ପଥର ତଳେ ଚାପି ହୋଇଥିବା ଦୁଇ ଜଣଙ୍କ ଉଦ୍ଧାର ପାଇଁ ବିସ୍ଫୋରଣ କରିବ ସେନା ! ଗାଁ ଲୋକଙ୍କ ସହ ଜିଲ୍ଲା ପ୍ରଶାସନର ବୈଠକ ପରେ ନିଷ୍ପତ୍ତି
କନକ ବ୍ୟୁରୋ : ରାଣୀଗଡ ପାହାଡରେ ପ୍ରଶାସନର ସବୁ ଉଦ୍ୟମ ଫେଲ ମାରିବା ପରେ ଉଦ୍ଧାର ପାଇଁ ଘଟଣାସ୍ଥଳରେ ପହଂଚିନ୍ତି ସେନାର ଟିମ୍ । ବିହାରର ରାଂଚିରୁ ଏହି ଆର୍ମି ଇଂଜିନିରିଂ ଟିମ୍ ଘଟଣାସ୍ଥଳରେ ପହଂଚିବା ପରେ ସ୍ଥିତି ଅନୁଧ୍ୟାନ କରିଛନ୍ତି । ଏହାସହ ରାଣୀଗଡ ପଂଚାୟତ କାର୍ଯ୍ୟାଳୟରେ ସ୍ଥାନୀୟ ଲୋକଙ୍କ ସହ ଆଲୋଚନା କରିଛନ୍ତି ପ୍ରଶାସନ ଓ ସେନା । ଏହି ବୈଠକରେ ଏସପି, ଜିଲ୍ଲାପାଳ ଏବଂ ସେନା ଇଂଜିନିଅରିଂ ବିଭାଗର ଅଧିକାରୀ ଉପସ୍ଥିତ ଥିଲେ । ଘଟଣାସ୍ଥଳରୁ ୧ କିଲୋମିଟର ପର୍ଯ୍ୟନ୍ତ ମଣିଷ ଗାଈଗୋରୁ ନରହିବାକୁ କୁହାଯାଇଛି । ବିସ୍ଫୋରଣ କରି ଚାପିହୋଇଥିବା ବ୍ୟକ୍ତିଙ୍କୁ ଉଦ୍ଧାର କରାଯିବ ବୋଲି ନିଷ୍ପତ୍ତି ହୋଇଛି । ତେବେ ଦ୍ୱିତୀୟ ପର୍ଯ୍ୟାୟ ବୈଠକ ପରେ କେତେବେଳେ ବିସ୍ଫୋରଣ କରାଯିବ ତାର ନିଷ୍ପତ୍ତି ହେବ ।
Kanak News is now on WhatsApp
Join and get latest news updates delivered to you via WhatsApp
ସେପଟେ ଜୟପୁରର ପୂର୍ବତନ ଉପଜିଲ୍ଲାପାଳ ବେଆଇନ ଖନନ ହେଉଥିବା ନେଇ ଥାନାରେ ଦେଇଥିବା ଏତଲାର ଜୋରେସାର ତଦନ୍ତ ଆରମ୍ଭ ହୋଇଛି । ଘଟଣାର ତଦନ୍ତ ହୋଇ ଦୋଷୀ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି କହିଛନ୍ତି କୋରାପୁଟ ଏସପି କନୱର ବିଶାଳ । ପୂର୍ବରୁ ଓଡ୍ରାଫ, ଏନଡିଆରଏଫ ଓ ପୁଲିସର ମିଳିତ ବାହିନୀ ବି ଫେଲ ମାରିଛି । ରାୟପୁରରୁ ଆସିଥିବା ଅତ୍ୟାଧୁନିକ ମେସିନରେ ମଧ୍ୟ ଉଦ୍ଧାର କରା ଯାଇପାରିଲା ନାହିଁ । ଉଦ୍ଧାର ପାଇଁ ଯେକେହି ବି ଆସିଲେ ସ୍ଥିତି ଦେଖି ହାତ ଟେକିଦେଲେ । ଫଳରେ ପ୍ରଶାସନ ନିରୁପାୟ ହୋଇ ପଥର ତଳେ ଚାପି ହୋଇରହିଥିବା ଜେସିବି ଅପରେଟରଙ୍କୁ ଉଦ୍ଧାର କରିବା ପାଇଁ ସେନାର ସହାୟତା ଲୋଡିଥିଲା । ଏବେ ଏହି ଘଟଣାକୁ ୭ ଦିନ ବିତିଯାଇଥିବା ବେଳେ ବଡ ବଡ ପଥର ତଳେ ଦୁଇ ଜଣ ଜେସିବି ଅପରେଟର ଚାପି ହୋଇ ରହିଛନ୍ତି ।