମିଳିଥିବାର ସୂଚନା ମୁତାବକ, ଜରୁରୀ ଆବଶ୍ୟକତା ପାଇଁ କମ୍ପାନି ନିଜର ଋଣଦାତାମାନଙ୍କୁ ମାଗିଥିବା ୪୦୦ କୋଟି ଟଙ୍କା ନ ମିଳିବାରୁ କମ୍ପାନି ଏହି କଠୋର ନିଷ୍ପତ୍ତି ନେଇପାରେ । କାରଣ ପୂର୍ବରୁ ବ୍ୟାଙ୍କମାନେ କମ୍ପାନିରେ ୧୫ଶହ କୋଟି ଟଙ୍କାର ଅର୍ଥ ପ୍ରଦାନ ପାଇଁ ନିଷ୍ପତ୍ତି ନେଇଥିଲେ । କିନ୍ତୁ ତାହା ଏଯାବତ୍ ସମ୍ଭବ ହୋଇନଥିବାରୁ କମ୍ପାନି ନିତିଦିନିଆ ପରିଚାଳନା ପାଇଁ ୪୦୦ କୋଟି ଟଙ୍କା ପ୍ରଦାନ କରିବାକୁ ବ୍ୟାଙ୍କ କନସୋର୍ଟିଅମକୁ ଅନୁରୋଧ କରିଥିଲା । ହେଲେ ତାହା ଏପର୍ଯ୍ୟନ୍ତ ନିଷ୍ପତ୍ତି ହୋଇନଥିବାରୁ କମ୍ପାନି ବିମାନ ଚଳାଚଳ ବନ୍ଦ ପାଇଁ ନିଷ୍ପତ୍ତି ନେଇପାରେ।
ସବୁଠାରୁ ବଡ଼ କଥା ହେଲା ଯେ, କମ୍ପାନିର ପୂର୍ବରୁ ୧୨୩ଟି ବିମାନ ଚଳାଚଳ କରୁଥିବାବେଳେ ଏବେ ତାହା ମାତ୍ର ୫କୁ ଖସିଆସିଛି । ଏହା ଫଳରେ କମ୍ପାନି ବାଧ୍ୟ ହୋଇ ନିଜର ଅନ୍ତର୍ଜାତୀୟ ଅପରେସନକୁ ବନ୍ଦ କରିଛି । କିନ୍ତୁ ଘରୋଇ ଅପରେସନ ବନ୍ଦ କଲେ କମ୍ପାନିର ସ୍ଥିତି ଆହୁରି ସାଙ୍ଘାତିକ ହେବ ବୋଲି ଆଶଙ୍କା କରାଯାଉଛି ।