ପ୍ରଥମ ଚନ୍ଦ୍ର ଅଭିଯାନ ଇତିହାସ ସୃଷ୍ଟି କରିବାରେ ବିଫଳ ହେଲା ଇସ୍ରାଏଲ : ଦୁର୍ଘଟଣାଗ୍ରସ୍ତ ହେଲା ମହାକାଶ ଯାନ
ଚନ୍ଦ୍ରପୃଷ୍ଠରେ ଅବତରଣ କରିବାର କିଛି ସମୟ ପୂର୍ବରୁ ଦୁର୍ଘଟଣାଗ୍ରସ୍ତ ହୋଇ ଧ୍ୱଂସ ହୋଇଗଲା ପୃଥିବୀ ସହ ଯୋଗାଯୋଗ ହରାଇ ଥିବା ଇସ୍ରାଏଲର ଏକ ମହାକାଶଯାନ। ଫଳରେ ଘରୋଇ ପାଣ୍ଠିରେ ବିଶ୍ୱର ପ୍ରଥମ ଚନ୍ଦ୍ର ଅଭିଯାନ ଚଳାଇ ଇତିହାସ ସୃଷ୍ଟି ପାଇଁ ଉଦ୍ୟମ କରିଥିବା ଇସ୍ରାଏଲର ଉଚ୍ଚାଭିଳାଷ ବିଫଳ ହୋଇଗଲା।
Kanak News is now on WhatsApp
Join and get latest news updates delivered to you via WhatsApp
ବିଳମ୍ବିତ ଗୁରୁବାରେ ଚନ୍ଦ୍ରପୃଷ୍ଠରେ ଅବତରଣ କରିବାକୁ ଯାଉଥିବାବେଳେ ସେ ମହାକାଶଯାନଟି ଗ୍ରାଉଣ୍ଡ୍ କଣ୍ଟ୍ରୋଲ୍ ସହ ଯୋଗାଯୋଗ ହରାଇଥିଲା। କିଛି ମୁହୂର୍ତ୍ତ ପରେ ଅଭିଯାନ ବିଫଳ ହୋଇଥିବା କଥା ଘୋଷଣା କରାଯାଇଥିଲା। ଇସ୍ରାଏଲ୍ ଏରୋସ୍ପେସ୍ ଇଣ୍ଡଷ୍ଟ୍ରିଜର ମହାକାଶ ବିଭାଗର ସାଧାରଣ ପରିଚାଳକ ଓଫେର୍ ଡୋରୋନ୍ କହନ୍ତି, ଆମେ ନିଶ୍ଚିତ ରୂପେ ଚନ୍ଦ୍ରପୃଷ୍ଠରେ ଧକ୍କା ଖାଇଛୁ। ଅବତରଣ ପାଇଁ ନିର୍ଦ୍ଧାରଣ କରାଯାଇଥିବା ସ୍ଥାନରେ ଖଣ୍ଡବିଖଣ୍ଡ ହୋଇ ମହାକାଶଯାନଟି ବିଛାଡ଼ି ହୋଇପଡ଼ିଛି।
ଡୋରୋନ୍ କହିଛନ୍ତି, ଅବତରଣ କରିବାର ମୁହୂର୍ତ୍ତେ ଆଗରୁ ମହାକାଶଯାନର ଇଞ୍ଜିନ୍ ବନ୍ଦ ହୋଇଗଲା। ପୁଣି ପାୱାର୍ ଫେରିବା ବେଳକୁ ମହାକାଶଯାନ ଆଉ ନିରାପଦ ଅବତରଣ ବେଗରେ ନଥିଲା। ବିଫଳତାର କାରଣ ନିର୍ଦ୍ଧାରଣ କରିବାକୁ ବୈଜ୍ଞାନିକମାନେ ଉଦ୍ୟମ କରୁଛନ୍ତି। ପ୍ରଧାନମନ୍ତ୍ରୀ ବେଞ୍ଜାମିନ୍ ନେତାନ୍ୟାହୁଙ୍କ ସମେତ ଅନେକ ଦର୍ଶକଙ୍କ ସାମ୍ନାରେ ଓ ଜାତୀୟ ଟେଲିଭିଜନରେ ଏହାର ପ୍ରତ୍ୟକ୍ଷ ପ୍ରସାରଣ ଚାଲିଥିବାବେଳେ ଦୁର୍ଘଟଣା ଘଟିଥିଲା।
କେବଳ ଯୁକ୍ତରାଷ୍ଟ୍ର ଆମେରିକା, ରୁଷ୍ ଓ ଚୀନ୍ ଭଳି ଜାତୀୟ ମହାକାଶ ଏଜେନ୍ସିଙ୍କ ଠାରେ ଏଭଳି ଉଦ୍ୟମର ସମକକ୍ଷ ହେବା ପରି କ୍ଷମତା ଅଛି। ନେତାନ୍ୟାହୁ କହିଲେ, ଯଦି ପ୍ରଥମ ଉଦ୍ୟମରେ ସଫଳ ନହେଲ, ଥରକୁ ଥର ଉଦ୍ୟମ କର। ଆସନ୍ତା ଦୁଇ ବର୍ଷ ମଧ୍ୟରେ ସେ ସଫଳତାର ସହ ଚନ୍ଦ୍ରପୃଷ୍ଠକୁ ଅକ୍ଷତ ଇସ୍ରାଏଲୀ ମହାକାଶ ଯାନଟିଏ ପଠାଇବେ ବୋଲି ନିୟମ କରିଛନ୍ତି।