ବାତ୍ୟା ପରେ ବଡଦେଉଳରୁ ବାହାରିଲା ଜଗା: ଭକ୍ତଙ୍କୁ ଦେଖିଲା, ଭାବବିହ୍ୱଳ ହେଲା…
କନକ ବ୍ୟୁରୋ: ଫେରିଯାଇଛି ଫୋନି, ପଡି଼ରହିଛି ପ୍ରଳୟର ପଦଚିହ୍ନ । ଫୋନି ଫେରି ଯିବାକୁ ପଇଁଚାଳିଶ ଦିନ ବିତିଲାଣି । ଆଉ ୟାରି ଭିତରେ ଫୋନିର କ୍ଷତ ପୁରୀ ଛାତିରେ ଧିରେ ଧିରେ ଭରିବାକୁ ଲାଗିଲାଣି । ପ୍ରଭୁଙ୍କ ଦୟା ଓ ପ୍ରଶାସନର ପ୍ରାଣମୂର୍ଚ୍ଛା ଉଦ୍ୟମ କାରଣରୁ ପୁରୀ ଏବେ ଅଣ୍ଟା ସଳଖି ସିଧା ହେବାକୁ ବଳ ପାଇଲାଣି । ହେଲେ ଏଇ ୪୫ ଦିନରେ ଭିତରେ କେମିତି ଅଛି ଶ୍ରୀକ୍ଷେତ୍ର, କେମିତି ଅଛି ବଡଦାଣ୍ଡ ଆଉ କେମିତି ଅଛନ୍ତି ତା ପ୍ରିୟ ଭକ୍ତଗଣ ? ସୁଖଦୁଃଖ ବୁଝିବାକୁ , ସାମ୍ନାସାମ୍ନି ଭେଟିବାକୁ ଆଜି ପ୍ରଥମ ଥର ପାଇଁ ଦେଉଳ ବାହାରକୁ ଆସି ସ୍ନାନବେଦୀରେ ବସିଛି ଜଗା ।
Kanak News is now on WhatsApp
Join and get latest news updates delivered to you via WhatsApp
ପୁରୀରେ ଫୋନି ପ୍ରଳୟ ରଚିବାର ୪୫ ଦିନ ପରେ ଆଜି ପ୍ରଥମ ଥର ପାଇଁ ସ୍ନାନ ବେଦୀରୁ ଶ୍ରୀକ୍ଷେତ୍ରକୁ ଦେଖୁଛନ୍ତି କାଳିଆ ସାଆନ୍ତ । ବତ୍ୟା ପରେ ପୁରୀର ଛାଇହୀନ ଚିତ୍ରକୁ, ଭାଙ୍ଗି ଯାଇଥିବା ଘରକୁ ନିଜ ଚକା ଆଖିରେ ଘନଘନ ଦେଖୁଛି ନଟ ନାଗର । ବାତ୍ୟା ପରେ ଉଜୁଡି ଯାଇଥିବା ସ୍ୱପ୍ନ, ମାଟିରେ ମିଶି ଯାଇଥିବା ସମ୍ପତ୍ତି ଆଉ ଭାତ ଗୁଣ୍ଡେ ପାଇଁ ଆଉଟୁ ପାଉଟୁ ହୋଉଥିବା ଭୋକିଲା ମଣିଷର ଭୋ ଭୋ ଚିକ୍ରାର ଆଜି କାନ ଖୋଲା କରି ଶୁଣୁଛି ଭାବ ବିନୋଦିଆ । ଭକ୍ତଙ୍କ ଦୁଃଖ, ଭୋକ ଆଉ ଯନ୍ତ୍ରଣାକୁ ଖାଲି ଆଖିରେ ଦେଖି ଭାବବିହ୍ୱଳ ହୋଇଛନ୍ତି ଜଗନ୍ନାଥ । ଆଉ ଭକ୍ତଙ୍କ କଷ୍ଟକୁ ଅନୁଭବ କରି ବୋଧେ କାନ୍ଦିଥିବେ କାଳିଆ ସାଆନ୍ତ ଯାହା ସ୍ନାନ କରିବା ବେଳେ ୩୫ ଗରା ସୁବାସିତ ଜଳରେ ଏକାକାର ହୋଇଯାଇଛି ।
ସେଦିନ ବାତ୍ୟାର ବିକଟାଳ ରୂପକୁ ବଡ ଦେଉଳ ଭିତରେ ରହି ଦେଖିଥିଲା ଚକାଆଖି । ଫୋନିର କରାଳ ରୂପ ଆଉ ଛାତିଥରା ତାଣ୍ଡବକୁ ଛାତି ପତେଇ ସହି ଯାଇଥିଲେ କାଳିଆ ସାଆନ୍ତ । ସେଇଥି ପାଇଁ ତ ଫୋନି ପାଟିରେ ପୁରୀ ପଶି ଯିବା ଆଗରୁ ବର୍ତ୍ତି ଯାଇଥିଲା । ରତ୍ନବେଦୀରେ ରହି ଦୁଃଖିରଙ୍କିଙ୍କ ସବୁ ଦୁଃଖ ଦେଖିଥିଲା ଚକାଡୋଳା । ଆଉ ଆଜି ପ୍ରଥମ ଥର ପାଇଁ ଦେଉଳ ବାହାରୁ ବାହାରି ଦୁର୍ଦ୍ଦିନର ଚିତ୍ର ଦେଖିଲା ଜଗା । ସ୍ନାନ ପରେ ଆଉ ଜର ହେବା ପରେ ୧୪ ଦିନ କାଳ ଏଇ ଚିତ୍ରକୁ ଦେଖିବ ଜଗା, ଜରରେ କମ୍ପି କମ୍ପି ଭକ୍ତଙ୍କ କଷ୍ଟକୁ ଅନୁଭବ କରିବ କାଳିଆ ସାଆନ୍ତ ।