ଜଗତପୁର ଲୁଟ ଘଟଣାର ପର୍ଦ୍ଦାଫାସ କଲା କମିସନରେଟ ପୋଲିସ ! ନିଜେ ଲୁଟ କରାଇଥିଲେ ନିଜର ଟଙ୍କା, ପୋଲିସକୁ ଭୁଆଁ ବୁଲାଇବାକୁ ଥାନାରେ ଦେଇଥିଲେ ଏତଲା
କନକ ବ୍ୟୁରୋ : ଅଭିଯୋଗ କାରୀ ହିଁ ଲୁଟ ଘଟଣାର ଅଭିଯୁକ୍ତ । କଟକ ଜିଲ୍ଲା ଜଗତପୁର ଅଂଚଳରେ ୨୭ଲକ୍ଷ ଟଙ୍କା ଲୁଟ୍ ଘଟଣାର ଯାଂଚ ପରେ ପୋଲିସ ପାଇଛି ଏପରି ଚାଂଚଲ୍ୟକର ତଥ୍ୟ । ଏବେ ଲୁଟର ମାଷ୍ଟର ମାଇଣ୍ଡ ନଳିନୀ ତ୍ରିପାଠୀ ଓ ତାର ତିନି ସହଯୋଗୀଙ୍କୁ ଗିରଫ କରି କୋର୍ଟ ଚାଲାଣ କରିଛି ପୋଲିସ ।
Kanak News is now on WhatsApp
Join and get latest news updates delivered to you via WhatsApp
ଟଙ୍କା ଆତ୍ମସାତ୍ କରିବା ପାଇଁ ବ୍ଲୁପ୍ରିଂଟ ପ୍ରସ୍ତୁତକାରୀ ନଳିନୀ ପୋଲିସକୁ ଭୁଆଁ ବୁଲାଇବାକୁ ଯାଇ ନିଜେ ପୋଲିସ ଜାଲରେ ଫସିଛି । ଜଗତପୁର ଶିଳ୍ପାଂଚଳର ୨୭ ଲକ୍ଷ ଟଙ୍କା ଲୁଟର ପୁରା ଘଟଣା ଏହିପରି । ମାର୍ଚ୍ଚ ୩୧ରେ ଜଗତପୁର ଶିଳ୍ପାଂଚଲରେ ବଡ ଧରଣର ଲୁଟ୍ ହୋଇଥିଲା । ବ୍ୟାଙ୍କରୁ ୨୭ ଲକ୍ଷ ଟଙ୍କା ଉଠାଇ ଫେରୁଥିଲେ ଦୁଗ୍ରା କୋ ପ୍ରାଇଭେଟ ଲିମିଟେଡ କଂପାନୀର ନଳିନୀକାନ୍ତ ତ୍ରିପାଠୀ । ହେଲେ ଶିଳ୍ପାଂଚଳରେ ୨ ଦୁର୍ବୃତ ବାଇକରେ ଆସି ନଳିନୀକୁ ଧାରୁଆ ଅସ୍ତ୍ରରେ ଆକ୍ରମଣ କରି ଟଙ୍କା ଓ ମୋବାଇଲ ଲୁଟି ନେଇଥିଲେ ।
ଏନେଇ ଅଭିଯୋଗ ହେବା ପରେ ପୋଲିସ ଖୋଳତାଡ ଆରମ୍ଭ କରିଥିଲା । ତେବେ ନଳିନୀର କ୍ଷତଚିହ୍ନକୁ ନେଇ ପୋଲିସର ସନ୍ଦେହ ହେବା ପରେ ପୋଲିସ ଅଧିକ ଖୋଳତାଡ କରିଥିଲା । ଡାକ୍ତରୀ ରିପୋର୍ଟରୁ ଜଣାପଡିଥିଲା ନଳିନୀଙ୍କ ହାତର ଆହତ ଅକସ୍ମାତ ହୋଇଥିବା ହମଲାରୁ ନୁହେଁ, ବରଂ ସଚେତନ ଭାବେ କମ କ୍ଷତି ପହଂଚାଇବାକୁ କରାଯାଇଥିବା ଆକ୍ରମଣ । ଏହି ସୁରାକ ଆଧାର କରି ପୋଲିସ ନଳିନୀ ଠାରୁ ସବୁ ସତ ବାହାର କରି ୨୭ ଲକ୍ଷ ଟଙ୍କା ଲୁଟ ଘଟଣାର ପର୍ଦ୍ଦାଫାସ କରିଥିଲା ।
ପୂର୍ବରୁ ଟଙ୍କା ଲୁଟ୍ ପାଇଁ ନଳିନୀ ନିଜ ୩ ସାଙ୍ଗଙ୍କ ସହ ମିଶି ଯୋଜନା ପ୍ରସ୍ତୁତ କରିଥିଲା । ଆଉ ଯୋଜନା ମୁତାବକ ଲୁଟ୍ ହୋଇଥିଲା ବୋଲି କହିଛି କମିସନରେଟ ପୋଲିସ । ଟଙ୍କା ଲୁଟ୍ କରି ଅଭିଯୁକ୍ତ ନିଜେ ଅଭିଯୋଗକାରୀ ସାଜି ପୋଲିସ ସାମ୍ନାରେ ଆସି ଘଟଣାକୁ ଭିନ୍ନ ରୁପ ଦେବାକୁ ଉଦ୍ୟମ କରିଥିଲା । ହେଲେ ପୋଲିସ ପୁରା ଘଟଣାର ଖୋଳତାଡ କରି ଅପରାଧୀଙ୍କୁ ଏବେ ଜେଲରେ ପୁରାଇଛି ।