ଆର୍ଥିକ ଅବସ୍ଥାକୁ ନେଇ ବାପା ବନାମ ପୁଅ ଲଢେଇ! ଯଶୋବନ୍ତଙ୍କ ସବୁ ପ୍ରଶ୍ନର ଉତର ଦେଲେ ପୁଅ ଜୟନ୍ତ । କହିଲେ, ନ୍ୟୁ ଇଣ୍ଡିଆ ପାଇଁ ହେବ ଲାଭଦାୟକ
କନକ ବ୍ୟୁରୋ : ଦେଶର ବର୍ତମାନ ଅର୍ଥବ୍ୟବସ୍ଥା ନେଇ ବିଜେପିର ଆଭ୍ୟନ୍ତରୀଣ ମହଲରେ ହିଁ ସ୍ୱର ତୀବ୍ର ହେବାରେ ଲାଗିଛି । ଗତକାଲି ତତକାଳୀନ ବାଜପେୟୀ ସରକାରରେ ଅର୍ଥମନ୍ତ୍ରୀ ଥିବା ଯଶୋବନ୍ତ ସିହ୍ନା ସରକାରଙ୍କ ଆର୍ଥିକ ନୀତି ଉପରେ ପ୍ରଶ୍ନବାଚୀ ସୃଷ୍ଟି କରିଛନ୍ତି । ଆଉ ଏହାର ଜବାବ ଦେବାକୁ ମୈଦାନକୁ ଓହ୍ଲାଇଛନ୍ତି ଯଶୋବନ୍ତଙ୍କ ପୁଅ ଅର୍ଥାତ ମୋଦି ସରକାରରେ ଅର୍ଥମନ୍ତ୍ରୀ ଥିବା ଜୟନ୍ତ ସିହ୍ନା । ଅର୍ଥବ୍ୟବସ୍ଥାକୁ ନେଇ ବାପା-ପୁଅ ମୁହାଁମୁହିଁ ହୋଇଛନ୍ତି । ଜୟନ୍ତ ନିଜ ବାପାଙ୍କ ତର୍କକୁ ଭୁଲ ବୋଲି କହିବା ସହ ସରକାରଙ୍କ ପରଦକ୍ଷେପକୁ ଠିକ ବୋଲି କହିଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ତା ସହିତ ଅର୍ଥ ରାଷ୍ଟ୍ରମନ୍ତ୍ରୀ ଜୟନ୍ତ ସିହ୍ନା କହିଛନ୍ତି, ସରକାର ଏକ ବଡ ମଜଭୁତ ଅର୍ଥବ୍ୟବସ୍ଥା ତିଆରି କରୁଛନ୍ତି । ଏହା ଆଗକୁ ନ୍ୟୁ ଇଣ୍ଡିଆ ପାଇଁ ଲାଭଦାୟକ ହେବ । ସରକାର ଯାହା ପରିବର୍ତନ କରୁଛନ୍ତି ତାହା ନ୍ୟୁ ଇଣ୍ଡିଆ ପାଇଁ ଦରକାର । ଯେଉଁ ଅର୍ଥନୀତି ତିଆରି କରାଯାଉଛି ତଦ୍ୱାରା ଲକ୍ଷାଧିକ ଲୋକଙ୍କୁ ନିଯୁକ୍ତି ମିଳିବ । ଜିଏସଟି, ବିମୁଦ୍ରାକରଣ ଓ ଡିଜିଟାଲ ପେମେଂଟକୁ ପ୍ରୋତ୍ସାହନ ଗେମଚେଞ୍ଜିଙ୍ଗ ଉଦ୍ୟମ । ଆଉ ଏହାର ପ୍ରଭାବ ଦୀର୍ଘକାଳୀନ ହେବ । ଏଫଡିଆଇରେ ବୃଦ୍ଧି ହେଉଛି ।
ନ୍ୟୁ ଇଣ୍ଡିଆ ପାଇଁ ସରକାର ରେଳବାଇ, ଗ୍ରାମୀଣ ଭାରତରେ ବିଜୁଳି, ଜାତୀୟ ରାଜପଥ ସଂପ୍ରସାରଣ ଉପରେ ଗୁରୁତ୍ୱ ଦେଉଛନ୍ତି । ୨୦୧୮ ସୁଦ୍ଧା ସବୁ ଗାଁରେ ବିଜୁଳି ପଂହଚାଇବା ପାଇଁ ଲକ୍ଷ୍ୟ ରଖାଯାଇଛି । ୨୦୧୪ ସୁଦ୍ଧା ପ୍ରତ୍ୟେକ ଦିନ ୬୯ କିଲୋମିଟର ସଡକ ତିଆରି ହେଉଥିଲା । ଏବେ ଏହା ୧୩୩ କିଲୋମିଟରରେ ପହଂଚିଛି । ଏଭଳି ଭାବେ ସରକାରଙ୍କ ତରଫରୁ ପକ୍ଷ ରଖିଛନ୍ତି ଜୟନ୍ତ ।
ଗତକାଲି ଜୟନ୍ତଙ୍କ ପିତା ଯଶୋବନ୍ତ ଭାରତର ଅର୍ଥନୀତିକୁ ନେଇ ମୋଦି ଓ ଅରୁଣ ଜେଟଲୀଙ୍କୁ କଡା ସମାଲୋଚନା କରିଥିଲେ । ଦୈନିକ ଇଂରାଜୀ ଖବରକାଗଜ ଇଣ୍ଡିଆନ୍ ଏକ୍ସପ୍ରେସରେ ଏକ ସଂଦର୍ଭ ଲେଖି ମୋଦି ସରାକରଙ୍କୁ ଯଶୋବନ୍ତ ଟାର୍ଗେଟ କରିଥିଲେ । ଯଶୋୱନ୍ତ ସିହ୍ନା ଲେଖିଛନ୍ତି, “ ଅର୍ଥମନ୍ତ୍ରୀ ଜେଟଲୀ ଭାରତୀୟ ଅର୍ଥନୀତିକୁ ଯେଭଳି ଗୋଳମାଳିଆ ସ୍ଥୁତିକୁ ନେଇ ଯାଇଛନ୍ତି ଯଦି ମୁଁ ଏବେ କିଛି ନକୁହେ, ତେବେ ମୁଁ ଜାତୀୟ କର୍ତ୍ତବ୍ୟକୁ ଅବହେଳା କରୁଛି ବୋଲି କୁହାଯିବ ।”
ସେହିଭଳି ବିମୁଦ୍ରାକରଣ ହେଉଛି ଅପୂରଣୀୟ ଆର୍ଥିକ ବିପତ୍ତି ଏବଂ ଜିଏସଟି ଅତି ଖରାପ ଭାବରେ ଲାଗୁ କରାଯାଇଛି । ସେ କହିଛନ୍ତି,“ ସରକାର ଯେଉଁ ଅଭିବୃଦ୍ଧି ହାର ୫.୭କୁ କମି ଆସିଥିବା କଥା କହୁଛନ୍ତି, ବାସ୍ତବରେ ତାହା ୩.୭ ପ୍ରତିଶତ କିମ୍ବା ତାହାଠାରୁ କମ୍” । ତେବେ ଯଶୋବନ୍ତଙ୍କ ଏହି ସନ୍ଦର୍ଭ ପ୍ରକାଶିତ ହେବା ପରେ ବିଜେପି କ୍ୟାମ୍ପରେ ହଇଚଇ ସୃଷ୍ଟି ହୋଇଛି । ଖୋଲାଖୋଲି ଭାବେ ବିଜେପିର ବରିଷ୍ଠ ନେତୃବୃନ୍ଦ ମୋଦି ସରକାରଙ୍କ କଡା ସମାଲୋଚନା କରୁଥିବାରୁ ଦଳ ଚିନ୍ତାରେ ପଡି ଯାଇଛି ।