ଯାତ୍ରାରେ ଅଶ୍ଳୀଳତା, ଆଇଟମ ଗାର୍ଲ ରାଣୀଙ୍କ ମୁହଁତୋଡ ଜବାବ । କହିଲେ ଯାହା କରିଛି ଠିକ୍ କରିଛି, ଆଇଟମ୍ ମାନେ ହିଁ ଅଙ୍ଗପ୍ରଦର୍ଶନ!
କନକ ବ୍ୟୁରୋ : ଖୁଲମଖୁଲା ଅଙ୍ଗପ୍ରଦର୍ଶନ କରୁଥିବା ଯାତ୍ରା ଅଭିନେତ୍ରୀ ଆଜି କ୍ୟାମେରା ସାମ୍ନାରେ ‘ଆଇଟମ୍ ସଙ୍ଗ୍’ର ସଂଜ୍ଞା ନିରୁପଣ କରିଛନ୍ତି । କହିଛନ୍ତି- ଆଇଟମ୍ ମାନେ ହିଁ ଅଙ୍ଗ ପ୍ରଦର୍ଶନ । ବଡ କଥା ହେଉଛି ଯାତ୍ରାର ଏହି ଆଇଟମ୍ ଗାର୍ଲ-ରାଣୀ ପଣ୍ଡା ଶନିବାର ଜଣେ ଦର୍ଶକଙ୍କ କାନକୁ କାମୁଡ଼ି ଦେଇଥିଲେ । ଆଉ ଏହି ଘଟଣା ପରେ ଯାତ୍ରାରେ ଅଶ୍ଲିଳତାକୁ ନେଇ ତୀବ୍ର ପ୍ରତିକ୍ରିୟା ଆସିବାରେ ଲାଗିଛି ।
Kanak News is now on WhatsApp
Join and get latest news updates delivered to you via WhatsApp
‘ଆଇଟମ୍ ମାନେ ଅଙ୍ଗପ୍ରଦର୍ଶନ’? ଶାଢ଼ୀ ପିନ୍ଧି ହୁଏନି ଆଇଟମ୍ ସଙ୍ଗ୍ ।ଯାତ୍ରା ମଂଚରେ ଦର୍ଶକଙ୍କୁ ନିଜ ଅଙ୍ଗ ପ୍ରଦର୍ଶନ ଏବଂ ଅଶଢ଼ ନାଚ ଜରିଆରେ ମତୁଆଲା କରି ଦେଉଥିବା ଆଇଟମ୍ ଅଭିନେତ୍ରୀ ରାନୀ ପଣ୍ଡାଙ୍କ ଇଏ ହେଉଛି ସ୍ପଷ୍ଟିକରଣ । ଲୋକ ଦେଖୁଛନ୍ତି ବୋଲି ସେଭଳି ନୃତ୍ୟ କରୁଛନ୍ତି ବୋଲି କନକ ନ୍ୟୁଜ୍ ଷ୍ଟୁଡିଓରେ କହିଛନ୍ତି ରାନୀ ।
ଯାତ୍ରା ମଂଚରେ ଅଶ୍ଲିଳ ନାଚ ଏବଂ ଏହାକୁ ନେଇ ବିବାଦ ସେତେବେଳେ ଜୋର ଧରିଥିଲା, ଯେତେବେଳେ ଶନିବାର ଖଣ୍ଡଗିରିର ଯାତ୍ରା ଲଢ଼େଇରେ ଘଟିଥିଲା ଏକ ଅଭାବନୀୟ ଘଟଣା ।ମଂଚ ଉପରେ ମତୁଆଲା ଢ଼ଙ୍ଗରେ ଆଇଟମ୍ ସଙ୍ଗ୍ ପରିବେଶ କରୁଥିଲେ ରାନୀ ପଣ୍ଡା । ଆଉ ଠିକ୍ ଏତିକି ବେଳେ ଜଣେ ଏଭଳି କିଛି ଇଙ୍ଗିତ କରିଥିଲେ, ଯାହାକୁ ନେଇ ରାଗି ଉଠିଲେ ରାନୀ । ଆଉ ଏହା ପରେ ମଂଚ ତଳକୁ ଓହ୍ଲାଇ ଆସି ଯୁବକଙ୍କ କାନକୁ କାମୁଡି ଦେଇଥିଲେ ।
ଆଉ ଏହି ଘଟଣା ପରେ ଯାତ୍ରା ମଂଚରେ ଅଶ୍ଲିଳତାକୁ ନେଇ ଦେଖିବାକୁ ମିଳିଛି ପ୍ରବଳ ବିରୋଧ । କଳିଙ୍ଗ ସେନା ପକ୍ଷରୁ ଏନେଇ ଥାନାରେ ଲିଖିତ ଅଭିଯୋଗ ହୋଇଥିବା ବେଳେ ଖଣ୍ଡଗିରି ପଡ଼ିଆରେ କିଛି ଲୋକ ଯାତ୍ରା ପୋଷ୍ଟର ଚିରାଫୋପଡା କରିଛନ୍ତି । ଏପଟେ ଯାତ୍ରାରେ ଅଶ୍ଳୀଳତାକୁ ପ୍ରଶୟ ଦିଆଯିବ ନାହିଁ ବୋଲି ସ୍ପଷ୍ଟ କରିଛନ୍ତି ପୁଲିସ୍ କମିଶନର ।
ତେବେ ବଡ କଥା ହେଉଛି- ଯାତ୍ରା ପଡ଼ିଆରେ ଅଶ୍ଲିଳତାକୁ ନେଇ କୌଣସି ଅଘଟଣ ଘଟିଲେ ଏମିତି ପ୍ରତିବାଦ ହୁଏ ଏବଂ ସବୁ କିଛି ଶାନ୍ତ ପଡ଼ିଗଲେ ପୂର୍ବ ଭଳି ଜାରି ରୁହେ ଏହି ଅଶ୍ଳୀଳତାର ଧାରା । ବୋଧେ ସେଇଥି ପାଇଁ ବାରମ୍ବାର ବିରୋଧ ସତ୍ୱେ ବର୍ଷ ବର୍ଷ ଧରି ମେଲୋଡି ନାଁରେ ଖୁଲମଖୁଲା ଜାରି ରହିଛି ଅଶ୍ଳୀଳତା ।