ପୁଣି କଟକ ଫେରିଲା କାମଳ ! ସାହିରୁ ସାହି ଡେଉଁଛି ରୋଗ
କନକ ବ୍ୟୁରୋ : ପୁଣି କଟକ ଫେରିଛି କାମଳ । ସହରର ବିଭିନ୍ନ ସାହିରେ ବ୍ୟାପୁଛି ଜଣ୍ଡିସ । ଶିଖରପୁର ତଳସାହି ଏବଂ ନଦୀକୁଳ ସାହିରେ ଦୂଷିତ ପାଣି ପିଇ ୨୫ରୁ ଅଧିକ ଲୋକ କାମଳ ରୋଗରେ ଆକ୍ରାନ୍ତ ହୋଇଛନ୍ତି । ଆକ୍ରାନ୍ତଙ୍କ ସଂଖ୍ୟା ବଢୁଥିବା ବେଳେ ସିଏମସି ଓ ଜିଲ୍ଲା ସ୍ୱାସ୍ଥ୍ୟ ବିଭାଗ ପହଂଚି ଔଷଧ ଦେବା ସହ ରକ୍ତ ନମୁନା ସଂଗ୍ରହ କରିଛନ୍ତି । କଟକର ଶିଖରପୁର ତଳସାହି ଏବଂ ନଦୀକୁଳ ସାହିରେ ଜଣ୍ଡିସ ସ୍ଥିତି ସଙ୍ଗୀନ । ଉଭୟ ସାହିର ପ୍ରାୟ ୨୫ ଜଣ ଲୋକ ଜଣ୍ଡିସରେ ଆକ୍ରାନ୍ତ ହୋଇଛନ୍ତି । ପ୍ରଥମେ ତଳସାହିର ୨ ଜଣ ଝିଅ ଜଣ୍ଡିସରେ ଆକ୍ରାନ୍ତ ହୋଇଥିଲେ, ପରେ ପରେ ସାହିର ଅନ୍ୟ ଲୋକଙ୍କ ଠାରେ ମଧ୍ୟ ଏହି ରୋଗ ଦେଖିବାକୁ ମିଳିଛି ।
Kanak News is now on WhatsApp
Join and get latest news updates delivered to you via WhatsApp
ସେପଟେ ଜଣ୍ଡିସ ସ୍ଥିତି ରୋକିବାକୁ ଜନସ୍ୱାସ୍ଥ୍ୟ ବିଭାଗ ସହ ସିଏମସି ସ୍ୱାସ୍ଥ୍ୟ ବିଭାଗ ପାଣି ନମୂନା ସଂଗ୍ରହ କରି ପରୀକ୍ଷା ପାଇଁ ପଠାଇଛି । ଲୋକଙ୍କୁ ପିଇବା ପାଇଁ ଟ୍ୟାଙ୍କର ପାଣି ସହ ହାଲୋଜିନ ବଟିକା ଦିଆଯାଇଛି । ସେପଟେ ଚୌଦ୍ୱାର-କଟକ ବିଧାୟକ ପ୍ରଭାତ ବିଶ୍ୱାଳ ସମ୍ପୃକ୍ତ ଅଂଚଳ ବୁଲି ଆକ୍ରାନ୍ତଙ୍କ ସ୍ୱାସ୍ଥ୍ୟବସ୍ଥା ପଚାରି ବୁଝିଛନ୍ତି । ପୂର୍ବରୁ କାଠଗଡା ସାହିରେ ଜଣ୍ଡିସ ଦେଖିବାକୁ ମିଳିଥିବା ବେଳେ ଏବେ ଶିଖରପୁର ଅଞ୍ଚଳରେ ଜଣ୍ଡିସ କାୟା ବିସ୍ତାର କରିଛି । ତେବେ ଜଣ୍ଡିସ ରୋକିବାରେ ପ୍ରଶାସନ କେତେ ମାତ୍ରାରେ ସଫଳ ହେଉଛି, ତାହା ଆଗାମୀ ଦିନରେ ସ୍ପଷ୍ଟ ହେବ ।