ଅଲଗା ହେବେ ଜଗା ବଳିଆ ! ଦିଲ୍ଲୀ ଏମ୍ସରେ ଚାଲିଛି ପ୍ରସ୍ତୁତି, ଲାଗିଛନ୍ତି ୪୦ ଜଣ ଡାକ୍ତରଙ୍କ ସହ ୬୦ ଜଣିଆ ଟିମ୍
କନକ ବ୍ୟୁରୋ : ଫୁଲବାଣୀର ଯୋଡାମୁଣ୍ଡ ଥିବା ଜାଆଁଳା ଶିଶୁଙ୍କ ଖୁବଶୀଘ୍ର ହୋଇପାରେ ଅପରେସନ୍ । ଦିଲ୍ଲୀ ଏମ୍ସର ଜଣେ ଅଧିକାରୀ ନିଜ ନାଁ ଗୋପନ ରଖି କହିଛନ୍ତି, ଆସନ୍ତା ସପ୍ତାହ ମଧ୍ୟରେ ଜଗାବଳିଆଙ୍କ ଅପରେସନ୍ କରାଯିବା ସମ୍ଭାବନା ରହିଛି । ଯାଆଁଳା ଶିଶୁଙ୍କ ଚିକିତ୍ସା କରୁଥିବା ଡାକ୍ତରୀ ଟିମ୍ ବି ଏନେଇ ସହମତି ପ୍ରକାଶ କରିଥିବା ସୂଚନା ମିଳିଛି । ବର୍ତମାନ ଦୁଇ ଶିଶୁଙ୍କୁ ଅଧିକ ପରିମାଣରେ ପ୍ରୋଟିନ ଖାଦ୍ୟ ଦିଆଯାଉଛି । ଯାହା ଫଳରେ ଅପରେସନ୍ ପାଇଁ ଉଭୟେ ପ୍ରସ୍ତୁତ ହେବେ । ଏଥିସହ ଚିକିତ୍ସା ପରେ ଦୁଇ ଶିଶୁଙ୍କ ଶରୀରରେ ଦେଖାଦେଇଥିବା ସଂକ୍ରମଣ ବି ହ୍ରାସ ପାଇଛି ।
Kanak News is now on WhatsApp
Join and get latest news updates delivered to you via WhatsApp
ଲଗାତର ମାସେ ଧରି ସବୁ ପରୀକ୍ଷା କରିବା ପରେ ଡାକ୍ତର ଅଶୋକ ମହାପାତ୍ରଙ୍କ ନେତୃତ୍ୱରେ ଟିମ୍ ଏବେ ଅପରେସନ କରିବାକୁ ଅଂଟା ଭିଡିଥିବା ସୂଚନା ମିଳିଛି । ଅପରେସନ୍ ପାଇଁ ଜଗାବଳିଆଙ୍କ ବାପା-ମାଆ ବି ରାଜି ହୋଇଛନ୍ତି । ହସପିଟାଲରେ ଆଡମିଟ୍ ପରେ ଦୁଇ ଶିଶୁଙ୍କ ଇସିଜି, ସିଟି ସ୍କାନ, ଏମ୍ଆରଆଇ, ଅଲଟ୍ରାସାଉଣ୍ଡ ଏବଂ ଏକ୍ସରେ ସମେତ ବହୁ ଗୁରୁତ୍ୱପୂର୍ଣ୍ଣ ରକ୍ତ ପରୀକ୍ଷା କରାଯାଇଛି । ଜଗାବଳିଆଙ୍କ ଚିକିତ୍ସା କରୁଛନ୍ତି ୬୦ ଜଣିଆ ଡାକ୍ତରୀ ଟିମ୍ । ଯେଉଁଥିରେ ପ୍ଲାଷ୍ଟିକ ସର୍ଜରୀ, ଆନାସ୍ଥେସିଆ ଓ ସର୍ଜରୀ ବିଭାଗର ୪୦ ଜଣ ବିଶେଷଜ୍ଞ ଓ ଡାକ୍ତର ଅଛନ୍ତି । ଅନ୍ୟ ୨୦ ଜଣ ନର୍ସ ଏବଂ ଟେକ୍ନିକାଲ୍ ଟିମ୍ ରହିଛନ୍ତି ।
ଦିଲ୍ଲୀ ଏମ୍ସର ସୂଚନା ଅନୁସାରେ ଯଦି ସବୁ ଠିକ୍ ରହେ ତେବେ ସେପଟେମ୍ବର ପ୍ରଥମ ସପ୍ତାହରେ ଜଗା ବଳିଆର ଅପରେସନ୍ କରାଯିବା ସମ୍ଭାବନା ରହିଛି । ଆଉ ଏହା ସଫଳ ହେଲେ ଭାରତୀୟ ଚିକିତ୍ସା ବିଜ୍ଞାନରେ ଯୋଡି ହୋଇଯିବ ଏକ ନୂତନ ଅଧ୍ୟାୟ ।